Read Chol Proverbios 22 Bible Online

Proverbios 22 - Chol bible

Proverbios 22

¹Ñumen tijicña jini uts'at bʌ i c'aba' bajche' jini am bʌ cabʌl i chubʌ'an. Jini mu' bʌ i taj i coltʌntel ti' pi'ʌlob cha'an c'ux mi' yubiñob ñumen tijicñayʌch bajche' jini am bʌ i cha'an plata yic'ot oro.

²Jini ricojob yic'ot jini pobrejob mi' tajob i bʌ. Laj i melbalob lac Yum.

³Jini cʌntesʌbil bʌ mi' wʌn ña'tan chuqui bʌbʌq'uen mi' yujtel. Mi' chajpan i bʌ. Jini tonto bʌ ma'anic mi' yotsan ti' pusic'al. Muq'uix i toj.

⁴An i chobejtʌbal jini uts bʌ i pusic'al mu' bʌ i bʌc'ñan lac Yum. Jiñʌch cabʌl i chubʌ'an yic'ot i ñuclel yic'ot i cuxtʌlel.

⁵An pim bʌ ch'ixol yic'ot yac ti' bijlel jini sajtemo' bʌ. Mach ya'ic mi' yochel jini mu' bʌ i chʌcʌ q'uel i bʌ.

⁶Cʌntesan alʌlob ti jini bij yom bʌ mi' xʌñob majlel. Che' ñoxobix ma'anic mi caj i cʌyob.

⁷Jini pobre mi' yuman jini rico. Jini xbeta taq'uin mi' yochel ti to'ol e'tel ya' ba' tsi' beta taq'uin.

⁸Jini mu' bʌ i pʌc' jontolil mi caj i c'aj wocol. Mi caj i yʌjq'uelob ti quisin jini jontolo' bʌ.

⁹Mux i coltʌntelob jini mu' bʌ i pʌsbeñob i pi'ʌlob i yutslel i pusic'al, come mi' yʌq'ueñob i waj jini mach bʌ añobic i cha'an.

¹⁰Choco loq'uel jini xwajleya. Che' jini mux i lajmel a'leya. Mux i lajmel leto yic'ot ts'a'leya.

¹¹Jini rey mi caj i pʌsben i yutslel i pusic'al jini sʌc bʌ i pusic'al. Mi caj i c'uxbin cha'an ti' yutslel i t'an.

¹²Lac Yum mi' wen q'uel jini wen bʌ i ña'tʌbal, pero mi' yʌc' ti to'ol jilel i t'an xlotob.

¹³Jini ts'u' bʌ mi' lon al ti' pusic'al: An bajlum ya' ti pat otot. Mi caj c tsʌnsʌntel, che'en.

¹⁴Lajalʌch i t'an jini ts'i'lel bʌ x'ixic bajche' tam bʌ ch'en. Ya'i mi caj i wʌlʌc jisan i bʌ jini winic ts'a'lebil bʌ ti lac Yum.

¹⁵Tsʌts chucul i tontojlel i pusic'al alʌlob, pero mux i chojquel loq'uel che' mi' yʌq'uentelob i tsico' pusic'al ti asiyal.

¹⁶Jini mu' bʌ i chilben i chubʌ'an pobre cha'an mi' p'ojlesan i chubʌ'an yic'ot jini mu' bʌ i yʌq'uen i majtan wen chumul bʌ lajal mi' cajelob ti wi'ñal.

¹⁷La' ba' añon. Yom ma' wen ñich'tan jini t'an. Ubibeñob i t'an jini weño' bʌ i pusic'al. Otsan ti a pusic'al j cʌntesʌbal.

¹⁸Come tijicñayet mi tsa' cʌnta ti a pusic'al cha'an ma' cha' sub ti toj.

¹⁹Wolij cʌntesañet cha'an xuc'ul mi' yajñel a pusic'al yic'ot lac Yum.

²⁰¿Mach ba anic tsac ts'ijbubeyet wen bʌ t'an cha'an a cʌntesʌntel?

²¹Ñopo ti isujm cha'an ma' cha' sujtel a subeñob jini tsa' bʌ i chocoyet tilel.

²²Mach a xujch'iben i chubʌ'an jini p'ump'un bʌ mach bʌ mejlic i coltan i bʌ. Mach a ts'a'len che' mi' tilel i mel i bʌ.

²³Come lac Yum mi caj i mel. Mi caj i jisan jini mu' bʌ i tic'lañob.

²⁴Mach yomic ma' xʌb a bʌ yic'ot jini yujil bʌ mich'ajel. Mach yomic ma' pi'len majlel jini cʌlʌx jax bʌ i mich'ajel,

²⁵ame lajalic ma' mel, ame a lon choc a bʌ ti yac yubil.

²⁶Mach yomic lajal ma' mel bajche' yaño' bʌ mu' bʌ i lon ac'ob i t'an cha'an mi' tojbeñob i bet xbeta taq'uin.

²⁷Come mi ma'anic a taq'uin cha'an ma' tojben i bet, obol a bʌ mi tsi' chilbeyet a wʌyib cha'an i q'uexol i taq'uin.

²⁸Mach ma' lux majlel cayajon tsa' bʌ i p'isiyob lac tat ti wajali ba' jaxʌl lum.

²⁹¿A cʌñʌ ba juntiquil bʌx bʌ ti e'tel? Mi caj i yʌq'uentel ñuc bʌ i ye'tel ti' tojlel yumʌlob. Ma'anic mi caj i melbeñob i ye'tel jini ch'o'ch'oco' bʌ.