Read Chol Salmos 84 Bible Online

Salmos 84 - Chol bible

Salmos 84

¹I Yumet bʌ Panchan yic'ot Pañimil, I t'ojol jax a Templo.

²C Yum, cabʌl mij c'uxbin a wajñib ba' com c ch'ujutesañet. Wen tijicña c pusic'al che' mij c'ʌyiñet, come cuxul bʌ Dioset.

³Jini xpuruwoc yic'ot jini x'ajlum tsi' mele tac i c'u' cha'an mi yʌc' i yal. Ya'ʌch an ti pulʌntib tac a cha'an, i Yumet bʌ Panchan yic'ot Pañimil. Reyet c cha'an, c Dioset.

⁴Tijicñayob jini mu' bʌ i chumtʌlob ti a wotot. Mi caj i subob a ñuclel ti pejtelel ora.

⁵Tijicñayob mu' bʌ i tajob i p'ʌtʌlel ti a tojlel, Mu' bʌ i xʌñob majlel a bijlel.

⁶Tijicñayob mu' bʌ i tajob cuxul bʌ ja' ya' ti joctʌl che' mi' ñumelob majlel ba' mi' cha'leñob uq'uel. Mi' yajlel jubel i yutslel Dios che' bajche' ja'al mu' bʌ i yʌch'esan lum cha'an mi' yax'an.

⁷Mux i yʌq'uentelob i p'ʌtʌlel che' mi' majlelob, Jinto mi' c'otelob ba'an Dios ya' ti Sion.

⁸Dios, i Yumet bʌ Panchan yic'ot Pañimil, ubibeñon coración. I Dioset bʌ Israel ñich'tʌbeñon.

⁹Dios, c Mʌctʌjibet lojon, ma' coltañon lojon. Pʌsben a wutslel jini rey yajcʌbil bʌ a cha'an.

¹⁰Come uts'at jump'ejl q'uin ya' ti mal a Templo. Mach uts'atic jump'ejl mil q'uin ti jumpat. Uts'at mi tsa' wʌq'ueyon j cʌntʌben i ti' a wotot c Dios. Mach uts'atic mi chumulon ti' yotot jontolo' bʌ.

¹¹Come lac Yum Dios lac Mʌctʌjibʌch, lac Sʌclelʌch. Lac Yum mi' p'untañonla. Mi' yʌq'ueñonla lac ñuclel. Mux i yʌq'uentelob chuqui tac uts'at jini sʌco' bʌ i pusic'al.

¹²I Yumet bʌ Panchan yic'ot Pañimil, tijicña jini xuc'ul bʌ i pusic'al ti a tojlel.