Read Chol Salmos 44 Bible Online

Salmos 44 - Chol bible

Salmos 44

¹Tsa'ix cubi lojon. Tsi' subeyon lojon c ñojte'el Chuqui tac tsa' mele ti wajali.

²Ya' ba' tsa' choco loq'uel jini sajtemo' bʌ tsa' wotsa a cha'año' bʌ ti a p'ʌtʌlel. Tsa' puts'tesa winicob x'ixicob cha'an ma' wʌc' ti p'ojlel a cha'año' bʌ.

³Come mach ti' p'ʌtʌlelic i yespada tsi' ch'ʌmʌyob jini lum. Ma'anic tsa' mʌjli i cha'añob ti' bajñel p'ʌtʌlel. Pero ti' p'ʌtʌlel jini ñoj bʌ a c'ʌb jini wen yujil bʌ e'tel tsa' coltayob, Come tsa' pʌsbeyob i yutslel a pusic'al.

⁴Jatet, c Reyet, c Dioset mu' bʌ a wʌc' ti colel Jacob.

⁵Mi caj c choc lojon jubel j contrajob cha'an ti a p'ʌtʌlel. Ti a c'aba' mi caj c t'uchtan lojon jini mu' bʌ i contrajiñon lojon.

⁶Come mach cha'anic c jalʌjb xuc'ul c pusic'al. Mach cha'anic quespada mi' mʌjlel c cha'an.

⁷Tsa' pʌyʌyon loq'uel ti' p'ʌtʌlel j contrajob lojon. Tsa' peq'uesa jini mu' bʌ i ts'a'leñon lojon.

⁸C Dios, chʌn xuc'ul lojon c pusic'al ti jatet. Mux c sub lojon i ñuclel a c'aba' ti pejtelel ora.

⁹Chocbilonix lojon wʌle. Tsa'ix a wʌc'ʌyon lojon ti quisin. Ma'anix ma' pi'len majlel c soldadojob lojon.

¹⁰Tsa' wʌc'ʌyon lojon ti puts'el ti' tojlel j contrajob lojon. Jini mu' bʌ i ts'a'leñon lojon mi' xujch'iñob lojon c chubʌ'an.

¹¹Che' bajche' mi' tsʌnsʌntel tiñʌme' tsa' wʌc'ʌyon lojon ti chʌmel. Tsa' pucuyon lojon ti' tojlel jini mach bʌ c pi'ʌlobic lojon.

¹²Tsa' wʌc'ʌ a winicob x'ixicob ti' wenta i contrajob ti che jachi. Ma'anic tsa' ch'ʌmbeyob i tojol.

¹³Tsa' wʌc'ʌyon lojon ti tse'tʌntel ti' tojlel jini mach bʌ c pi'ʌlobic lojon, Cha'an mi' ts'a'leñon lojon, cha'an mi' wajleñon lojon.

¹⁴Tsa' wʌc'ʌyon lojon ti a'lentel ti' tojlel jini gentilob. Jini winicob x'ixicob yan tac bʌ i lumal mi' wajleñoñob lojon.

¹⁵Belel ora muc'on ti quisin. Mic mʌy c wut cha'an quisin,

¹⁶Cha'an i t'an jini mu' bʌ i tse'tañon lojon, mu' bʌ i p'ajon lojon, Cha'an ts'a' mi' q'uelon lojon j contrajob mu' bʌ i q'uextañob jontolil.

¹⁷Tsa' tili wocol tic tojlel lojon, Anquese ma'anic tsa' ñajʌyiyet tic pusic'al lojon. Ma'anic tsac ñusa lojon jini xuc'ul bʌ a t'an.

¹⁸Xuc'ul to c pusic'al lojon a wic'ot. Ma'anic tsaj cʌyʌ a bijlel.

¹⁹Tsa' teñeyon lojon ya' ba'an jini mate'el ts'i'. Tsa' wotsayon lojon ti ic'ch'ipan bʌ ba' bʌbʌq'uen mi lac chʌmel.

²⁰Mi tsa' laj cʌyʌ lac Dios cha'an mi lac ch'ujutesan dioste' tac,

²¹¿Mach ba anic mi' tsictiyel ti a wut? Come cʌmbil i cha'an Dios jini mucul tac bʌ am bʌ ti lac pusic'al.

²²Wolic tsʌnsʌntel lojon ti jujump'ejl q'uin cha'an tsac ñopoyet lojon. Wets'bilon lojon che' bajche' tiñʌme' cha'an mic tsʌnsʌntel lojon.

²³¡Ch'ojyen, c Yum! ¿Chucoch woliyet ti wʌyel? Yom ma' pʌs a p'ʌtʌlel. Mach a junyajlel chocon lojon ti a tojlel.

²⁴¿Chucoch wola' mʌc a wut? ¿Chucoch ñajʌyem c wocol lojon ti a pusic'al che wolic tic'lʌntel lojon?

²⁵Come wen ch'ijiyemon lojon, pʌcʌlon ti lum.

²⁶La' coltañon lojon, Mʌñʌyon lojon come c'ux ma' wubiñon lojon.