Read Chol Salmos 69 Bible Online

Salmos 69 - Chol bible

Salmos 69

¹Dios, coltañon. Ochemon ti mal ja' yubil. Bʌbʌq'uen mic chʌmel.

²Woli' ts'u'on ochel jini tam bʌ oc'ol. Ma'anic c t'uchlib. Ochemon ti tam bʌ ja' mu' bʌ i mujlañon yubil.

³Tsa' lujbayon ti uq'uel. Ma'anix mic chʌn mejlel ti t'an. Mach c'otix c wut che' mic pijtan c Dios.

⁴Cabʌlobʌchix mu' bʌ i ts'a'leñon anquese ma'anic c mul. Ñumen cabʌlob ti tsicol bajche' i tsutsel c jol. P'ʌtʌlob jini yomo' bʌ i jisañon. Mi' lon contrajiñoñob. Ma'anic chuqui tsac tumbeyob. Jini mach bʌ anic tsac xujch'ibeyob wersa mic to'o q'uextʌbeñob.

⁵Dios, cʌmbil a cha'an c tontojlel. Mach mucbilic c mul ti a wut.

⁶C Dios, i Yumet Panchan yic'ot Pañimil. Mach a wʌc'ob ti quisin cha'an c mul jini mu' bʌ i pijtañetob. I Dioset Israel. Mach a wʌc'ob ti ts'a'lentel cha'an c mul jini mu' bʌ i sajcañetob.

⁷Cha'an tsac ñopoyet tsaj cuchu c ts'a'lentel. Quisintic jax tsa cubi.

⁸Mach i cʌñʌyonic c pi'ʌlob. Lajal mi' q'ueloñob bajche' juntiquil ñajt bʌ ch'oyol.

⁹Jisʌbil c p'ʌtʌlel cha'an bʌxon ti a we'tel ti awotot. Mi' yʌ'leñon jini mu' bʌ i yʌ'leñet.

¹⁰Tsac cha'le uq'uel, tsac cha'le ch'ajb. Jini cha'an woli cʌ'lentel.

¹¹Mi' ts'e'tañoñob cha'an tsac moso c bʌ ti coxtal cha'an i ch'ijiyemlel c pusic'al.

¹²Jini año' bʌ i ye'tel ti tejclum mi' p'ajoñob che' mi' tempañob i bʌ. Jini xyʌc'ʌjelob mi' wajleñoñob ti c'ay.

¹³Jixcu joñon, c Yum, mic pejcañet ti oración. Dios, cabʌlʌchix i yutslel a pusic'al.

¹⁴Jini cha'an jac'beñon coración come awujil coltaya. Loc'sañon ti' p'ʌtʌlel jini mu' bʌ i ts'a'leñoñob. Chucuyon loq'uel ti tam bʌ ja'.

¹⁵Mach a wʌc'on ti chʌmel ti but'ja'lel, Mach a cʌyon ti tam bʌ ja'. Mach a wʌc'on ti jilel ti mucoñibʌl.

¹⁶C Yum, jac'beñon, come cabʌl i yutslel a pusic'al. Sutq'uin a bʌ ba' añon come cabʌl a c'uxbiya.

¹⁷Mach a mʌybeñon a wut come a winicon. Woliyon ti wocol, jac'beñon ti ora.

¹⁸La' ti coltaya. Tojbeñon c mul cha'an mij colel. Loc'sañon ti' p'ʌtʌlel j contrajob.

¹⁹Awujil woli cʌ'lentel. Awujil quisintic jax woli' melbeñoñob. Woli' ts'a'leñoñob. Cʌmbil a cha'an pejtel j contrajob.

²⁰Wen ch'ijiyem c pusic'al cha'an a'lebilon. Comix chʌmel yubil. Tsac lon alʌ an majqui mi caj i p'untañon, an majqui mi' ñuq'uesʌbeñon c pusic'al. Pero ma'anic mi juntiquilic.

²¹Tsi' yʌq'ueyoñob veneno i wenta i bʌl c ñʌc'. Che' tiquin c ti' tsi' yʌq'ueyoñob vinagre.

²²La' jisʌnticob che' woli' ñaj'añob ti mesa. La' chujquicob ti yac jini lon ñʌch'ʌlo' bʌ i pusic'al.

²³La' yajpic i wut cha'an ma'anic mi' chʌn c'otel. Yom tsiltsilña i pusic'al ti pejtelel ora.

²⁴Pʌsbeñob a mich'ajel. Jisañob ti a mich'lel che' bajche' ti c'ajc.

²⁵La' jochtiyic i chumlib. Mach mi' chʌn ajñel winic ya'i.

²⁶Come jontol mi' tic'lañob a winic che' wola' wʌc' ti wocol. Mi' yutsi p'ojlesʌbeñob i wocol jini lowbilo' bʌ a cha'an.

²⁷La' aq'uenticob ti' wenta i mul. Mach a q'uelob ti toj ti pejtelel ora.

²⁸La' yajpic i c'aba' ti jun ba' otsʌbilob año' bʌ i cuxtʌlel. Mach yomic chucbil i c'aba' yic'ot i c'aba' jini tojo' bʌ.

²⁹Pero bʌjʌch c bʌ, cabʌl c wocol. La' c taj j coltʌntel ti a tojlel. Cha' xuc'chocobeñon c pusic'al.

³⁰Mi caj j c'ʌyiben i ñuclel Dios. Mi caj c suben wocolix i yʌlʌ cha'an uts'atax i pusic'al.

³¹Tijicña mi caj i yubin Dios, come jiñʌch yom bʌ i pusic'al. Ñumen mi' mulan bajche' yan tac bʌ i majtan anquese tat wacax yic'ot i yal.

³²Jini utso' bʌ i pusic'al mi caj i q'uelob. Jini cha'an tijicñayob. La' cha' p'ʌt'acob i pusic'al jini mu' bʌ i sajcañob Dios.

³³Come Dios mi' ñich'tan jini p'ump'uño' bʌ. Ma'anic mi' ts'a'len jini ñup'ulo' bʌ i cha'an.

³⁴La' i subob i ñuclel Dios pejtelel año' bʌ ti panchan yic'ot pañimil. La' i pʌs i ñuclel Dios jini ñajb yic'ot pejtel i bʌl.

³⁵Come Dios mi caj i coltan Sion. Mi caj i cha' wa'chocon jini tejclum tac ti Judá Cha'an ya' mi' chumtʌlob i winicob x'ixicob. Ma'anix mi caj i chilbentelob i lum.

³⁶Mi caj i yʌq'uentelob i winicob Dios yic'ot i p'olbal. Ya' mi caj i yajñelob jini mu' bʌ i c'uxbiñob i c'aba'.