Read Chol Salmos 9 Bible Online

Salmos 9 - Chol bible

Salmos 9

¹C Yum, mi caj c subeñet wocolix a wʌlʌ ti pejtelel c pusic'al. Mi caj c sub pejtel ñuc tac bʌ a melbal.

²Tijicña mi caj cubin, mi caj c ñuq'uesan c pusic'al ti a tojlel. Mi caj j c'ʌyin i ñuclel a c'aba', jatet C'ax Ñuquet Bʌ.

³Che' bʌ tsa' pujquiyob j contrajob Tsa' yajliyob. Tsa' jiliyob ti a tojlel.

⁴Come tsa' pʌsʌ ti toj chuqui wolic mel. Buchulet ti a yumʌntel. Toj wola' cha'len meloñel.

⁵Tsa'ix a wʌ'le jini tejclum tac mach bʌ a cha'añobic. Tsa'ix a jisa jini jontolo' bʌ. Tsa'ix a junyajlel yʌpbeyob i c'aba'.

⁶Tsa' jiliyob laj contrajob. Jejmenix i tejclum tac tsa' bʌ a jisa. Ma'anix mi' chʌn ña'tʌntelob.

⁷Lac Yum mi caj i yajñel ti pejtelel ora. Tsa'ix i chajpa i buchlib cha'an meloñel.

⁸Toj mi caj i mel jini año' bʌ ti pañimil.

⁹Lac Yum mi' wen q'uel jini tic'lʌbilo' bʌ. Lajalʌch lac Yum bajche' melbil bʌ ts'ajc ba' mi mejlel ti ochel jini woli bʌ ti bʌq'uen.

¹⁰Pejtel mu' bʌ i cʌñetob mi' yʌc'ob i bʌ ti a wenta. Come jatet, c Yum, ma'anic tsa' cʌyʌ mi junyajlic jini mu' bʌ i sajcañet.

¹¹C'ʌyinla i ñuclel lac Yum chumul bʌ ti Sion. Subula i melbal lac Yum ti' tojlel winicob x'ixicob.

¹²Come Dios mi' q'uextan tsʌnsa. Mi' ña'tʌben i ch'ich'el jini tsʌnsʌbilo' bʌ. Ma'anic mi' ñajʌyel ti' pusic'al Dios i yuq'uel jini tic'lʌbilo' bʌ.

¹³C Yum, pʌsbeñon i yutslel a pusic'al, Q'uele bajche' woli cubin wocol cha'an woli' ts'a'leñoñob. Jatet ma' coltañon che' colelix c chʌmel

¹⁴Cha'an mic pʌs pejtelel a ñuclel Ya' ti' ti' jini c'uxbibil bʌ Jerusalén Che' tijicña c pusic'al cha'an j coltʌntel.

¹⁵Jini mach bʌ i cha'añobic Dios tsa' cha' wʌlʌc yajliyob ti jini jach bʌ ch'en tsa' bʌ i lon top'oyob. Tsa' chujqui i yoc ti yac tsa' bʌ i lon ac'ʌyob.

¹⁶Lac Yum mi' tsictesan i bʌ che' mi' cha'len meloñel. Mi' chujquelob jini jontolo' bʌ ti' melbal i c'ʌb. Wen ña'tanla.

¹⁷Mi caj i chojquelob ochel jini jontolo' bʌ ti' yajñib chʌmeño' bʌ Yic'ot pejtel colem tejclum tac mu' bʌ i sʌtob Dios ti' pusic'al.

¹⁸Anquese p'ump'un jini pobre wʌle, mach ti junyajlelic cʌybil. Anquese maxto i tajayobic chuqui tac yomob jini tic'lʌbilo' bʌ, mach ti pejtelelic ora mi caj i pijtanob.

¹⁹C Yum, pʌsʌ a p'ʌtʌlel ti' tojlel winicob ame mi' cha'leñob bajche' jach yom i bajñel pusic'al. Wets'eyob tilel ti meloñel jini mach bʌ a cha'añobic ti pejtelel lum.

²⁰C Yum, la' i cha'leñob bʌq'uen. La' i ña'tañob ti jujumpejt colem tejclum winicob x'ixicob jach. Poj jumuc' jach añob.