Read Chol Salmos 66 Bible Online

Salmos 66 - Chol bible

Salmos 66

¹Pejteletla añet bʌ la ti pañimil, tijicña yom mi la' pejcan Dios.

²C'ʌyibenla i c'aba' come ñuc. Subula i ñuclel come i t'ojol jax.

³Subenla Dios: Bʌbʌq'uen a melbal. Jini cha'an mi' yumañet a contrajob cha'an wen ñuc a p'ʌtʌlel.

⁴Ti pejtelel pañimil mi' ñoctʌlob ti a tojlel. Mi' c'ʌyiñetob, mi' c'ʌyiñob a c'aba' cha'an ñuc. Che'ʌch yom mi la' suben.

⁵La'cula, q'uelela i melbal Dios. Bʌbʌq'uen i melbal ti' tojlel winicob x'ixicob.

⁶Dios tsi' tiquesa jini colem ñajb. Jini winicob x'ixicob tsi' xʌñʌyob ñumel jini colem ja' ti' yoc. Tijicña tsa cubi lojon ya'i ti lac Yum.

⁷Mi' cha'len yumʌl ti' p'ʌtʌlel ti pejtelel ora. Mi' q'uel pejtel winicob x'ixicob. Tsajiletla ame la' chañ'esan la' bʌ jatetla mu' bʌ la' ñusʌben i t'an.

⁸Winicob x'ixicob, ch'ujutesanla Dios. Pam subula majlel i ñuclel.

⁹Come cʌntʌbilonla i cha'an ti pañimil c'ʌlʌl wʌle. Mi' cʌntʌbeñonla la coc ame yajliconla.

¹⁰Jatet Dios, tsa'ix a wilʌbeyon lojon c pusic'al. Che' bajche' mi' pulel tsucul taq'uin tsa'ix a sʌq'uesayon lojon.

¹¹Tsa' cha' otsayon lojon ti to'o majtan e'tel yilal. Tsa' wʌq'ueyon lojon wen al bʌ j cuch lojon.

¹²Tsa' wotsayon lojon ti' wenta jontol bʌ winicob. Tsac ñusa lojon c'ajc yic'ot ja', Pero tsa' cha' ac'ʌyon lojon ba' tijicña pañimil.

¹³Mi caj cochel ti a wotot. Mi caj c ch'ʌmbeñet tilel pulbil bʌ a majtan. Mi caj c ts'ʌctesan jini t'an tsa' bʌ c subeyet.

¹⁴Jini tsa' bʌ cʌlʌ che' bʌ tsa cubi wocol, mux c mele'.

¹⁵Mi caj cʌq'ueñet jujp'em bʌ tat tiñʌme' yic'ot i tat wacax yic'ot i tat chivo, pulbil tac bʌ a majtan, Yic'ot i buts'il tat tiñʌme'.

¹⁶Bej chocola tilel la' bʌ. Ubinla, pejtel mu' bʌ la' bʌc'ñan Dios. Mi caj c sub chuqui tsi' melbeyon Dios cha'an mi' coltañon.

¹⁷C'am tsac pejca Dios. Ti quej tsac pam pucu i ñuclel.

¹⁸Muq'uic c chʌn c'uxbin mulil, Mach i jac'ʌyic c t'an jini lac Yum.

¹⁹Pero tsa'ix i yubiyon Dios ti melel. Tsi' jac'beyon coración.

²⁰La' ch'ujutesʌntic Dios, Come ma'anic tsi' ñusʌbeyon coración. Ma'anic tsi' cʌyʌ i c'uxbiñon.