Read Chol Salmos 68 Bible Online

Salmos 68 - Chol bible

Salmos 68

¹La' tejchic Dios. La' i puc majlel i contrajob. La' puts'icob jini mu' bʌ i ts'a'leñob.

²Che' bajche' buts' tomocña bʌ mi' majlel, la' majlicob ja'el jini chocbilo' bʌ i cha'an. Che' bajche' ta'chʌb mu' bʌ i yulmʌl ti c'ajc, La' jilicob jini jontolo' bʌ ti' tojlel Dios.

³La' i yubiñob tijicña jini tojo' bʌ. La' ñuc'acob i pusic'al ti' tojlel Dios.

⁴Yom mi la' c'ʌyiben i ñuclel Dios. Tsictesanla i ñuclel Dios c'ʌcʌl bʌ mi' ñumel ti tocal. I c'aba'ʌch lac Yum. La' ñuc'ac la' pusic'al ti' tojlel.

⁵I Tatʌch jini meba' alʌlob. I yaj Coltaya meba' x'ixicob, Jini Dios am bʌ ti Ch'ujul bʌ Ajñibʌl.

⁶Dios mi' yʌq'ueñob i chumlib jini ch'ijiyemo' bʌ. Mi' yʌc' ti colel jini xcʌjchelob. Pero jini mach bʌ anic mi' ch'ujbiñob i t'an mi' tajob i yajñib ti tiquin bʌ lum.

⁷Jatet, Dios, tsa' majliyet ti ñaxan che' bʌ tsa' pʌyʌ majlel a cha'año' bʌ ti colem bʌ i tiquiñal pañimil.

⁸Tsa' tili yujquel lum. C'am tsi' cha'le ja'al che' bʌ tsa' pʌsʌ a bʌ. Jini Sinaí tsi' ñijca i bʌ ti' tojlel Dios, i Dios Israel.

⁹Jatet Dios tsa' choco tilel ch'ʌnch'ʌña bʌ ja'al. Tsa' cha' aq'ueyob i ñuclel i pusic'al a cha'año' bʌ che' ch'ijiyemob.

¹⁰Ya' mi' chumtʌlob ba' tsa' wʌq'ueyob lum. Ti a wutslel, Dios, tsa' chajpʌbeyob i bʌl i ñʌc' jini p'ump'uño' bʌ.

¹¹Lac Yum tsi' yʌc'ʌ jini p'ʌtʌl bʌ i t'an. Bajc'ʌl x'ixicob tsi' pam pucuyob.

¹²Tsa' puts'iyob majlel jini reyob yic'ot soldadojob. Jini x'ixicob ti Israel woli' t'oxbeñob i bʌ i majtan tsa' bʌ chilbentiyob i contrajob ti guerra.

¹³I t'ojolob jax yic'ot i ch'ʌjlib melbil bʌ ti plata yic'ot ti oro.

¹⁴Jini Mach bʌ Anic i P'isol i P'ʌtʌlel tsi' pucu majlel reyob che' bajche' i ña'al tsʌñal am bʌ ti wits i c'aba' Salmón.

¹⁵I cha'añʌch Dios jini wits i c'aba' Basán am bʌ cabʌl chan tac bʌ i ñi'.

¹⁶Dios tsi' yajca jini pec' bʌ Sion cha'an ya' yom chumtʌl ti pejtelel ora. Jini yan tac bʌ wits ts'a'lebil yilal, come ma'anic tsi' yajca.

¹⁷Wen bajc'ʌl jini carreta tac i cha'an Dios. Lac Yum tsi' cʌyʌ Sinaí wits. Tsa' juli ti Ch'ujul bʌ Ajñibʌl wʌ' ti Sion.

¹⁸Tsa'ix letsi ti chan. Tsa'ix i pʌyʌyob majlel jini cʌchʌlo' bʌ. Tsa'ix i taja i majtan tac cha'an mi' yʌq'ueñob winicob, Yic'ot jini mu' bʌ i ñusañob i t'an. Wʌ' mi caj i yajñel lac Yum Dios la quic'ot.

¹⁹La' ch'ujutesʌntic lac Yum. Ti jujump'ejl q'uin mi' ch'ʌmbeñonla laj cuch. Jiñʌch laj caj Coltaya Dios.

²⁰Jiñʌch Dios mu' bʌ i coltañonla. Lac Yum Dios mi' yʌc'onla ti loq'uel ba' bʌbʌq'uen mi lac chʌmel.

²¹Dios mi caj i jisʌbeñob i p'ʌtʌlel i contrajob, Come mach yomobic i cʌyob i mul.

²²Lac Yum tsi' yʌlʌ: Mi caj c cha' pʌy loq'uel la' contrajob ti Basán yic'ot ti tam bʌ ñajb

²³Cha'an mi la' jisañob. Jini ts'i' mi caj i lembeñob i ch'ich'el, che'en.

²⁴I cha'año' bʌ Dios c Rey woliyob ti marcha cha'an tsa' mʌjli i cha'an. Mi caj i yochelob ti Ch'ujul bʌ Ajñibʌl.

²⁵Ñaxan mi' majlelob jini xc'ayob, Wi'ilpat jini mu' bʌ i ñijcañob majlel música. Ya' ti ojlil jini xch'ocob woli' ñijcañob majlel yambʌ música.

²⁶Ya' ba' mi' tempañob i bʌ yom mi la' ch'ujutesan lac Yum Dios, Jatetla i p'olbalet bʌ la Israel.

²⁷Ya'an Benjamín jini ijts'inil bʌ woli bʌ ti yumʌl. Ya' añob i yumob Judá ti' tojlel jini tempʌbilo' bʌ. Ya' añob i yumob Zabulón yic'ot i yumob Neftalí.

²⁸C Dios, aq'ueñon lojon a p'ʌtʌlel. Xuc'chocoñon lojon, Dios, come a melbalon lojon.

²⁹Talob reyob i yʌq'ueñet a majtan ya' ti a Templo ti Jerusalén.

³⁰Tiq'ui jini j contrajob lojon. T'uchtan majlel jini mu' bʌ i wersa c'ajtiñob tojoñel. Pucu majlel jini winicob x'ixicob yomo' bʌ guerra.

³¹Jini wen chumulo' bʌ ti Egipto mi caj i tilelob. Jini año' bʌ ti Etiopía mi caj i sʌts'ob i c'ʌb ti ora cha'an mi' yʌq'ueñob Dios i majtan.

³²Jatetla añet bʌ la ti' tejclum tac pañimil, yom mi la' c'ʌyin Dios. C'ʌyibenla i ñuclel.

³³Jiñʌch woli bʌ ti xʌmbal ñumel ya' ti panchan tsa' bʌ i mele ti wajali. Awilan, mi' choc tilel i t'an, jini p'ʌtʌl bʌ i t'an.

³⁴Subula i p'ʌtʌlel Dios, Mu' bʌ i pʌsben i ñuclel israelob. Mi' pʌs i p'ʌtʌlel ti tocal.

³⁵Bʌbʌq'uen jax Dios mu' bʌ i tsictesan i bʌ ti ch'ujul bʌ i yajñib. I Dios Israel, jiñʌch mu' bʌ i yʌq'uen winicob x'ixicob i p'ʌtʌlel yic'ot i wersa. La' ch'ujutesʌntic Dios.