Read Chol Salmos 50 Bible Online

Salmos 50 - Chol bible

Salmos 50

¹Jini C'ax P'ʌtʌl bʌ Dios, jini lac Yum, tsa'ix i cha'le t'an. Mi' pejcan jini año' bʌ ti pañimil c'ʌlʌl ba' mi' pasel q'uin c'ʌlʌl ba' mi' bʌjlel q'uin.

²Ya' ti Sion, Dios tsi' pʌsʌ i ñuclel ti c'ajc ti jini wen i t'ojol jax bʌ i Templo.

³Tal lac Dios. Mach ñʌch'ʌlic che' mi' tilel. Mi' lejmel c'ajc ti' tojel i wut. An p'ʌtʌl bʌ ic' ti' joytilel.

⁴Mi' pʌy tilel jini año' bʌ ti panchan Yic'ot jini año' bʌ ti pañimil cha'an mi' mel winicob x'ixicob i cha'año' bʌ.

⁵Woli' yʌl: Tempʌbeñon c cha'año' bʌ Tsa'ix bʌ ochiyob ti trato quic'ot che' bʌ tsi' yʌq'ueyoñob tsʌnsʌbil bʌ c majtan, che'en.

⁶Jini año' bʌ ti panchan mi caj i subob tojatax Dios. Come xmeloñel ajñel.

⁷Tsa' caji' yʌl Dios: Calobil Israel, Ubinla c t'an mu' bʌ c sub ti a contra. Dioson, joñon a Dioson.

⁸Mach cha'anic tsʌnsʌbil bʌ c majtan mu' bʌ a chʌn aq'ueñon wolic tiq'uet.

⁹Mach comic mi tat wacax mi chivo am bʌ ti pam a wotot,

¹⁰Come c cha'añʌch pejtelel bʌte'el am bʌ ti mate'el, Yic'ot bajc'ʌl wacax am bʌ ti bujtʌl tac.

¹¹Cʌñʌl c cha'an pejtel te'lemut am bʌ ti wits. C cha'añʌch pejtel jontol bʌ bʌte'el mu' bʌ ti xʌmbal ti jamil.

¹²Anic c wi'ñal, mach muq'uic c subeñet, Come c cha'añʌch jini pañimil yic'ot pejtelel i bʌl.

¹³¿Com ba j c'ux i bʌc'tal tat wacax? ¿Com ba c japben i ch'ich'el tat chivo? Mach comic, che'en.

¹⁴Yom ma' subeñon wocolix cʌlʌ. Jiñʌch tsʌnsʌbil bʌ c majtan, yubil. Yom ma' ts'ʌctesan a t'an che' bajche' tsa' wʌn ña'ta a mel.

¹⁵Pejcañon che' ti' yorajlel wocol. Mi caj colet. Mi caj a tsictesan c ñuclel.

¹⁶Mic subeñob jontolo' bʌ: Yom mi la' cʌy la' lon sub c mandar, Yic'ot jini albil bʌ t'an c cha'an.

¹⁷Wola' ts'a'len a cʌntesʌntel. Wola' ñusʌbeñon c t'an.

¹⁸Che' ma' q'uel xujch', ma' coltan. Ma' pi'len majlel jini mu' bʌ i cha'len ts'i'lel.

¹⁹Ma' c'ʌn a wej ti jontolil, ma' cha'len lot.

²⁰Ma' p'aj a weran anquese juntiquil jach la' ña'.

²¹Tsa'ix a mele iliyi. Tsa' ña'ta lajalon bajche'et come ma'anic chuqui tsa cʌlʌ. Mi caj c tiq'uet. Mi caj c tsictesan a mul.

²²Ña'tanla iliyi jatetla mach bʌ anic mi la' ña'tañon Ame mic bic'ti jisañetla ame mach chʌn coliquetla.

²³Majqui jach mi' subeñon wocolix cʌlʌ woli' yʌq'ueñon tsʌnsʌbil bʌ c majtan yilal. Mi caj c pʌsben i coltʌntel majqui jach mi' sajcan wen bʌ c bijlel, che'en Dios.