Read Chol Salmos 77 Bible Online

Salmos 77 - Chol bible

Salmos 77

¹Mic chʌn pejcan Dios ti c'am bʌ t'an. Cujil mux i ñich'tʌbeñon.

²Tsac sajca Dios che' bʌ tsa cubi wocol. Ti ac'ʌlel tsac letsa j c'ʌb ti oración. Ma'anic tsa' lujbayon. Ma'anic tsac jac'ʌ i ñuq'uesʌntel c pusic'al.

³Tsac ña'ta Dios che' wen ch'ijyem c pusic'al. Ba' ora com c ch'ʌmben isujm mic lujb'an.

⁴Ma'anic ma' wʌc'on ti wʌyel, cañal c wut. Mach mejlicon ti t'an cha'an tsic pusic'al.

⁵Mic ña'tan chuqui tac tsa' ujti wajali, Che' cuxulob to c ñojte'el.

⁶Mic ña'tan c'ay ti ac'ʌlel. An cabʌl chuqui mic ña'tan tic pusic'al. Mic cha'len wersa c ch'ʌmben isujm.

⁷¿Tsa' ba i junyajlel cʌyʌyon c Yum? ¿Mach ba anix mi caj i cha' pʌsbeñon i yutslel i pusic'al?

⁸¿Tsa ba i junyajlel cʌyʌ i c'uxbiñon ti' yutslel i pusic'al? ¿Tsa' ba i junyajlel cʌyʌ i pejcan winicob?

⁹¿Tsa' ba ñajiyi ti' pusic'al i pʌs i yutslel Dios? ¿Tsa' ba i cʌyʌ i p'untañonla cha'an mich'?

¹⁰Tsac lon alʌ jiñʌch i c'unlel c bʌc'tal. Jini cha'an mach lajalix yubil wʌle i p'ʌtʌlel jini C'ax Ñuc Bʌ.

¹¹Mi caj c ña'tan i melbal lac Yum. Mic ña'tan i yejtal i p'ʌtʌlel tsa' bʌ i pʌsʌ wajali.

¹²Mi caj c ña'tan tic pusic'al pejtel tsa' bʌ a mele. Mi caj c ch'ʌm tic wenta pejtel jini ñuc tac bʌ a melbal.

¹³Dios, ma' tsictesan a bʌ ti ch'ujul bʌ a we'tel. Ma'anic yambʌ Dios ñuc bʌ che' bajche'et.

¹⁴Jatet jach, Dios, ma' pʌs i yejtal tac a p'ʌtʌlel. Tsa'ix a pʌsbeyob a p'ʌtʌlel winicob x'ixicob ti pejtelel lum.

¹⁵Tsa' mʌñʌ a cha'año' bʌ yic'ot a p'ʌtʌlel. Jiñobʌch i p'olbal Jacob yic'ot i p'olbal José.

¹⁶Dios, che' bʌ tsa' mʌñʌ i p'olbal Jacob ya' bʌ añob ti colem ñajb, Jini ja' tsi' q'ueleyet yilal. Lʌmuña tsi' ñijca i bʌ. Tsiltsilña tsi' mele i bʌ jini tam bʌ ja'.

¹⁷Jini tocal tsi' bajbe ja'al. Wen c'am tsi' cha'le t'an jini chajc ti panchan. Sʌplaw tsi' mele i bʌ jini chajc.

¹⁸Ya' ti sutujt ic' tsi' cha'le t'an chajc. Tsa' sʌc'a pañimil cha'an i c'ʌc'al chajc. Tsi' ñijca i bʌ pañimil, tsi' yujcu i bʌ.

¹⁹Tsa' pʌsbeyon lojon a bijlel ti colem ñajb. Jini alʌ bij a cha'an an ti colem ja' yilal. Mach tsiquilic i yejtal a woc ti bij.

²⁰Ti' c'ʌb Moisés yic'ot ti' c'ʌb Aarón Tsa' pʌyʌ majlel a cha'año' bʌ che' bajche' tiñʌme'.