Read Chol Proverbios 20 Bible Online

Proverbios 20 - Chol bible

Proverbios 20

¹Jini vino mi' yʌc' ti wajal jini winic mu' bʌ i jap. Mi' tech leto jini lembal. Sajtem i pusic'al jini mu' bʌ i cha'len yʌc'ʌjel.

²Lajal i mich'ajel rey bajche' i t'an bajlum. Jini mu' bʌ i techben i mich'ajel mi caj i toj.

³Ñucʌch jini winic mach bʌ yujilic a'leya. Tonto jini mu' bʌ i yotsan i bʌ ba' woliyob ti a'leya.

⁴Jini ts'u' bʌ ma'anic mi' cha'len cholijel che' i yorajlelix. Mi' lon c'ajtin tac ñumel che' ti' yorajlel c'ajbal.

⁵Lajalʌch lac ña'tʌbal bajche' i yebal tam bʌ ja', che' ya jach lotol ti lac pusic'al, pero mux laj c'unte' tsictesʌben jini mu' bʌ i ch'ʌmben isujm.

⁶Cabʌlob mi poj pʌsob i bʌ ti uts, pero ¿am ba juntiquil uts bʌ i pusic'al ti pejtelel ora? Wocol ti tajol.

⁷Jini toj bʌ mu' bʌ i mel chuqui uts'at mi' pʌsbeñob i bijlel i yalobilob. Tijicñayob mu' bʌ i tilelob ti' pat.

⁸Jini rey buchul bʌ ti meloñel mi' jisan jontolil baqui jach mi' taj.

⁹¿Am ba juntiquil isujm bʌ mu' bʌ i yʌl: Tsa'ix c poco c pusic'al. Sʌconix. Ma'anix c mul, che'en?

¹⁰Ts'a' mi' q'uejlel ti lac Yum jini asibil bʌ balanza yic'ot jelchojc tac bʌ lac p'isonib.

¹¹Winicob x'ixicob yic'ot ja'el alʌlob mi' yʌc'ob i bʌ ti cʌjñel ti' melbalob. Tsiquil ti lac melbal mi sʌconla mi tojonla.

¹²Jini lac chiquin mu' bʌ i yubin t'an yic'ot lac wut mu' bʌ i c'otel laj i melbalʌch lac Yum.

¹³Mach yomic mi' wen ochel a wʌyel ame ochiquet ti pobre. Cañʌ a wut cha'an ma' majlel ti e'tel. Che' jini mux a ñaj'an ti waj.

¹⁴Jini yom bʌ i cha'len mʌñoñel mi' yʌl: Mach wenic, mach i t'ojolic. Che' mi' lon al. Che' mʌmbilix i cha'an tijicña mi' majlel.

¹⁵Uts'at oro yic'ot i t'ojol bʌ xajlel letsem tac bʌ i tojol, pero c'ax uts'at i t'an jini wen bʌ i pusic'al.

¹⁶Jini mu' bʌ i yotsan i bʌ cha'an mi' tojben i bet xbeta taq'uin mi caj i mel i pusic'al ti wi'il. Mi caj i chilbentel i bujc ti prenda cha'an mi' tojben i bet jini mach bʌ i cʌñʌyic.

¹⁷Jini xlot sumuc mi' lon ubin i chobejtʌbal che' bajche' caxlan waj che' ti' cajibal, pero ti wi'il but'ulix i yej ti ji' lum yubil.

¹⁸Che' maxto ña'tʌbilic a cha'an bajche' yom ma' mel, c'ajtiben jini yujilo' bʌ. Ñich'tʌbeñob i t'an jini yujilo' bʌ che' a wom a mel guerra.

¹⁹Jini mu' bʌ i puc majlel t'an mi' tsictesan majlel jini mucul tac bʌ. Mach ma' wotsan a bʌ a wic'ot jini mu' bʌ i laj sub chuqui mi' ña'tan.

²⁰Jini mu' bʌ i p'aj i tat i ña', mi' caj i toj ti ic'ch'ipan bʌ pañimil.

²¹Jini mu' bʌ i bʌc' otsan i bʌ ti rico an i mul. Mux i taj i ch'ijiyemlel i pusic'al che' ti wi'il.

²²An mu' bʌ i yʌl: Mu' to caj j q'uextan jontolil, che'en, pero mach che'ic yom. Pijtan lac Yum. An ti' wenta lac Yum cha'an mi' mel.

²³Ts'a' mi' q'uel lac Yum jini asibil bʌ balanza. Mach uts'atic mi' q'uel ja'el jini jelchojc bʌ p'isoñib.

²⁴Jiñʌch lac Yum mu' bʌ i toj'esañonla majlel. ¿Mejl ba lac bajñel ch'ʌmben isujm lac bijlel?

²⁵Jini mu' bʌ i bʌc' suben lac Yum chuqui mi caj i yʌq'uen, chucul ti yac yubil che' wi'il to mi' c'un ña'tan i t'an.

²⁶Jini rey am bʌ wen bʌ i pusic'al mi' yʌc' ti jilel xjontolilob. Mi' yʌq'ueñob i toj i mul.

²⁷Jini espíritu lac cha'an i wentajʌch lámpara. Mi' tsictesʌbeñonla i malil lac pusic'al.

²⁸Cabʌl mi' taj i coltʌntel jini rey mu' bʌ i mel i ye'tel ti toj ti' yutslel i pusic'al. Che' jini mux i jal'an ti' buchlib.

²⁹I ñuclel ch'iton winicob jiñʌch i p'ʌtʌlel. I ch'ʌjlil jini xñoxob jiñʌch i sʌquel i jol.

³⁰Jini asiyal i wentajʌch ts'ac ti' pʌchʌlel xjontolil. Mi' sʌc'an i pusic'al mu' bʌ i yʌq'uentel i tsico' pusic'al.