Read Chol Proverbios 14 Bible Online

Proverbios 14 - Chol bible

Proverbios 14

¹Pejtel x'ixic am bʌ i ña'tʌbal mi' tijicñesʌbeñob i pusic'al año' bʌ ti' yotot, pero p'ump'uñob jini año' bʌ ti' yotot jini tonto bʌ x'ixic.

²Jini mu' bʌ i yajñel ti toj woli' bʌc'ñan lac Yum, pero jini sojquem bʌ i bijlel woli' ts'a'len lac Yum.

³Jini mu' bʌ i chañ'esan i bʌ lajalʌch i t'an bajche' te' mu' bʌ i c'ʌn i bajben i pi'ʌlob. Mach che'ic i t'an jini weño' bʌ i pusic'al. Mi' chʌcʌ cʌntañob i yej.

⁴Ya' ba' ma'anic tat wacax jochol i yajñib trigo, pero yic'ot i p'ʌtʌlel tat wacax cabʌlʌch i bʌl lac ñʌc'.

⁵Jini isujm bʌ testigo mach yujilic lot. Jini mu' bʌ i lon sub i bʌ ti testigo wen yujil lot.

⁶Jini xwajleya yom bʌ i taj wen bʌ i ña'tʌbal mach muq'uic i taj, pero jini uts bʌ i pusic'al mach wocolic mi' taj.

⁷Ñajt yom ma' tʌts' a bʌ ti' tojlel jini tonto bʌ, come mi' yʌc' i bʌ ti cʌjñel. Leco i ña'tʌbal.

⁸Tsiquil i ña'tʌbal jini wen bʌ i pusic'al come mi' wen yajcan i bijlel. Tsiquil i tontojlel jini tontojo' bʌ cha'an i lot.

⁹Jini tontojo' bʌ ch'ejl mi lon pʌsob i bʌ che' mi' cha'leñob mulil. Jini tojo' bʌ mi' pʌsob i yutslel i pusic'al.

¹⁰Lac bajñel jach mi laj cʌn i wocol lac pusic'al. Che' ja'el i tijicñʌyel lac pusic'al, mach mejlic i cʌn yambʌ.

¹¹Jochol mi caj i cʌytʌl i yotot jini jontolo' bʌ, pero tijicña i chumlib jini tojo' bʌ.

¹²Toj mi' lon q'uelob i bijlel winicob x'ixicob, pero mi' cajelob ti chʌmel jini mu' bʌ i xʌñob majlel.

¹³Mach ti tse'ñalic mi' lajmel i wocol lac pusic'al. Che' mi la cujtel ti tse'ñal mi lac cha' ubin anto i wocol lac pusic'al.

¹⁴Jini mu' bʌ i soc i bʌ mi caj i c'ojyel i yajñel ti' bijlel jontolil. Jini weño' bʌ mi caj i tajob i tijicñʌyel ti wen bʌ i melbal.

¹⁵Jini mach bʌ cʌntesʌbilic mi' ñop pejtel chuqui mi' yʌlob winicob. Jini cʌntesʌbil bʌ mi' wen tsajin i bijlel.

¹⁶Jini wen bʌ i pusic'al mi' bʌc'ñan mulil. Mi' tʌts' i bʌ. Jini tonto bʌ ch'ejl mi' lon pʌs i bʌ. Xuc'ul mi' lon q'uel i bʌ.

¹⁷Jini mu' bʌ i bʌc' mich'an lajal mi' mel che' bajche' tonto bʌ. Mi' caj ti ts'a'lentel jini mu' bʌ i ñoj tech jontolil.

¹⁸Jini mach bʌ wenic i pusic'al mi' ñopben i melbal jini tontojo' bʌ. Jini weño' bʌ i pusic'al mi caj i yʌq'uentelob i ña'tʌbal i wenta i ch'ʌjlil.

¹⁹Jini jontolo' bʌ mi caj i ñoctʌlob ti' tojlel jini weño' bʌ i pusic'al. Jini xmulilob mi caj i c'ajtiñob i coltʌntel ti' ti' i yotot jini tojo' bʌ.

²⁰An cabʌl i ts'a'lentel jini mach bʌ anic i chubʌ'an. Mi' ts'a'leñob ja'el mero i pi'ʌlob. Pero an i c'uxbintel pejtelel año' bʌ i chubʌ'an.

²¹An i mul jini mu' bʌ i ts'a'len i pi'ʌlob ti chumtʌl. Tijicña jini mu' bʌ i p'untan jini mach bʌ añobic i chubʌ'an.

²²¿Mach ba sojquemic jini mu' bʌ i ña'tañob i mel jontolil? Pero jini mu' bʌ i ña'tañob i mel chuqui uts'at mi caj i tajob chuqui isujm. Mi caj i p'untʌntelob.

²³Pejtel e'tel mu' bʌ lac mel mi' yʌc' i chobejtʌbal. To'ol t'an mi' yotsañonla ti pobre.

²⁴Jini wen bʌ i pusic'al mi' yʌc' i bʌ ti c'uxbintel cha'an cabʌl i wenlel. Jini tonto bʌ mi' yʌc' i bʌ ti ts'a'lentel cha'an i tontojlel.

²⁵Jini isujm bʌ testigo mi' yʌc' ti colel winicob, pero jini xlotiya mi' yʌc'ob ti' c'ʌb i contra.

²⁶Jini mu' bʌ i bʌc'ñañob lac Yum mi mejlel i lʌc'tesañob i bʌ come añob ti' wenta. An i pijtaya i yalobilob ja'el.

²⁷Jini mu' bʌ i bʌc'ñan lac Yum mi' taj i loq'uib ja' ba' ch'oyol laj cuxtʌlel. Tsa'ix i tʌts'ʌ i bʌ ba' bʌbʌq'uen mi' yajlel ya' ba' mi' chʌmel.

²⁸Che' mi' yumʌntel ti cabʌl winicob x'ixicob jiñʌch i ñuclel rey. Che' anto yom winicob x'ixicob ma'anix i p'ʌtʌlel rey.

²⁹An cabʌl i pusic'al jini mach bʌ orajic yujil mich'ajel, pero jini ora bʌ mi' mich'an mi' pʌs i tontojlel.

³⁰Che' ñʌch'ʌl lac pusic'al c'oc'onla yubil. Che' tsʌytsʌyña lac pusic'al cha'an lac pi'ʌlob añʌch lac chʌmel yubil.

³¹Jini mu' bʌ i tic'lan jini pobre mach bʌ anic i chubʌ'an woli jach i ts'a'liben i yum tsa' bʌ i mele. Jini mu' bʌ i p'untan jini pobre woli' c'uxbin lac Yum.

³²Jini xjontolilob mi caj i chojquelob cha'an i jontolil, pero anto i pijtaya jini tojo' bʌ che' mi' chʌmelob.

³³Ya' jach ti' pusic'al mi' yajñel i ña'tʌbal jini cʌntesʌbil bʌ, pero jini tontojo' bʌ mi' pʌsob i tontojlel ti jamʌl.

³⁴Mi' ñuc'an lac lumal cha'an jini tojo' bʌ. Mi' yʌjq'uel ti quisin cha'an xmulilob.

³⁵Jini rey mi' pʌsbeñob i yutslel i winicob weño' bʌ i ña'tʌbal, pero mi' pʌsbeñob i mich'ajel jini quisintic jax bʌ mi' melob.