Read Chol Salmos 52 Bible Online

Salmos 52 - Chol bible

Salmos 52

¹[6] Winic am bʌ a we'tel, ¿chucoch ma' chañ'esan a bʌ ti jontolil? Añʌch i yutslel Dios ti pejtelel ora.

²Wola' chajpan a bʌ cha'an ma' mel jontolil. Lajal a wac' bajche' jay bʌ xilete che' ma' cha'len lotiya.

³Wola' mulan jontolil, wola' ts'a'len chuqui uts'at. Wola' mulan lot, wola' ts'a'len isujm bʌ t'an.

⁴Wola' mulan t'an mu' bʌ i sʌt winicob. Wen awujil lot.

⁵Dios mi caj i pech' teñet loq'uel. Mi caj i chuquet loq'uel ti a wotot. Mi caj i boquet loq'uel ti' lumal jini cuxulo' bʌ.

⁶Jini tojo' bʌ mi caj i q'uelob. Mi caj i bʌc'ñañob lac Yum. Mi caj i tse'tañob ili winic. Mi caj i yʌlob:

⁷Q'uelela jini winic mach bʌ anic tsi' sajca i coltʌntel ti Dios. Tijicña tsi' lon ubi cha'an ti cabʌl i chubʌ'an. Tsi' ch'ejl'esa i bʌ ti jontolil, che'ob.

⁸Mach che'ic joñon. Tijicñayon mij colel ti' yotot Dios che' bajche' c'oc' bʌ olivote'. Xuc'ulon ti pejtelel ora cha'an i yutslel i pusic'al Dios mu' bʌ c ñop.

⁹Mi caj c subeñet wocolix a wʌlʌ ti pejtelel ora, come a melbalʌch. Ti' tojlel a cha'año' bʌ mi caj c ña'tan a c'aba', come uts'atet. Wolic pijtañet.