Read Chol Salmos 63 Bible Online

Salmos 63 - Chol bible

Salmos 63

¹[12] Dios, jatet c Dioset, wolic bʌc' sʌclañet. Tiquin jax c ti' yubil cha'an com c tajet. Ti pejtelel c pusic'al comet. Lajalon bajche' tiquin lum yilal mach bʌ anix i c'ʌjñibal che' ma'anic ja'.

²Jini cha'an tsa'ix ochi ti ch'ujul bʌ otot Cha'an mij q'uel a p'ʌtʌlel yic'ot a ñuclel.

³Machic c'uxbibilon a cha'an lolom jach cuxulon. Pero tsa' pʌsbeyon a c'uxbiya yic'ot a wutslel. Jini cha'an mic sub a ñuclel.

⁴Che' jini mi caj c ch'ujutesañet che' cuxulon to. Ti a c'aba' jach mi caj c letsan j c'ʌb ti oración.

⁵Jasʌlon mi caj cubin ti a tojlel che' bajche' jini mu' bʌ i ñaj'an ti wen uts'at bʌ i bʌl i ñʌc'. Mi caj c sub a ñuclel ti c'ay

⁶Ba ora mic ña'tañet tic wʌyib. Mi caj c pejcañet che' cañal c wut ti ac'ʌlel.

⁷Come cabʌl tsa' coltayon. Tijicñayon ti' yebal a wich' yilal.

⁸C'ʌlʌl wʌle wolic tsajcañet ti jump'ejl c pusic'al. Wola' cʌntañon ti cabʌl a p'ʌtʌlel.

⁹Jini mu' bʌ i ñopob i jisañon Mi caj i jubelob majlel ti' yajñib chʌmeño' bʌ.

¹⁰Cʌybilobix mi caj i tsʌnsʌntelob ti espada. I we'el tsuc bajlum mi caj i majlelob.

¹¹Pero tijicña c pusic'al mi caj cubin ti Dios. Pejtel mu' bʌ i yʌc'ob i bʌ ti' wenta tijicña mi caj i yubiñob. Pero jini mu' bʌ i cha'leñob lot wersa mi caj i ñʌjch'elob.