Read Chol Proverbios 19 Bible Online

Proverbios 19 - Chol bible

Proverbios 19

¹Ñumen tijicña jini pobre toj bʌ i pusic'al bajche' jini rico mu' bʌ i soc i t'an.

²Mach yomic mi lac bʌc' mel bajche' jach yom lac pusic'al. An i mul jini mach bʌ anic mi' p'is ti' wenta chuqui yom i mel.

³Jini tonto bʌ mi' soc i bijlel. Mi' tech leto ti' pusic'al ti contra lac Yum.

⁴I pi'ʌlob jini wen chumul bʌ cabʌl mi' tilelob ti jula', pero mi' tʌts'ob i bʌ i pi'ʌlob jini pobre bʌ.

⁵Jini mu' bʌ i lon sub i bʌ ti testigo wersa mi caj i toj i lot. Mach mejlic ti puts'el jini mu' bʌ i cha'len lot.

⁶Cabʌlob mi' c'ajtibeñob i yutslel jini mu' bʌ i p'ew i chubʌ'an. Pejtel winicob x'ixicob mi' c'uxbiñob jini mu' bʌ i yʌq'ueñob i majtan.

⁷Pejtel i yʌscuñob i yijts'iñob mi' ts'a'leñob jini pobre. ¿Mach ba ñumenic mi caj i tʌts'ob i bʌ i cʌñʌyo' bʌ?

⁸Jini mu' bʌ i yutsi p'ojlesan i ña'tʌbal woli' ch'ʌl i yespíritu yubil. Jini mu' bʌ i wen ña'tan i mel chuqui uts'at mux i taj i wenlel.

⁹Jini mu' bʌ i lon sub i bʌ ti testigo wersa mi caj i toj i lot. Mi' caj ti jilel jini mu' bʌ i cha'len lot.

¹⁰Mach yomic mi' yʌq'uentel jini tonto bʌ pejtelel chuqui tac yom i pusic'al. Mach yomic mi' yumʌntel x'e'tel cha'an i yalobil rey.

¹¹Jini wen bʌ i pusic'al mach orajic mi' mich'an. Jiñʌch i ñuclel che' mi' ñusʌben i mul i contra.

¹²Lajalʌch i mich'ajel rey bajche' i t'an bajlum. Lajalʌch i yutslel bajche' ye'eb.

¹³Jini tonto bʌ mi' jisʌben i chubʌ'an i tat. Jini x'ixic mu' bʌ i yʌ'len i ñoxi'al lajalʌch bajche' chʌc'chʌc'ña bʌ ja' mu' bʌ i tic'lañonla.

¹⁴Tilem ti lac tat la cotot yic'ot lac chubʌ'an ti pañimil. Tilem ti lac Yum la quijñam wen bʌ i pusic'al.

¹⁵Tam mi' yochel i wʌyel jini ts'u' bʌ. Jini mach bʌ anic mi' cha'len e'tel wersa mi caj i yubin wi'ñal.

¹⁶Jini mu' bʌ i wen q'uel jini mandar mi' wen q'uel i bʌ. Jini mach bʌ wenic mi' q'uel i bijlel mi' caj ti chʌmel.

¹⁷Jini mu' bʌ i yʌq'uen pobre chuqui anto yom i cha'an woli' yʌq'uen lac Yum ti majan. Mi caj i cha' q'uextʌbentel bajche' c'amel tsi' yʌq'ue.

¹⁸Aq'uen i tsico' pusic'al a walobil che' anto ti a wenta, pero mach yomic cʌlʌxet ame a tsʌnsan.

¹⁹Jini cʌlʌx jax bʌ mi' mich'an, wersa mi caj i toj. Lolom jach ma' ñop a mʌctan. Ñumen to mi' mich'an.

²⁰Ñich'tan wen bʌ t'an. Ac'ʌ ti a pusic'al j cʌntesʌbal. Che' jini mux a taj cabʌl a pusic'al.

²¹An cabʌl chuqui mi' lon ña'tañob i mel winicob, pero xuc'ul mi' mel chuqui mi' ña'tan i mel lac Yum.

²²Tijicñayob mu' bʌ i cha'leñob p'untaya. Ñumen tijicña jini toj bʌ mach bʌ anic i chubʌ'an bajche' jini wen chumul bʌ yujil bʌ lot.

²³Mi lac taj laj cuxtʌlel che' mi lac bʌc'ñan lac Yum. Jini mu' bʌ i bʌc'ñan lac Yum ñʌch'ʌl mi caj i yajñel yic'ot. Ma'anic chuqui mi caj i tumbentel.

²⁴Jini ts'u' bʌ mi lon otsan i c'ʌb ti' ch'ejew. Ma'anix mi' chʌn otsan ti' yej.

²⁵Ba' ora mi' ju'sʌbentel i pusic'al jini xwajleya mi' julel i pusic'al jini maxto bʌ cʌntesʌbilic. Ba' ora mi' tijq'uel jini wen bʌ i pusic'al mi' yutsi ch'ʌmben isujm.

²⁶Jini mu' bʌ i jisʌben i chubʌ'an i tat yic'ot jini mu' bʌ i choc loq'uel i ña' quisintic jax mi' mel. Wersa mi' cuch i ts'a'lentel.

²⁷Mach a cʌy a cʌntesʌntel ame a soc a bʌ. Ñopo chuqui wen cha'an ma' mel.

²⁸Jini testigo mu' bʌ i soc i t'an ti melobʌjʌl woli' wajliben i ye'tel xmeloñel. Mi' jisan jini toj bʌ ti lot.

²⁹Wʌn chajpʌbilix asiyal cha'an mi' bajbentelob tontojo' bʌ.