Read Chol Salmos 90 Bible Online

Salmos 90 - Chol bible

Salmos 90

¹C Yum, c chumlibet lojon c'ʌlʌl ti wajali. Che' maxto anic tsa' mele colem wits, Che' maxto anic tsa' mele jini lum yic'ot pañimil, Diosetʌch. C'ʌlʌl wajali c'ʌlʌl ti pejtelel ora, Dioset.

³Mi' sujtel ti ts'ubejn winic che' ma' wʌc' a t'an.

⁴Lajal ma' q'uel jump'ejl mil jab che' bajche' jump'ejl q'uin tsa'ix bʌ ñumi. Lajalʌch bajche' cha'p'ejl uxp'ejl ora ti ac'ʌlel.

⁵Ma' pʌy majlel winicob x'ixicob che' bajche' ti but'ja'. Xñumelob jach che' bajche' lac ñajal.

⁶Lajalobʌch bajche' jam mu' bʌ i pasel che' mi' sʌc'an pañimil. Che' mi' yic'an pañimil tsepbilix, tiquinix.

⁷Come jisʌbilonix lojon cha'an ti a mich'ajel. Tsiltsilñayon lojon ti bʌq'uen cha'an a mich'ajel.

⁸Tsa'ix a q'uelbeyon lojon c mul. Tsa'ix a tsictesa yic'ot a c'ʌc'al jini mʌcʌl bʌ c mul lojon.

⁹Ti ora jach mi' ñumel j q'uiñilel lojon come mich'et. Mi' ñumel jini c jabilel lojon yic'ot ajcʌn.

¹⁰I ñajtlel lojon c jabilel jiñʌch lujump'ejl i chʌnc'al (70). Mi p'ʌtʌlon lojon, mic taj lojon chʌnc'al jab. Mic ñusan lojon tsʌts tac bʌ e'tel yic'ot wocol. Mi' jilel lojon c jabilel ti ora. Mic chʌmel lojon.

¹¹¿Majqui mi' lu' cʌn i p'ʌtʌlel a mich'ajel? ¿Majqui mi' bʌc'ñañet cha'an cabʌl a mich'ajel?

¹²Cʌntesañon lojon cha'an mic ña'tan lojon ma'anic jayp'ejl lojon j q'uiñilel Cha'an mic taj cabʌl lojon c pusic'al.

¹³La' c Yum. Cha' q'ueleyon lojon ti' yutslel a pusic'al. ¿Baqui ora mi caj a p'untan a winicob?

¹⁴La' jastiyicon lojon ti a wutslel ti jujump'ejl sʌc'ajel. Che' jini mux c cha'len lojon c'ay, tijicñayon lojon ti pejtelel q'uin c'ʌlʌl mic ñox'an lojon.

¹⁵Aq'ueñon lojon i tijicñʌyel c pusic'al che' bajche' c'amel tsa' wʌq'ueyon lojon wocol, Che' bajche' c'amel tsa cubi lojon jini bʌbʌq'uen bʌ.

¹⁶Pʌsbeñob a melbal a winicob. La' tsictiyic a ñuclel ti' tojlel i yalobilob.

¹⁷La' i ch'ʌlonla lac Yum Dios ti' yutslel i pusic'al. Isujm, la' i xuc'chocoñonla ti jini e'tel woli bʌ lac mel.