Read Chol Salmos 85 Bible Online

Salmos 85 - Chol bible

Salmos 85

¹C Yum, tsa'ix a pʌsbe a lumal i yutslel a t'an. Tsa'ix a loc'sa Israel ba' cʌchʌl ti yambʌ lum. Tsa'ix a cha' pʌyʌ tilel.

²Tsa'ix a ñusʌbe i mul a cha'año' bʌ. Tsa'ix a mucbeyob pejtelel i mul.

³Tsa' lajmi a mich'ajel. Tsa' cʌyʌ a mich'leñob.

⁴Cha' p'ʌtesañon lojon, Dios caj Coltaya lojon. Cʌyʌx a mich'leñon lojon.

⁵¿Mu' ba caj a chʌn mich'leñon lojon ti pejtelel ora? ¿Mu' ba caj a mich'len calobilob yic'ot i yalobilob?

⁶¿Mach ba awomic a cha' ch'ejlesʌbeñon lojon c pusic'al Cha'an tijicña mi yubiñob a cha'año' bʌ ti a tojlel?

⁷C Yum, pʌsbeñon lojon a wutslel. Coltañon lojon.

⁸Mi caj c ñich'tan che' mi' pejcañon Dios lac Yum. Mi caj i yʌq'ueñob i ñʌch'tilel i pusic'al i cha'año' bʌ, Ame i cha' tʌts'ob i bʌ che' bajche' tontojo' bʌ.

⁹Isujm, lʌc'ʌl an i coltʌntel jini mu' bʌ i bʌc'ñañob lac Yum Cha'an mi' cʌjñel i ñuclel Dios wʌ' ti lac lumal.

¹⁰Temel tsa' tsictiyi i yutslel i pusic'al Dios yic'ot i sujmlel. Temel tsa' tsictiyi ja'el i tojel yic'ot i ñʌch'tilel i pusic'al.

¹¹Wʌ' ti pañimil mi caj i tsictiyel i sujmlel Dios. Jini toj bʌ i pusic'al am bʌ ti panchan uts'at mi caj i q'uelonla.

¹²Isujm, lac Yum mi caj i yʌc' chuqui tac uts'at. Mi caj i yʌq'uen i wut lac pʌc'ʌbʌl.

¹³Mi caj i toj'esañonla majlel ti toj bʌ i pusic'al. Ñaxan mi' majlel cha'an mi' pʌsbeñonla jini bij.