Read Chol Salmos 45 Bible Online

Salmos 45 - Chol bible

Salmos 45

¹But'ul c pusic'al cha'an jini wen tac bʌ com bʌ c sub. Mic sub i ñuclel jini rey ti c'ay. Jini cac' i wentajʌch pluma ti' c'ʌb jini wen yujil bʌ ts'ijb.

²Ñumen a t'ojol jax bajche' pejtel winicob. Awujil uts bʌ t'an. Jini cha'an Dios tsa'ix i yʌq'ueyet i yutslel i t'an ti pejtelel ora.

³Cʌchʌ ti a ñʌc' a wespada. C'ax p'ʌtʌlet, pʌsʌ i ñuclel a yumʌntel.

⁴Cha'len marcha ti' wut a contrajob, come tsa' mʌjli a cha'an Cha'an ti caj a sujmlel yic'ot a wutslel yic'ot a tojel. Pʌsʌ ñuc tac bʌ a we'tel cha'an p'ʌtʌlet.

⁵Jay i ni' a jalʌjb mu' bʌ i jec'ben i pusic'al a contrajob. Winicob x'ixicob mi caj i yochelob ti a wenta.

⁶C Yum, an a yumʌntel ti pejtelel ora. Jini a baston i yejtalʌch a yumʌntel. Toj ma' cha'len meloñel.

⁷Tsa'ix a c'uxbi chuqui tac toj. Tsa'ix a ts'a'le jontolil. Jini cha'an Dios, jini a Dios, tsa'ix i muluyet ti aceite yilal, Cha'an mi' yʌq'ueñet i tijicñʌyel a pusic'al ñumen bajche' a pi'ʌlob.

⁸An i yujts'il a pislel bajche' xojocña bʌ mirra* yic'ot áloe yic'ot casia. Tijicña a pusic'al ya' ti colem otot melbil bʌ ti marfil ba' woli ti t'an música.

⁹Ya' añob xch'oc bʌ i yalobilob reyob ti' tojlel jini x'ixicob año' bʌ i ñuclel. Ya'ʌch wa'al jini x'ixic bʌ rey ti a ts'ejtʌl. Lʌpʌl i cha'an i bujc joch'bil bʌ ti oro ch'oyol bʌ ti Ofir.

¹⁰Xch'oc bʌ calobil, ubibeñon c t'an. Ac'ʌ ti a pusic'al. La' ñajʌyicob ti a pusic'al a pi'ʌlob yic'ot jini año' bʌ ti' yotot a tat.

¹¹Mi caj i c'uxbiñet jini rey come a t'ojol mi' q'uelet. Jiñʌch a Yum, yom ma' c'uxbin.

¹²Talobix ch'oyolo' bʌ ti Tiro i yʌq'ueñet a majtan. Jini wen chumulo' bʌ ti lum mi caj i c'ajtibeñet a wutslel.

¹³I t'ojol jax jini xch'oc bʌ i yalobil rey woli bʌ i pijtan ti' mal i yotot. Ñotbil jini oro ti' pislel.

¹⁴Mi caj i pʌjyel majlel ba'an jini rey lʌpʌl i cha'an joch'bil bʌ i bujc. Jini xch'oc bʌ i pi'ʌlob mu' bʌ i pi'leñob majlel Mi caj i pʌjyelob majlel ya' ba' añet.

¹⁵Tijicña i pusic'al mi caj i pʌjyelob majlel cha'an mi' ñuc'añob i pusic'al. Mi caj i yochelob ti' yotot jini rey.

¹⁶Xch'oc bʌ calobil, cha' ubibeñon c t'an. Jini a walobilob mi caj i tajbeñob i ye'tel i tat. Mi caj a wotsañob ti yumʌlob ti pejtelel pañimil.

¹⁷Mi caj cʌc' ti cʌjñel a c'aba' ti' tojlel winicob x'ixicob, Cha'an mi' tsictesʌbeñob i yalobilob ti jujunlajm. Jini cha'an mi caj i chʌn subob a ñuclel ti pejtelel ora.