Read Chol Salmos 65 Bible Online

Salmos 65 - Chol bible

Salmos 65

¹Dios, uts'at mi' caj ti sujbel a ñuclel ya' ti Sion. Ts'ʌcʌl mi caj i melob winicob chuqui tac tsi' subeyetob.

²Mi caj i tilelob ba' añet pejtel winicob x'ixicob, Come jatet ma' ñich'tʌbeñob i yoración.

³Mach mejlix j cuch c mul, Pero jatet ma' ñusʌbeñon lojon.

⁴Tijicña mu' bʌ a yajcan. Ma' pʌy cha'an mi' chumtʌl ti awotot. Cabʌlix lojon c wenlel ya' ba' mic ch'ujutesañet lojon ti ch'ujul bʌ a Templo.

⁵Mi caj a pʌs i yejtal tac a p'ʌtʌlel tic tojlel lojon. Jatet c Dios, ma' coltañon lojon. Woli' pijtañetob jini chumulo' bʌ ti ñajt tac bʌ i lumal yic'ot ti ñajt tac bʌ ñajb.

⁶Jatet tsa' wa'choco tac jini wits ti a p'ʌtʌlel. Cabʌlʌch a p'ʌtʌlel baqui jach ma' tsictesan a bʌ.

⁷Ma' ñʌch'tesan colem ñajb ju'ucña bʌ woli ti t'an, yic'ot ju'ucña bʌ winicob x'ixicob.

⁸Jini chumulo' bʌ ti ñajt bʌ pañimil mi' bʌc'ñañetob che' mi' q'uelob i yejtal a p'ʌtʌlel. Jatet wola' wʌq'ueñob i tijicñʌyel ba' mi' pasel q'uin c'ʌlʌl ba' mi' bʌjlel q'uin.

⁹Ma' ña'tan chuqui yom ti pañimil. Ma' choc tilel ja'al. Jini cha'an wen anix i bʌl cha'an ma' wʌch'esan. Ma'anic mi' tiquin jini colem ja' a cha'an. Ma' wʌq'ueñon lojon pac', come che'ʌch a wom.

¹⁰Ma' mul jini japal tac bʌ lum. Pamacña ma' mel jini p'uchul tac bʌ lum. Mi' c'un'an ti musmusña bʌ ja'al. Ma' wʌq'uen i yutslel a t'an jini woli tac bʌ ti colel.

¹¹Ma' wen ac' i cuch cholel. Baqui jach ma' ñumel mi' p'ojlel pʌc'ʌbʌl.

¹²Jini potrero tac am bʌ ti jamil wen ch'oquiyem jax. Tijicña yilal jini bujtʌl tac.

¹³Bujt'em jini jamil ti tiñʌme'. Bujt'em tac jini joctʌl ti' wut jam. Tijicña mi' yubiñob winicob x'ixicob. Mi cha'leñob c'ay.