Read Chol Salmos 78 Bible Online

Salmos 78 - Chol bible

Salmos 78

¹Winicob x'ixicob c cha'añet bʌ la, jac'ʌla j cʌntesʌbal. Ch'ʌmʌla ti la' wenta chuqui wolic subeñetla.

²Mi caj c subeñetla t'an ti lajiya. Mi caj c tsictesʌbeñetla i sujmlel.

³Tsi' cʌntesayonla lac tat. Cʌmbilix lac cha'an Come tsa'ix la cubi, tsa'ix lac ñopo.

⁴Mach la comic mi' ñajʌyel ti' pusic'al la calobilob. Mux lac subeñob cha'an mi' cʌñob i ñuclel lac Yum, Yic'ot i p'ʌtʌlel, yic'ot jini bʌbʌq'uen tac bʌ i melbal.

⁵Lac Yum tsi' yʌq'ue Jacob xuc'ul bʌ i t'an. Tsi' yʌq'ue i ley Israel. Tsi' subeyob lac tatob cha'an mi' cha' subeñob i yalobilob

⁶Cha'an mi laj cʌmben i t'an, cha'an mi laj cʌntesan la calobilob, Cha'an mi' cʌñob ja'el jini alʌlob maxto bʌ anic tsi' yilayob pañimil, Cha'an mi' subeñob i yalobilob ja'el,

⁷Cha'an mi' laj ñopob Dios. Che' jini ma'anic mi' ñajʌyelob ti' pusic'al i melbal Dios. Pero mi' chʌn jac'beñob i mandar.

⁸Mach yomic lajalob bajche' i tatob. Tsʌts i pusic'al i tatob, tsi' ñusʌbeyob i mandar Dios. Mach xuc'ulic i pusic'alob yic'ot Dios.

⁹Jini ch'oyolo' bʌ ti Efraín añob i jalʌjb, Pero tsa' puts'iyob majlel che' ti' yorajlel guerra.

¹⁰Ma'anic tsi' jac'ʌyob jini xuc'ul bʌ i t'an Dios. Tsi' ñusʌbeyob i mandar.

¹¹Tsa' ñajiyiyob ti' pusic'al i melbal yic'ot i yejtal tac i p'ʌtʌlel Dios tsa' bʌ i pʌsbeyob.

¹²Uts'atax i yejtal i p'ʌtʌlel tsa' bʌ i pʌsbeyob lac tatob Ti jini lum Egipto ya' ti Zoán.

¹³Tsi' cala jini colem ñajb. Tsi' pʌyʌyob c'axel. Tsi' yʌc'ʌ ti cʌytʌl jini ja' che' bajche' bujtʌl.

¹⁴Che' ti q'uiñil tsi' c'ʌñʌ tocal i pʌyob majlel. Che' bʌ tsa' ic'a c'ʌlʌl tsa' sʌc'a tsi' c'ʌñʌ c'ajc i tsictesʌbeñob i bijlel.

¹⁵Tsi' jawʌ tac xajlel ya' ti colem bʌ i tiquiñal pañimil. Tsi' yʌq'ueyob i jap ja' lajal bajche' i ya'lel aban.

¹⁶Tsi' yʌc'ʌ ti loq'uel ja' ti xajlel che' bajche' colem ja'.

¹⁷Anquese cabʌl tsi' pʌsbeyob i yutslel Dios, tsi' chʌn cha'leyob mulil lac ñojte'elob ti' contra lac Yum. Tsi' ñusʌbeyob i mandar jini C'ax Ñuc Bʌ ya' ti tiquin bʌ lum.

¹⁸Tsi' yilʌbeyob i pusic'al Dios che' ma'anic tsi' ñopoyob. Tsi' c'ajtibeyob we'elʌl cha'an cabʌl i wo'lel.

¹⁹Tsi' yʌ'leyob Dios, tsi' yʌlʌyob: ¿Mejl ba i yʌq'ueñonla Dios i bʌl lac ñʌc' wʌ' ti tiquin bʌ lum? che'ob.

²⁰Awilan, che' bʌ tsi' jats'ʌ xajlel, tsa' loq'ui ja'. Wen cholocña tsa' loq'ui. Tsi' yʌlʌyob: ¿Mejl ba i yʌq'ueñonla waj yic'ot we'elʌl cha'an mi laj c'ux? che'ob.

²¹Jini cha'an tsa' mich'a lac Yum che' bʌ tsi' yubi iliyi. Tsi' ña'ta wersa mi caj i toj i mul Israel. Cabʌl tsa' mich'a lac Yum.

²²Come ma'anic tsi' ñopoyob Dios. Ma'anic tsi' ñopoyob jini yujil bʌ coltaya.

²³Dios tsi' yʌq'ue mandar jini tocal am bʌ ti chan. Tsi' jambe i ti' panchan yilal.

²⁴Tsa' jubi tilel maná che' bajche' ja'al. Tsi' yʌq'ueyob i bʌl i ñʌc' ch'oyol bʌ ti panchan.

²⁵Winicob x'ixicob tsi' c'uxuyob maná che' bajche' i waj ángelob. On tsi' chocbeyob tilel i bʌl i ñʌc'.

²⁶Tsi' choco tilel ic' ti panchan tilem bʌ ba' mi' pasel q'uin. Cha'an ti' p'ʌtʌlel tsi' choco tilel ic' tilem bʌ ti sur.

²⁷Tsa' jubi tilel we'elʌl che' bajche' i ts'ubeñal lum, Yic'ot mut che' bajche' i ji'il colem ñajb.

²⁸Tsi' yʌc'ʌ ti yajlel mut ti ojlil ba' chumulob.

²⁹Jini xchumtʌlob tsi' c'uxuyob. Tsa' ñaj'ayob Come Dios tsi' chocbeyob jubel cha'an i wo'lel.

³⁰Che' wo'ob ti we'elʌl, Che' woli to i c'uxob,

³¹Dios tsa' caji i contrajiñob ti' mich'ajel. Tsi' tsʌnsa jini ch'ejlo' bʌ. Tsi' jisa jini ch'iton bʌ winicob año' bʌ ti Israel.

³²Pero ma'anic tsi' p'isiyob ti' wenta. Tsi' chʌn cha'leyob mulil. Ma'anic tsi' ñopoyob jini wen uts'at tac bʌ i melbal.

³³Jini cha'an Dios tsi' yʌc'ʌyob ti wocol. Tsi' ñusayob q'uin ti bʌbʌq'uen tac bʌ.

³⁴Che' woli' jisañob Dios, tsa' caji i sʌclañob. Tsi' cha' sutq'uiyob i bʌ ba'an Dios. Tsa' caji i sʌclañob ti jump'ejl i pusic'al.

³⁵Tsi' ña'tayob tilem jach ti Dios i coltʌntelob. Jini C'ax Ñuc Bʌ Dios jiñʌch tsa' bʌ i mʌñʌyob.

³⁶Uts'atax tsi' pejcayob Dios, jini lac tatob, Pero lotiya jach.

³⁷Come tilel bixel i pusic'al ti' tojlel Dios. Mach xuc'ulic i t'an tsa' bʌ i wa'chocoyob.

³⁸Pero Dios tsi' p'untayob. Tsi' ñusʌbeyob i mul. Ma'anic tsi' laj jisayob. Cabʌl tsi' tiq'ui i bʌ che' bʌ tsi' mich'leyob.

³⁹Dios tsi' ña'ta c'uñob winicob yic'ot i bʌc'tal. Lajalobʌch bajche' ic' mu' bʌ i ñumel. Ma'anic mi' cha' tilel.

⁴⁰Pero cabʌl tsi' chʌn ñusʌbeyob i t'an Dios ya' ti colem bʌ i tiquiñal pañimil. Tsi' techbeyob i ch'ijiyemlel i pusic'al Dios.

⁴¹Cabʌl tsi' yilʌbeyob i pusic'al Dios. Tsi' techbeyob i mich'ajel jini Ch'ujul Bʌ i Dios Israel.

⁴²Ma'anic tsi' chʌn ña'tayob i melbal ti jini q'uin che' bʌ tsi' pʌyʌyob loq'uel ti' p'ʌtʌlel i contrajob.

⁴³Tsa' ñajʌyiyob i cha'an i yejtal tac i p'ʌtʌlel ya' ti Egipto, Yic'ot jini bʌbʌq'uen tac bʌ ya' ti' jamil Zoán.

⁴⁴Tsi' pʌntesa jini colem ja' tac ti ch'ich'. Ma'anic tsa' mejli i japob jini ja' am bʌ ti pa'.

⁴⁵Tsi' choco tilel jomjomña bʌ jaj tsa' bʌ i c'uxuyob. Tsi' choco tilel xpequejc tsa' bʌ i jisayob.

⁴⁶Tsi' choco tilel motso' tsa' bʌ i jisa cholel, Yic'ot sajc' tsa' bʌ i jisa pʌc'ʌbʌl i cha'añob.

⁴⁷Tsi' jisa ts'usubil ti t'uñul bʌ tunija'. Tsi' jisa higuerajil ti' ña'al tsʌñal.

⁴⁸Jini t'uñul bʌ tuñija' tsi' lowbeyob i wacax. Jini chajc tsi' pulbeyob i yʌlac'.

⁴⁹Dios tsi' wen mich'le jini año' bʌ ti Egipto. Tsi' chocbeyob tilel cabʌl wocol yic'ot ch'ijiyem bʌ ti' wenta espíritujob yujilo' bʌ jisaya.

⁵⁰Cʌlʌx jax tsa' tili i mich'ajel Dios. Ma'anic tsi' p'unta jini egiptojob. Tsi' jisayob ti c'amʌjel.

⁵¹Tsi' tsʌnsa pejtelel jini ascuñʌlo' bʌ ti jujump'ejl xchumtʌl am bʌ ti' lumal Egipto.

⁵²Pero tsi' pʌyʌ loq'uel i cha'año' bʌ che' bajche' tiñʌme'. Motmotña tsi' pʌyʌyob ñumel ti tiquin bʌ lum.

⁵³Xuc'ul tsi' pʌyʌ i cha'año' bʌ. Ma'anic tsi' cha'leyob bʌq'uen. Pero tsi' jisʌbeyob i contrajob ti colem ñajb.

⁵⁴Dios tsi' pʌyʌyob tilel ti' ti' ch'ujul bʌ lum, C'ʌlʌl ti jini bujtʌl tsa' bʌ i chili yic'ot ñuc bʌ i p'ʌtʌlel.

⁵⁵Tsi' choco loq'uel jini ya' bʌ chumulob ti ñaxan. Tsi' t'oxbeyob lum jini israelob. I cha'añobix tsa' majli. Tsi' yʌq'ueyob i lum ba' mi' chumtʌlob ti mojt ti mojt.

⁵⁶Pero jontolob ajñel. Tsi' yilʌbeyob i pusic'al jini C'ax Ñuc Bʌ Dios. Tsi' techbeyob i mich'ajel. Ma'anic tsi' jac'beyob i t'an.

⁵⁷Tsi' cʌyʌyob Dios lajal bajche' i tatob mach bʌ anic tsi' ñopoyob. Xlotob che' bajche' ts'otol metel bʌ jalʌjb.

⁵⁸Tsi' techbeyob i mich'ajel Dios, come tsi' meleyob i yotlel tac dioste'. Ts'a' tsi' q'uele Dios i dioste' tac.

⁵⁹Dios tsi' q'uele, tsa' mich'a. Tsi' wen ts'a'le' israelob.

⁶⁰Jini cha'an tsi' cʌyʌ jini Ch'ujul bʌ Ajñibʌl am bʌ ti Silo, ba' tsa' chumle yic'otob.

⁶¹Tsi' yʌc'ʌ jini Arca* ti' wenta yambʌ tejclum. Jini Arca ba' tsi' tsictesa i p'ʌtʌlel yic'ot i ñuclel tsa' cʌle ti' tojlel i contrajob.

⁶²Dios tsi' yʌc'ʌ i cha'año' bʌ ti' c'ʌb i contrajob tsa' bʌ i tsʌnsayob ti espada. Tsi' mich'le i cha'año' bʌ.

⁶³Jini ch'iton bʌ winicob tsa' chʌmiyob ti c'ajc. Ma'anic tsi' cha'leyob ñujpuñijel jini xch'ocob.

⁶⁴Tsa' tsʌnsʌntiyob i motomajob ti espada. Jini xmeba'ob i cha'an ma'anic tsi' yuc'tayob.

⁶⁵Tsa' ch'ojyi lac Yum che' bajche' juntiquil tsa' bʌ ujti ti wʌyel, Che' bajche' juntiquil tsa' bʌ ch'ejl'a cha'an vino.

⁶⁶Tsi' yajñesa i contrajob. Tsi' yʌc'ʌyob ti quisin.

⁶⁷Tsi' ts'a'le i p'olbal José. Ma'anic tsi' yajca Efraín.

⁶⁸Pero tsi' yajca i p'olbal Judá tsa' bʌ i c'uxbi, Ya' bʌ chumulob ti wits i c'aba' Sion.

⁶⁹Chan tsi' mele ch'ujul bʌ i yajñib ti pam wits. Xuc'ul tsi' mele che' bajche' tsi' wa'choco pañimil cha'an mi' yajñel ti pejtelel ora.

⁷⁰Lac Yum tsi' yajca David, i winic. Tsi' pʌyʌ loq'uel ti corral ba'an tiñʌme'.

⁷¹Tsi' pʌyʌ che' woli' cʌntan i ña'al tac tiñʌme', Cha'an mi' cʌntʌben i tiñʌme' Dios, Cha'an mi' cʌntan israelob come, i cha'añobʌch.

⁷²Tsi' wen cʌntayob ti' xuc'tilel i pusic'al, Tsi' toj'esayob majlel ti cabʌl i ña'tʌbal.