Read Chol Proverbios 21 Bible Online

Proverbios 21 - Chol bible

Proverbios 21

¹Jini Dios tsa' bʌ i melbe i bijlel ja' mi' ñijcʌben i pusic'al rey cha'an mi' mel chuqui yom Dios.

²Toj mi' lon q'uelob i bijlel winicob x'ixicob, pero lac Yum mi' q'uelbeñob i pusic'al.

³Jini mu' bʌ i mel chuqui toj, mu' bʌ i cha'len meloñel ti toj, ñumen uts'at ti' wut lac Yum bajche' jini mu' bʌ i yʌq'uen i yʌlac' ti' majtan.

⁴Jini chan bʌ mi' q'uel i bʌ yic'ot jini ts'a' bʌ mi' q'uel i pi'ʌlob lajal xmulilob. Chuqui tac jach mi' melob mulilʌch.

⁵Jini bʌx bʌ ti e'tel mu' bʌ i ña'tan chuqui yom i mel mi' yʌc' ti p'ojlel i chubʌ'an. Pero pejtel mu' bʌ i ña'tañob i to'ol tajob i chubʌ'an mi caj i yochelob ti pobre.

⁶Lolom jach mi' tempan i chobejtʌbal xlot. Che' jach mi' yilol jilel ti' c'ʌb jini mu' bʌ caj ti chʌmel.

⁷Jini chucul bʌ i cha'an sajtemo' bʌ mi caj i jisañob come ma'anic tsi' tiq'uiyob i bʌ ti mulil cha'an mi' melob chuqui uts'at.

⁸Socol i bijlel jini sajtemo' bʌ. Leco ja'el. Tojʌch i melbal jini sʌco' bʌ i pusic'al.

⁹Mach tijicñayic jini winic am bʌ i pi'ʌl woli bʌ ti a'leya. Anquese colem i yotot mach tijicñayic. Ñumen tijicña aja muq'uic mejl i ñajti tʌts' i bʌ anquese ti' xujc jach jump'ejl i mal otot.

¹⁰Ti pejtelel i pusic'al yom i mel mulil jini sajtem bʌ. Ma'anic mi' tic' i bʌ cha'an i pi'ʌlob ti chumtʌl.

¹¹Ba' ora mi' ju'sʌbentel i pusic'al xmulil, mux i q'uel jini maxto bʌ cʌntesʌbilic. Mux i julel i pusic'al. Subentel jach yom cha'an mi' melob chuqui wen jini weño' bʌ i pusic'al.

¹²Jini i cha'año' bʌ Dios mi' p'isob ti wenta che' mi' q'uelob i jilibal jini sajtemo' bʌ. Mi' jilelob cha'an i jontolil.

¹³Jini mu' bʌ i lon pʌs i bʌ ti xcojc che' mi' tilel pobre i c'ajtiben i coltʌntel mi caj i cha'len c'ajtiya ja'el. Ma'anic mi caj i yubibentel i t'an.

¹⁴Mi' lajmel i mich'ajel jini am bʌ i ye'tel mu' bʌ i yʌq'uentel i majtan ti mucul. Anquese cabʌl jax i mich'ajel, mi' lajmel che' mi' ñusʌbentel i majtan.

¹⁵Che' mi' cha'len toj bʌ meloñel jini am bʌ i ye'tel, tijicña i pusic'al jini tojo' bʌ, pero mi' cha'leñob bʌq'uen jini xjontolilob.

¹⁶Jini mu' bʌ i tʌts' loq'uel i bʌ ti' bijlel i cʌntesʌntel mi caj i yajñel yic'ot chʌmeño' bʌ.

¹⁷Jini mu' bʌ i to'o sʌclan i tijicñʌyel i pusic'al mi caj i yochel ti pobre. Jini mu' bʌ i to'ol ñusan q'uin ti q'uiñijel ma'anic mi' yochel ti rico.

¹⁸Mi' caj ti chʌmel xjontolil. Mi' caj ti colel jini toj bʌ. Jini sajtem bʌ mi caj i toj i mul. Jini toj bʌ ma'anic mi' yʌjq'uel ti toj mulil.

¹⁹Mach tijicñayic jini am bʌ i pi'ʌl woli bʌ ti mich'ajel yic'ot a'leya. Ñumen tijicña aja muq'uic mejl i bajñel chumtʌl ti jamil.

²⁰Lotol ti' yotot jini p'ip' bʌ i pusic'al an letsem tac bʌ i tojol yic'ot aceite, pero jini tonto bʌ mi' laj jisan.

²¹Jini mu' bʌ i chʌn ñop i mel chuqui toj yic'ot chuqui uts'at mi caj i taj i cuxtʌlel yic'ot toj bʌ i pusic'al yic'ot i c'uxbintel.

²²Jini p'ip' bʌ i pusic'al ti guerra mux i yochel i chilben i tejclum jini p'ʌtʌlo' bʌ. Mi' jisʌbeñob i p'ʌtʌlel xchumtʌlob ba' lon xuc'ulob i pusic'al.

²³Jini mu' bʌ i cʌntan i yej yic'ot i yac' mi' cʌntan i bʌ cha'an mach yomic ochel ti wocol.

²⁴Xwajleyajʌch jini chan bʌ i pusic'al yujil bʌ mich'ajel. Mi' mel bajche' jach yom i pusic'al. Bajñel bʌjʌch i bʌ.

²⁵I ts'u'lel jini ts'u' bʌ mi' tsʌnsan. Mach yomic i ñop e'tel ti' c'ʌb.

²⁶C'ʌlʌl mi' sʌc'an mi' yic'an tsʌytsʌyña i pusic'al jini ts'u' bʌ. Jini toj bʌ mi' p'ew i chubʌ'an. Mi' p'untan i pi'ʌlob.

²⁷Ts'a' mi' q'uel lac Yum i majtan mu' bʌ i yʌq'uen sajtemo' bʌ. Jini woli bʌ ti jontolil mi' lon ña'tan i yuts'esʌben i pusic'al lac Yum yic'ot i majtan.

²⁸Jini mu' bʌ i lon otsan i bʌ ti testigo mi' caj ti jilel. Jini tsa'ix bʌ i yubi isujm bʌ t'an joy lajalʌch i t'an ti pejtelel ora.

²⁹Ch'ejlatax mi' lon pʌs i bʌ jini sajtem bʌ. Mach che'ic mi' mel jini toj bʌ. Mi' toj'esan i bʌ majlel.

³⁰Jini wen bʌ i ña'tʌbal yic'ot jini mu' bʌ i ch'ʌmben isujm yic'ot jini mu' bʌ i cha'len cʌntesa ti isujm mach i contrajobic lac Yum.

³¹Cosʌbil jini caballo cha'an mi laj coltʌntel ti' yorajlel guerra, pero ch'oyol ti lac Yum laj coltʌntel.