Read Chol Proverbios 16 Bible Online

Proverbios 16 - Chol bible

Proverbios 16

¹La cujil chuqui yom lac pusic'al, pero ch'oyol ti Dios chuqui mi lac taj.

²Winicob mi' lon ña'tañob sʌc pejtel i bijlel, pero lac Yum mi' laj ch'ʌm ti' wenta bajche' an lac pusic'al.

³Ac'ʌ ti' wenta lac Yum chuqui a wom a mel. Che' jini mux i jolontesan chuqui ma' ña'tan a mel.

⁴Pejtel chuqui tac tsi' mele lac Yum an i c'ʌjñibal. Tsi' mele ja'el jini jontolo' bʌ cha'an i q'uiñilel wocol.

⁵Ts'a' mi' q'uel lac Yum pejtel mu' bʌ i chañ'esañob i bʌ. Ti isujm mux i yʌc'ob ti toj mulil.

⁶Mi' sutq'uiñob i bʌ xmulilob che' mi' tajob i p'untʌntel yic'ot isujm bʌ t'an. Jini mu' bʌ i bʌc'ñan lac Yum mi' cʌy i mul. Mi tsi' taja wocol mux i mʌjlel i cha'an.

⁷Che' tijicña mi' q'uel lac Yum i bijlel winic, mi' yuts'esʌbeñob i pusic'al i contrajob.

⁸Anquese mi ts'ita' jach mi' c'aj jini toj bʌ winic, ñumen tijicñayix bajche' jini mach bʌ tojic bʌ on bʌ i chobejtʌbal.

⁹Mi lac bajñel yajcan lac bijlel, pero lac Yum mi' toj'esan majlel la coc.

¹⁰Isujmʌch i t'an jini rey ti meloñel. Mach yujilic lot che' mi' cha'len meloñel.

¹¹Dios i yumʌch ts'ʌcʌl bʌ p'isoñib yic'ot toj bʌ balanza. I melbalʌch Dios pejtel i yalel balanza mach bʌ asibilic.

¹²Quisintic jax mi tsi' cha'le mulil jini rey, come cha'an jach toj bʌ i ye'tel mi' jal'an ti' buchlib.

¹³Tijicña i pusic'al reyob cha'an i t'an jini tojo' bʌ. Mi' c'uxbiñob jini mu' bʌ i cha'leñob t'an ti isujm.

¹⁴I mich'ajel rey mi' pʌyonla ti chʌmel. Jini am bʌ i pusic'al mi' tilel i yuts'esan.

¹⁵Cuxulonla che' tijicña mi' q'uelonla jini rey. Lajalʌch i yutslel bajche' tocal mu' bʌ i ch'ʌm tilel ja'al jal bʌ tsa' lac pijta.

¹⁶Yom mi lac taj wen bʌ lac ña'tʌbal. Ñumen uts'at bajche' oro letsem bʌ i tojol. Ñumen uts'at bajche' plata mi tsa' lac ch'ʌmbe isujm.

¹⁷Weñʌch i bijlel tojo' bʌ. Mi' tʌts'ob i bʌ ti jontolil. Jini mu' bʌ i wen q'uel i bijlel mi' wen q'uel i cuxtʌlel.

¹⁸Chañʌch i pusic'al jini mu' bʌ caj ti to'ol jilel. Ñucʌch mi' lon q'uel i bʌ jini mu' bʌ caj ti yajlel.

¹⁹Jini uts bʌ mu' bʌ i wen pejcan utso' bʌ ñumen tijicña i pusic'al bajche' jini ñuco' bʌ mu' bʌ i t'oxob i xujch'.

²⁰Jini mu' bʌ i ch'ʌmben isujm jini wen t'an mi' taj i wenlel. Tijicña jini mu' bʌ i ñop lac Yum.

²¹Cʌñʌl jini wen bʌ i pusic'al cha'an toj bʌ i ña'tʌbal. Jini uts bʌ i t'an mi' yʌc' ti p'ojlel i ña'tʌbal.

²²I ña'tʌbal jini mu' bʌ i ch'ʌmbeñob isujm lajalʌch bajche' i loq'uib ja' mu' bʌ i yʌq'uen i cuxtʌlel i yum. Jini tontojo' bʌ mi' tajob i tsico' pusic'al cha'an i tontojlel.

²³Jini mu' bʌ i ch'ʌmben isujm mi' cʌntan i yej. Wen yujil uts bʌ t'an.

²⁴Lajalʌch uts bʌ t'an bajche' chab. Sumuc mi la cubin. I ts'ʌcalʌch lac bʌc'tal yubil.

²⁵Toj mi' lon q'uelob i bijlel winicob x'ixicob, pero mi' cajelob ti chʌmel mu' bʌ i xʌñob majlel.

²⁶Jini mu' bʌ i cha'len wocol e'tel xic'bilʌch cha'an wersa yom i bʌl i ñʌc'.

²⁷Jini sajtem bʌ mi' cha'len wersa i mel jontolil. Lajalʌch i t'an bajche' c'ajc mu' bʌ i xic' majlel i pi'ʌlob ti mulil.

²⁸Jini xlot mi' tech a'leya. Mi' cha'len jop't'an cha'an mi' t'oxob i bʌ jini mu' bʌ i c'uxbiñob i bʌ.

²⁹Jini jontolo' bʌ mi' lotiñob winicob x'ixicob ti uts bʌ t'an cha'an mi' pʌyob ti' bijlel mulil.

³⁰Jini xjop't'an mi' wʌn chajpan i bʌ cha'an mi' lotin yambʌ. Ma'anic mi' poj cʌy jinto mi' yujtel i mel.

³¹Añʌch i c'uxbintel jini ñoxix bʌ tsa' bʌ ñajt'esʌbenti i jabilel cha'an tsi' mele chuqui uts'at.

³²Jini mach bʌ orajic yujil mich'ajel ñumen ñucʌch bajche' ñuc bʌ soldado. Ñumen ñuc jini mu' bʌ i tic' i bʌ bajche' jini mu' bʌ i chil tejclum ti guerra.

³³An mu' bʌ i cha'leñob yajcaya ti alas, pero jiñʌch lac Yum mu' bʌ i yajcʌbeñonla pejtel chuqui mi lac taj.