Read Chol Salmos 71 Bible Online

Salmos 71 - Chol bible

Salmos 71

¹C Yum, tsa'ix cʌc'ʌ c bʌ ti a wenta. Mach a wʌc'on ti quisin.

²Loc'sañon ti' p'ʌtʌlel j contra come tojet. Coloyon ba' ñup'ulon. Yom ma' p'ison ti a wenta. Coltañon.

³La' c ñochtañet che' bajche' ch'entun ba' mi mejlel c chumtʌl ti pejtelel ora. Tsa' wʌc'ʌ a t'an. Mi caj a coltañon, Come p'ʌtʌl bʌ xajlelet c cha'an.

⁴C Dios, loc'sañon ti' p'ʌtʌlel jini jontolo' bʌ mach bʌ tojobic, mu' bʌ i tic'lañob i pi'ʌlob.

⁵Wolic pijtañet, c Yum Dios. Tsac ñopoyet c'ʌlʌl che' ch'itoñon to.

⁶Tsa' cʌntayon c'ʌlʌl che' cʌntʌbilon to i cha'an c ña'. Cha'an ti a p'ʌtʌlel tsa' cha' c'oc'a c ña' che' bʌ tsa quila pañimil. Mi caj c chʌn c'uxbiñet ti pejtelel ora.

⁷Mi' toj sajtelob i pusic'al cabʌlob cha'añon, Pero xuc'ulon cha'añet, come c chumlibet.

⁸Cabʌl mi caj c sub a ñuclel. C'ux mi cubiñet ti pejtelel q'uin.

⁹Mach a chocon che' ñoxonix. Mach a cʌyon che' ma'anix c p'ʌtʌlel.

¹⁰Come j contrajob mi' jop'beñon c mul. Mi' chijtañoñob. Mi' temob i t'an tij contra.

¹¹Mi' yʌlob: Cʌybilix ti Dios ili winic. Ajñesan, chucux. Ma'anic majqui mi caj i coltan, che'ob.

¹²Dios, mach a tʌts' a bʌ ba' añon. C Dios, ti ora jach yom ma' coltañon.

¹³Ac'ʌyob ti quisin mu' bʌ i contrajiñon. La' jisʌnticob. La' a'lenticob jini yomo' bʌ i tic'lañon. La' ts'a'lenticob.

¹⁴Pero joñon mi caj c pijtañet ti pejtelel ora. Ñumen mij c'uxbiñet wʌle bajche' ti yambʌ ora. Ñumen to mi caj j c'uxbiñet.

¹⁵Ti pejtelel ora mi caj c tsictesañet come tojet. Wen awujil coltaya. Mach mejlic ti tsicol a melbal.

¹⁶C Yum, mi caj c sub jini ñuc tac bʌ a melbal. Mi caj c chʌn sub a tojel, come jatet jach tojet.

¹⁷Dios, cʌntesʌbilon a cha'an c'ʌlʌl che' ch'itoñon to. C'ʌlʌl wʌle mic sub jini ñuc tac bʌ a melbal.

¹⁸Che' ñoxonix, che' sʌquix i tsutsel c jol, Dios, mach a cʌyon Jinto mij cʌntesan calobilob yic'ot i yalobilob mu' bʌ caj i tilelob cha'an mi' cʌñob a p'ʌtʌlel ti jujuntiquil.

¹⁹C'ʌlʌl ti' chañelal panchan tsa'ix a pʌsʌ a bʌ ti toj. Tsa'ix a pʌsʌ ñuc tac bʌ a melbal, Dios. ¿Majqui to lajal bajche' jatet?

²⁰Anquese tsa'ix a wʌq'ueyon lojon cabʌl tsʌts tac bʌ wocol Mux a cha' ac'on lojon ti cuxtiyel. Mux a cha' pʌyon lojon loq'uel ba' bʌbʌq'uen jax.

²¹Mux a cha' aq'ueñon c ñuclel. Mux a cha' ñuq'uesʌbeñon c pusic'al.

²²Mi caj c sub a ñuclel yic'ot música. Dios, mi caj c cha'lebeñet c'ay ti arpa cha'an i sujmlel a t'an, Come jatetʌch jini Ch'ujul Bʌ i cha'an Israel.

²³Tijicñayon che' mij c'ʌyibeñet c'ay. Tijicña c pusic'al cha'an tsa' tojbeyon c mul. Tsa' wʌc'ʌyon ti colel.

²⁴Belel ora mi caj c chʌn sub tojet, Come jini yomo' bʌ i tic'lañon tsa'ix ajq'uiyob ti quisin. Tsa'ix toj sajtiyob i pusic'al.