Read Chol Proverbios 13 Bible Online

Proverbios 13 - Chol bible

Proverbios 13

¹Jini ch'iton am bʌ i pusic'al mi' yubiben i cʌntesa i tat. Jini sts'a'leya ma'anic mi' jac' i tic'ol.

²Jini mu' bʌ i cha'len cʌntesa ti uts'at tijicñayʌch cha'an i chobejtʌbal i ye'tel. Jini mu' bʌ i cha'len jontolil tijicña cha'an i jontolil.

³Jini mu' bʌ i cʌntan i yej mi' cʌntan i cuxtʌlel. Jini mu' bʌ ti putun t'an mi caj i yubin wocol.

⁴Jini ts'ubo' bʌ ma'anic mi' tajob chuqui yom i pusic'al. Jini bʌxo' bʌ on mi' tajob chuqui tac yomob.

⁵Jini tojo' bʌ mi' ts'a'leñob lot, pero jini jontolo' bʌ quisintic jax chuqui tac mi' melob.

⁶Cʌntʌbilob jini tojo' bʌ ti toj bʌ i bijlel, pero mi caj i jilelob jini i xmulilob cha'an i jontolil.

⁷An mu' bʌ i ña'tañob ochel ti rico, pero ma'anic chuqui mi' tajob. An mu' bʌ i yochelob ti pobre pero wen ricojobʌch.

⁸Jini rico mi' yʌc' i bʌ ti colel cha'an cabʌl i chubʌ'an, pero ma'anic majch mi' tic'lan jini pobre.

⁹An i c'ʌc'al jini tojo' bʌ ti pejtelel ora, pero mi' caj ti yajpel i c'ʌc'al jini sajtemo' bʌ.

¹⁰Isujm mi' tech leto jini mu' bʌ i chañ'esan i bʌ, pero jini weño' bʌ i pusic'al mi' yubiñob i toj'esʌntel.

¹¹I xujch' xjontolil mi' cha' sajtel, pero mi' yoñ'an i chobejtʌbal jini bʌxo' bʌ ti e'tel.

¹²Che' jal mi' tilel lac pijtaya wocol jax mi lac pijtan. Che' mi' tilel chuqui la com lajalʌch bajche' cuxul bʌ te' mu' bʌ i yʌq'ueñonla laj cuxtʌlel.

¹³Jini mu' bʌ i ts'a'len i cʌntesʌntel anix ti' wenta. Mux i toj. Pero jini mu' bʌ i jac' jini mandar mi caj i yʌq'uentel i majtan.

¹⁴I cʌntesʌbal jini wen bʌ i ña'tʌbal lajalʌch bajche' i loq'uib ja' ba' mi lac taj laj cuxtʌlel, cha'an mi lac chijlel loq'uel ti wocol.

¹⁵Mi lac taj laj c'uxbintel che' mi lac pʌs i yutslel lac pusic'al. Mach i t'ojolic bajche' mi' melob xñusa t'añob.

¹⁶Pejtel cʌntesʌbilo' bʌ mi' wʌn ña'tañob bajche' yom mi' melob. Jini tonto bʌ i pusic'al mu jach i pʌs i bʌ ti tonto.

¹⁷Jini mach bʌ xuc'ulic mu' bʌ i ch'ʌm majlel t'an mi' tech wocol, pero an i c'uxbintel jini xuc'ul bʌ mu' bʌ i ch'ʌm majlel t'an. Tijicña i yum tsa' bʌ i choco majlel yic'ot jini mu' bʌ i ñopben i t'an.

¹⁸Mux i yubin quisin, mux i sʌt i chubʌ'an jini mach bʌ yomic i cʌntesʌntel, pero mux i c'uxbintel jini mu' bʌ i jac' i tic'ol.

¹⁹Tsaj yubil chuqui tac la com che' bʌ tsa'ix lac taja, pero tontojob jini mach bʌ yomobic i cʌy i bijlel xmulilob.

²⁰Jini mu' bʌ i pi'leñob majlel jini weño' bʌ i pusic'al muc'ʌch i tajob i ña'tʌbal. Jini mu' bʌ i pi'leñob majlel jini mach bʌ weñobic i pusic'al mi' yutsi p'ojlel i mul.

²¹Mux i tajob wocol jini xmulilob, pero mux i yʌq'uentelob tijicña bʌ jini tojo' bʌ.

²²Jini wen bʌ i pusic'al mi' cʌybeñob i chubʌ'an i yalobilob yic'ot i buts, pero mux i lojtel i chubʌ'an jini xmulilob cha'an jini tojo' bʌ.

²³Tsa'ic i top'o lum jini pobre, tsa' mejli i taj cabʌl i bʌl i ñʌc'. Ma'anic i bʌl i ñʌc' come ma'anic tsi' p'isi ti' wenta.

²⁴Jini mach bʌ anic mi' c'ʌn asiyal, ts'a' mi' q'uel i yalobil. Pero jini mu' bʌ i c'uxbin i yalobil mi' seb cajel i yʌq'uen i tsico' pusic'al.

²⁵Jasʌl mi' c'uxob i bʌl i ñʌc' jini tojo' bʌ, pero mux i yubiñob wi'ñal jini sajtemo' bʌ.