Read Chol Salmos 43 Bible Online

Salmos 43 - Chol bible

Salmos 43

¹C Dios, meleyon. La' loq'uicon ti uts'at ti' tojlel jini mach bʌ anic mi' c'uxbiñet. Pʌyʌyon loq'uel ti' p'ʌtʌlel winicob yujilo' bʌ lot, jini yujilo' bʌ jontolil.

²C Diosetʌch, c p'ʌtʌlelet, ¿chucoch tsa' cʌyʌyon? ¿Chucoch wersa mic chʌn ajñel ti ch'ijiyem bʌ c pusic'al cha'an woli' tic'lañoñob j contrajob?

³Yom ma' pʌsbeñon a sʌclel yic'ot i sujmlel a t'an, cha'an mi' toj'esañon majlel. Yom ma' pʌyon majlel ti a Templo ti ch'ujul bʌ a wits.

⁴Che' jini mi caj c majlel ba'an i puluntib a majtan, c Dios. Jatet i tijicñʌyelet c pusic'al. Jatet c Dioset. Mi caj c sub a ñuclel ti música am bʌ i ch'ajñal.

⁵¿Chucoch ch'ijiyem c pusic'al? ¿Chucoch wulwulña c pusic'al? La' c pijtan Dios, come mi caj i ñuc'an c pusic'al cha'an i ñuclel, Caj Coltaya Dios.