Read Chol Salmos 73 Bible Online

Salmos 73 - Chol bible

Salmos 73

¹Dios mi' pʌsbeñob i yutslel israelob. Isujm mi' pʌsbeñob i yutslel jini sʌc bʌ i pusic'al.

²Pero joñon tsa cʌlʌ cʌye' c ñopet. Colel tsa cʌlʌ yajlel. Mach xuc'ulic coc, colel i tʌjts'el.

³Tsac lon mulʌbe i wenlel jini mu' bʌ i chañ'esañob i bʌ Che' bʌ tsaj q'uele woli' p'ojlel i chubʌ'an jini jontolo' bʌ.

⁴Ma'anic mi' yubiñob wocol. Ch'ejlʌch i bʌc'tal.

⁵Ma'anic mi' yubiñob wocol bajche' yaño' bʌ winicob. Ma'anic mi' tic'lʌntelob che' bajche' i pi'ʌlob.

⁶Jini cha'an uts'atax mi' lon q'uelob i bʌ. Mi' chajpañob i pusic'al ti jontolil che' bajche' mi ch'ʌlob i bʌ ti ujʌl yic'ot bujcʌl.

⁷Ma'anic chuqui anto yom i cha'añob. But'ulob i pusic'al ti lolom tac bʌ.

⁸Mi' cha'leñob wajleya yic'ot a'leya. Mi' bʌc'tesañob i pi'ʌlob. Ch'ejlob i pusic'al mi' subob chuqui mi caj i melob.

⁹Mi' ts'a'leñob Dios. Mi' pucob ti pejtelel pañimil chuqui mi' lon ña'tañob.

¹⁰Jini i cha'año' bʌ Dios mi' lon ñopbeñob i t'an. Mi' toj sajtelob i pusic'al. Mi' jac'beñob i t'an che' bajche' mi' japob ja' che' tiquin i ti'.

¹¹Mi' lon alob: Mach yujilic Dios. ¿Bacan mi' p'isonla ti' wenta jini C'ax Ñuc Bʌ? lon che'ob.

¹²Che'ʌch mi' melob jini jontolo' bʌ. Mi' p'ojlesañob i chubʌ'an ti pañimil. Ma'anic majch mi' tic'ob.

¹³Tsa cʌlʌ lolom jach wolij cʌntan c pusic'al. Lolom jach mij cʌntan c bʌ cha'an mi cajñel ti sʌc.

¹⁴C'ʌlʌl mi' sʌc'an c'ʌlʌl mi' yic'an añʌch c tic'lʌntel. Mi cubin i ju'sʌntel c pusic'al ti jujump'ejl q'uin.

¹⁵Tsa'ic c subeyob a p'olbal chuqui tsac lon ña'ta tic pusic'al Tsa' sajtiyob cha'an c t'an.

¹⁶Che' bʌ tsac na'ta c ch'ʌmben isujm iliyi Wen wocol tsa cubi

¹⁷jinto tsa' ochiyon ti Ch'ujul bʌ Ajñibʌl i cha'an Dios. Ya'i tsac ña'ta chuqui mi caj i tajob jontolo' bʌ che' ti' jilibal.

¹⁸Isujm bʌbʌq'uen jax mi' yajlelob ya' ba' t'uchul i yoc. Mux a junyajlel jisañob.

¹⁹Ti ora jach mi' jilelob. Mi' bʌc' tilel jini bʌbʌq'uen tac bʌ.

²⁰Lajal i cuxtilel bajche' ñajal mu' bʌ i bʌc' ñajʌyel lac cha'an che' ch'ojyemonixla. Che' mi' ch'ojyelob, mi caj i ña'tañob i sujmlel.

²¹Che' bʌ tsac ch'ʌmbe isujm, wulwulña c pusic'al tsa cubi. Tsac cha'le tsic pusic'al.

²²Tsa' caji c ña'tan lajalon bajche' tonto bʌ mach bʌ anic i pusic'al. Lajalon ti a tojlel bajche' bʌte'el mach bʌ anic i ña'tʌbal.

²³Pero mach che'ic ma' q'uelon. Chʌn añon quic'otet ti pejtelel ora. Chucul a cha'an jini ñoj bʌ j c'ʌb.

²⁴Mi caj a chʌn toj'esañon majlel ti a t'an che' wʌ'to añon ti pañimil. Ti wi'il mi caj a pʌyon majlel ti panchan ba'an a ñuclel.

²⁵Cʌxti anic yambʌ mu' bʌ c ñop ti panchan. Com jach jatet ti pañimil, mach comic yambʌ.

²⁶Ma'anix i p'ʌtʌlel c bʌc'tal yic'ot c pusic'al. Pero Dios i p'ʌtʌlelʌch c pusic'al. C cha'añʌch ti pejtelel ora.

²⁷Q'uele bajche' mi' jilelob jini mu' bʌ i tʌts'ob i bʌ ba' añet. Mi caj a jisan pejtel mu' bʌ i cʌyet.

²⁸Pero joñon mic taj c wenlel che' mic ñochtan Dios. Tsa'ix c xuc'choco c bʌ ti lac Yum Cha'an mi mejlel c sub pejtelel i melbal.