Read Chol Salmos 59 Bible Online

Salmos 59 - Chol bible

Salmos 59

¹[10] Dios, pʌyʌyon loq'uel ti' p'ʌtʌlel j contrajob. Coltañon ti' tojlel jini tsa' bʌ i tempayob i bʌ tij contra.

²Pʌyʌyon loq'uel ti' p'ʌtʌlel jini mu' bʌ i cha'leñob jontolil. Coltañon loq'uel ti' p'ʌtʌlel jini winicob yomo' bʌ tsʌnsa.

³Awilan, woli' chijtañoñob. Tempʌbilobix jini p'ʌtʌlo' bʌ cha'an mi' contrajiñon. C Yum, ma'anic tsac ñusʌbeyet a t'an, ma'anic tsac cha'le mulil.

⁴Ti ora jach mi' chajpañob i bʌ anquese ma'anic chuqui tsac tumbeyob. La' ba' añon. Q'uele j contrajob.

⁵La' c Yum Dios, i Yumet Panchan yic'ot Pañimil, i Dioset israelob. Ac'ʌyob ti tojmulil winicob x'ixicob ti pejtel pañimil. Mach yomic ma' p'untan jontolo' bʌ mu' bʌ i ñusʌbeñob a t'an.

⁶Mi' sujtelob che' iq'uix, jinicñayob che' bajche' ts'i'. Tselecña mi' ñumelob ti tejclum cha'an mi' yajñesañob jini p'ump'un bʌ.

⁷Mi' p'ojlel i wajleya jontolo' bʌ che' bajche' potspotsña bʌ i ya'lel i yej ts'i'. Ti' yej jini xjop't'an an espada yilal. Mi' yʌlob: Ma'anic majch mi' yubiñonla. Che'ʌch mi' lon ña'tañob.

⁸C Yum, jatet mi caj a tse'tañob, Mi caj a tse'tan jini mach bʌ yomobic i cʌñet.

⁹Pero joñon mi caj c pijtañet, Dios, come c P'ʌtʌlelet. Xuc'ulon come wola' cʌntañon.

¹⁰Dios, mi caj a p'untañon. Mi caj a majlel ñaxan tic wut. Mi caj a wʌq'ueñon c t'uchtan j contrajob.

¹¹Mach a tsʌnsañob, ame i cʌyʌyetob c pi'ʌlob. Pam pucuyob ti a p'ʌtʌlel. Peq'uesañob. C Yum, c mʌctʌjibet lojon.

¹²Leco chuqui mi' yʌlob. Mulilʌch i t'an. Mi' chañ'esañob i bʌ ti p'ajoñel yic'ot ti lot. Chocoyob jubel.

¹³Jisañob ti a mich'ajel, Dios. Jisañob jinto mach chʌn tsiquilobic. La' i ña'tañob winicob x'ixicob woliyet ti yumʌntel ti Jacob yic'ot ti pejtelel lum c'ʌlʌl ba' jaxʌl pañimil.

¹⁴Mi' sujtelob che' ti ic'ajel. Jinicña mi' cha'leñob che' bajche' ts'i'. Mi' joyob jini tejclum.

¹⁵Mi' sʌclañob ñumel i bʌl i ñʌc'. Mi mach jasʌlic mi' yubiñob, mi' ñusañob ac'ʌlel ti calle.

¹⁶Mach che'ic joñon. Mi caj j c'ʌyin a p'ʌtʌlel ti' tojlel winicob. Melel mi caj j c'ʌyin a wutslel ti c'am bʌ t'an che' ti sʌc'ajel, Come jatet wola' q'uelon. I wentajet chan bʌ ts'ajc ba'an q'ueloñib. Caj Coltayajet che' mi cubin wocol.

¹⁷Dios, mi caj j c'ʌyin a ñuclel. C p'ʌtʌlelet. Cʌntʌbilon ti jini chan bʌ ts'ajc am bʌ i q'ueloñib. Jatet, c Dios, ma' p'untañon.