Read Chol Salmos 88 Bible Online

Salmos 88 - Chol bible

Salmos 88

¹C Yum Dios, xColtayajet c cha'an. Ti q'uiñil yic'ot ti ac'ʌlel mic pejcañet ti wocol t'an.

²La' c'otic coración ba' añet. Ñich'tʌbeñon chuqui mic subeñet.

³Woli cubin cabʌl wocol. Mach jalix mi caj c chʌmel.

⁴Mi' q'ueloñob che' bajche' chʌmen bʌ, Che' bajche' winic mach bʌ anix i p'ʌtʌlel.

⁵Cʌybilonix che' bajche' chʌmeño' bʌ, Che' bajche' jini tsʌnsʌbilo' bʌ ti espada ya' bʌ ñololob ti mucoñibʌl Ba' ñajiyemobix ti a pusic'al. Ma'anix ma' chʌn coltañob.

⁶Chocbilonix ti tam bʌ ch'en, ti ic'chipan bʌ pañimil ti colem aban yubil.

⁷Wocol jax mi cubin cha'an tsa' mich'leyon. Wola' teñon yilal ti yebal jini wʌlʌcña bʌ ja' a cha'an.

⁸Tsa' tʌts'ʌ j cʌñʌyo' bʌ. Mach yomobix i chʌn pejcañon. Mach mejlicon ti puts'el come joy ñupulon.

⁹Wolix ti yajpel c wut cha'an i ch'ijiyemlel c pusic'al. C Yum, mic pejcañet ti wocol t'an ti jujump'ejl q'uin, Mic letsan j c'ʌb ba' añet ti oración.

¹⁰¿Mu' to ba a pʌsbeñob i yejtal a p'ʌtʌlel jini chʌmeño' bʌ? ¿Mu' ba mejlel i cha' ch'ojyelob jini chʌmeño' bʌ cha'an mi' subob a ñuclel?

¹¹¿Mu' ba i subob a wutslel ti mucoñibʌl? ¿Mu' ba i subob i sujmlel a t'an ya' ti' yajñib chʌmeño' bʌ?

¹²¿Mu' ba i cʌñob p'ʌtʌl bʌ a melbal ya' ti ic'yoch'an bʌ pañimil? ¿Mu' ba i cʌñob toj bʌ a pusic'al jini chumulo' bʌ ba' ma'anix chuqui mi' chʌn ña'tañob?

¹³C Yum, mic pejcañet ti wocol t'an. Ti jujump'ejl sʌc'ajel mi' c'otel coración ya' ba' añet.

¹⁴C Yum, ¿chucoch wola' ñusañon? ¿Chucoch wola' mʌybeñon a wut?

¹⁵Bʌbʌq'uen mic chʌmel. Ts'a'lebilon C'ʌlʌl che' ch'itoñon to. Wolic chʌn p'ulben jini wocol mu' bʌ a pʌsbeñon. Ma'anic c pusic'al yubil.

¹⁶Tsa'ix i tajayon a mich'ajel. Woli' jisañon jini bʌbʌq'uen tac bʌ mu' bʌ a choc tilel.

¹⁷C'ʌlʌl mi' sʌc'an c'ʌlʌl mi' yic'an mi' joy teñon che' bajche' ja'.

¹⁸Tsa'ix a tʌts'ʌ ba' añon c pi'ʌl yic'ot j cʌñʌyo' bʌ. Añon tic bajñelil ti tam bʌ ac'ʌlel.