Read Chol Salmos 60 Bible Online

Salmos 60 - Chol bible

Salmos 60

¹[11] Dios, chocbilonix lojon a cha'an. Pam pujquemonix lojon. Tsa'ix a mich'leyon lojon, Tsa'ix a cʌyʌyon lojon.

²Tsa' choco tilel yujquel. Tsa' tsijli jini lum. Cha' melex ti pamal tac jini ch'en, come mach chʌn xuc'ulix pañimil.

³Tsa' wʌc'ʌyob ti wocol jini winicob x'ixicob a cha'an. Tsʌts tsa' tic'layon lojon.

⁴Tsa' wʌq'ueyob bandera jini mu' bʌ i bʌc'ñañet, Cha'an mi' tempañob i bʌ i tsictesan i sujmlel a t'an.

⁵Coltañon lojon ti ñuc bʌ a p'ʌtʌlel. Jac'beñon lojon Cha'an mi' coltʌntelob jini c'uxbibilo' bʌ a cha'an.

⁶Dios, tsa' wʌc'ʌ a t'an ti Ch'ujul bʌ Ajñibʌl: Mi' caj i mʌjlel c cha'an. Mi caj c t'oxe' Siquem. Mi caj c p'is jini joctʌl ya' ti Sucot.

⁷Galaad yic'ot Manasés c cha'añobʌch. Efraín i wentajʌch ts'ajquibil bʌ cotot. Mi' loq'uel tilel c rey ti Judá.

⁸Moab jiñʌch to'o x'e'tel c cha'an mu' bʌ i pocbeñon coc. Edom jiñʌch to'o x'e'tel mu' bʌ i cʌntʌbeñon c xʌñʌb. Mij cajel ti oñel ya' ti Filistea cha'an tsa' mʌjli c cha'an, che'en Dios.

⁹¿Majqui mi caj i pʌyon ochel ti Edom ti jini ts'ajquibil bʌ tejclum?

¹⁰Dios, ¿mach ba chocbilonic lojon a cha'an? Dios, ma'anix ma' pi'leñob majlel ti guerra jini soldadojob c cha'an lojon.

¹¹Aq'ueñon lojon c p'ʌtʌlel cha'an mic mʌlben lojon j contrajob, Come lolom jach i coltaya winic.

¹²Cha'an jach jatet mux i mʌjlel c cha'an lojon, Come jatet Dios mi caj a t'uchtan j contrajob lojon.