Read Chol Salmos 67 Bible Online

Salmos 67 - Chol bible

Salmos 67

¹Dios, p'untañon lojon. Aq'ueñon lojon i yutslel a t'an. Yom tijicña a pusic'al ma' q'uelon lojon

²Cha'an mi' cʌñob a bijlel jini año' bʌ ti pañimil, Cha'an mi' ña'tañob winicob x'ixicob ti pejtelel pañimil awujil coltaya.

³Dios, la' i subob a ñuclel pejtel winicob x'ixicob. La' i subob a ñuclel.

⁴La' i yubiñob i tijicñʌyel jini tejclum tac. La' i cha'leñob c'ay ti tijicñʌyel i pusic'al, Come toj ma' cha'len yumʌl ti' tojlel. Mi caj a pʌsbeñob a bijlel.

⁵Dios, la' i subob a ñuclel winicob x'ixicob. La' i tsictesañob a ñuclel.

⁶Jini lac chol tsa'ix i yʌc'ʌ tac i cuch. Dios woli' pʌsbeñonla i yutslel, jiñʌch lac Dios.

⁷Dios mi caj i pʌsbeñonla i yutslel. Mi caj i bʌc'ñañob Dios winicob x'ixicob c'ʌlʌl ti ñajt tac bʌ pañimil.