Read Chol Proverbios 18 Bible Online

Proverbios 18 - Chol bible

Proverbios 18

¹Jini mu' bʌ i tʌts' loq'uel i bʌ ba'an i pi'ʌlob woli' ña'tan i mel chuqui yom i bajñel pusic'al. I contrajʌch weño' bʌ i pusic'al.

²Jini tonto bʌ mach i t'ojolic mi' q'uel jini am bʌ i ña'tʌbal. I t'ojol jax mi' lon q'uel chuqui mi' loq'uel ti' bajñel pusic'al.

³Ya' ba'an sajtem bʌ an ts'a'leya. Ya' ba'an xp'ajoñel an a'leya.

⁴I t'an jini am bʌ i ña'tʌbal lajalʌch bajche' tam bʌ ja'. Lajal an i c'ʌjñibal lac t'an bajche' ja' mu' bʌ i wʌjlel loq'uel ti' loq'uib cha'an mi' lajmesʌbeñonla lac tiquin ti'. Lajalʌch bajche' colem pa' mu' bʌ i bujt'el.

⁵Mach yomic mi la cʌc' ti colel jini am bʌ i mul anquese uts'at i pusic'al yilal. Mach yomic mi lac tic'lan jini toj bʌ che' mi' mel i bʌ.

⁶Jini tonto bʌ mi' c'ʌn i yej cha'an mi' tech cabʌl a'leya. La' bajbentic ti asiyal cha'an i mul.

⁷Cha'an ti' mul i yej mi' yʌlol jisan i bʌ jini tonto bʌ. Lajalʌch i t'an bajche' yac mu' bʌ caj i chuc.

⁸Lajalʌch i t'an xjopt'an bajche' sumuc bʌ i bʌl lac ñʌc'. Mi' laj xaxañonla.

⁹Jini ts'u' bʌ ti e'tel i pi'ʌlʌch jini mu' bʌ i yʌc' ti jilel i chubʌ'an.

¹⁰I c'aba' lac Yum i wentajʌch p'ʌtʌl bʌ otot ts'ajquibil bʌ. Muq'uix i ñochtan ti ajñel jini toj bʌ. Muq'uix i yochel i taj i coltʌntel.

¹¹Jini wen chumul bʌ lajal mi' lon q'uel i chubʌ'an bajche' p'ʌtʌl bʌ tejclum ba' mi' lon ña'tan i coltan i bʌ. Mi' lon al ti' pusic'al lajalʌch i chubʌ'an bajche' chan bʌ ts'ajc mu' bʌ i mʌctan wocol.

¹²Ñuc mi' lon q'uel i bʌ jini mu' bʌ caj i yʌjq'uel ti quisin. Utsʌch i pusic'al jini mu' bʌ caj i wa'chocontel.

¹³Jini mu' bʌ i jac' t'an che' maxto ubibilic i cha'an mi' caj ti quisin cha'an i tontojlel.

¹⁴Jini xuc'ul bʌ i pusic'al ti Dios mi' cuch i wocol, pero mach chʌn cujchix i cha'an che' mi' jilel i xuc'tʌlel.

¹⁵Jini mu' bʌ i ch'ʌmben isujm mi' yutsi taj i ña'tʌbal. Jini wen bʌ i pusic'al mi' wen jac' i cʌntesʌntel.

¹⁶Jini mu' bʌ i yʌq'uen i majtan am bʌ i ye'tel woli' chajpan majlel i bijlel cha'an mi' pʌjyel ochel ti' tojlel jini ñuco' bʌ.

¹⁷Toj mi' lon q'uejlel jini ñaxan to bʌ mi' sub i bʌ ti' tojlel am bʌ i ye'tel. Ti wi'il tal i contra i tsictesan.

¹⁸Anquese p'ʌtʌlob mu' bʌ i cha'leñob leto, mi' lajmel leto ba' ora mi' cha'leñob yajcaya ti jun. Che' jini mi' yʌc'ob i bʌ ti' wenta Dios cha'an mi' pʌsbeñob bajche' yom mi' melob.

¹⁹Che' an mu' bʌ i mich'len i yeran, ñumen tsʌtsʌch bajche' p'ʌtʌl bʌ tejclum. Lajalʌch bajche' i yoyel colem otot.

²⁰Jini uts bʌ i t'an mi caj i taj i tijicñʌyel i pusic'al. Jini mach bʌ wenic i t'an muc'ʌch i toj.

²¹An cha'chajp lac p'ʌtʌlel ti t'an. Cha'an ti lac t'an mi la cʌc' ti chʌmel. Cha'an ti lac t'an mi la cʌc' ti colel. An lac chobejtʌbal ti chajp ti chajp bajche' jach mi laj c'ʌn la cac'.

²²Jini mu' bʌ i pʌy i yijñam mi' taj i tijicñʌyel. Mi' tajben i yutslel lac Yum.

²³Jini mach bʌ anic i chubʌ'an mi' c'ajtin ti wocol t'an, pero wocol mi' jac' jini wen chumul bʌ.

²⁴An mu' bʌ i lon c'uxbiñonla che' an chuqui yomob i taj ti lac tojlel, pero an mu' bʌ i c'uxbiñonla ti isujm ñumen bajche' lac pi'ʌlob.