Read Chol Salmos 7 Bible Online

Salmos 7 - Chol bible

Salmos 7

¹[2] C Yum Dios, tsa'ix cʌc'ʌ c bʌ ti a wenta. Coltañon loq'uel ti' tojlel jini mu' bʌ i yajñesañoñob,

²Ame mi' mil c'uxon j contra che' bajche' bajlum, Ame mi' tujc'añon majlel cha'an mi' bic'tesañon che' ma'anic majqui mi' coltañon.

³C Yum Dios, cʌmbil a cha'an ma'anic tsac cha'le iliyi. Ma'anic chuqui tsac tumbe.

⁴Ma'anic tsac sutq'uibe i jontolil jini uts bʌ i pusic'al. Ma'anic tsac chilbe i chubʌ'an j contra.

⁵Tsa'ic c cha'le bajche' iliyi, la' i yajñesañon j contra. La' i tajon, la' i pets' t'uchtañon ti lum.

⁶La'ix c Yum, yom ma' mich'len jini j contrajob woliyo' bʌ ti mich'ajel. Yomix ma' wa'tʌl a cha'len meloñel.

⁷La' i joyetob winicob x'ixicob. Yom ma' buchtʌl ti meloñel ya' ti chan.

⁸Meleyon, c Yum, cha'an c melbal. Pʌsbeñob toj bʌ c pusic'al.

⁹La' jilic i jontolil jini jontol bʌ. Coltan jini tojo' bʌ cha'an mi' chʌn melob chuqui toj. Come Dioset, tojet, wola' q'uelbeñon lojon c pusic'al yic'ot c ch'ujlel lojon.

¹⁰Dios jiñʌch mu' bʌ i coltañon. Mi' coltan jini toj bʌ i pusic'al.

¹¹Dios jiñʌch toj bʌ xmeloñel, Mich' Dios ti jujump'ejl q'uin.

¹²Mi ma'anic mi' sutq'uin i bʌ jini jontol bʌ, Dios mi caj i juc'ben i ñi' i yespada. Chajpʌbil i jalʌjb.

¹³Dios tsi' chajpa i te'el jalʌjb cha'an tsʌnsa. Tsi' mele lanza am bʌ i ñi' lajal bajche' i yat c'ajc.

¹⁴Che' bajche' mi' colel alʌl ti' ña', che' ja'el ti mucul jach mi' tejchel jontolil ti' pusic'al winicob. Che' bajche' mi' yʌc' alʌl ti pañimil x'ixic, che' ja'el mi' p'ojlesañob lot jini jontolo' bʌ.

¹⁵Mi' melob ch'en i wenta yac. Mi' top'ob lum, Mi' cha' yajlelob ochel ya' ba' tsi' top'oyob ch'en.

¹⁶Mi caj i cha' q'uextʌbentelob i maña tsa' bʌ i ña'tayob i mel, Mi caj i cha' q'uextʌbentelob i jontolil.

¹⁷Mi caj c suben c Yum wocolix i yʌlʌ cha'an tojʌch. Mi caj j c'ʌyiben i ñuclel lac Yum, jiñʌch i c'aba' jini C'ax Ñuc Bʌ.