Read Chol Proverbios 3 Bible Online

Proverbios 3 - Chol bible

Proverbios 3

¹Calobil, mach ñajʌyic ti a pusic'al j cʌntesʌbal. Chʌn ña'tan c mandar ti a pusic'al.

²Che' jini mi caj i ñajt'an a jabilel. Mi caj a wajñel ti uts'at ti' ñʌch'tʌlel a pusic'al.

³Mach a cʌy p'untaya yic'ot xuc'ul bʌ t'an. Mach a wis cʌy. Ts'ijban cʌytʌl ti a pusic'al.

⁴Che' jini mux a tajben i yutslel i pusic'al Dios. Uts'at mi caj i q'uelet winicob.

⁵Ñopo lac Yum ti pejtelel a pusic'al. Mach a bajñel ña'tan bajche' jach a wom ma' mel.

⁶Ti pejtelel chuqui ma' mel ña'tan lac Yum. Che' jini mux caj i chajpʌbeñet a bijlel.

⁷Mach yomic ma' chañ'esan a bʌ ti a bajñel ña'tʌbal. Bʌc'ñan lac Yum, cʌyʌ jontolil.

⁸Che' jini c'oc' mi caj i yajñel a bʌc'tal, tijicña a pusic'al.

⁹Ch'ujutesan lac Yum. T'oxben a chubʌ'an tsa' bʌ a taja ti a we'tel. Yajcʌben ñumen wen tac bʌ i majtan ti pejtelel a wʌlac' yic'ot a pʌc'ʌb.

¹⁰Che' jini mux i bujt'el i yotlel a wixim. Mux i ñumel i ya'lel ts'usub ti' yajñib.

¹¹Calobil, mach ma' ts'a'len a cʌntesʌntel ti lac Yum. Mach mi' c'ojyel a wubin a toj'esʌntel.

¹²Come lac Yum mi' tic' jini c'uxbibil bʌ i cha'an che' bajche' i tat ch'iton mi' ju'sʌben i pusic'al i yalobil mu' bʌ i c'uxbin.

¹³Tijicña mu' bʌ i taj wen bʌ i ña'tʌbal cha'an mi' ch'ʌmben isujm.

¹⁴Come ñumen an i c'ʌjñibal wen bʌ lac ña'tʌbal bajche' plata, ñumen i c'ʌjñibal bajche' wen fino bʌ oro.

¹⁵Ñumen i c'ʌjñibal wen bʌ lac ña'tʌbal bajche' letsem tac bʌ i tojol xajlel. Ma'anic yambʌ lac wenlel lajal bʌ i c'ʌjñibal.

¹⁶Jini am bʌ wen bʌ i ña'tʌbal mi' ñajt'esʌntel i jabilel. Mi' yʌq'uentel i chubʌ'an yic'ot i ñuclel.

¹⁷Tijicña mu' bʌ i ñopben i cʌntesʌbal. Ñʌch'ʌl i pusic'al jini mu' bʌ i jac'.

¹⁸Jini mu' bʌ i taj wen bʌ i ña'tʌbal mi' taj i cuxtilel, come lajalʌch i ña'tʌbal bajche' te' mu' bʌ i yʌq'uen i cuxtilel majqui jach mi' taj. Tijicñayob jini mu' bʌ i chʌn lotob ti' pusic'al.

¹⁹Lac Yum tsi' yʌc'ʌ i c'ʌclib pañimil ti cabʌl i ña'tʌbal. Tsi' mele panchan cha'an ti cabʌl i pusic'al.

²⁰Cha'an ti' ña'tʌbal lac Yum, tsa' tojmi loq'uel ja' ti tam bʌ i ch'eñal. Mi' jubel i ye'eblel tocal ti lum.

²¹Calobil, yom ma' wen ña'tan pañimil. Chʌn ña'tan bajche' yom ma' mel. Mach ñajʌyic c mandar ti a pusic'al.

²²Che' jini i cuxtʌlelʌch a pusic'al, a t'ojlʌwibʌch.

²³Che' jini tijicñayet baqui jach ma' majlel ti xʌmbal. Ma'anic mi caj a jats' a woc.

²⁴Che' ma' c'aj a wo ma'anic bʌq'uen. Che' ma' ñoltʌl ti wʌyel tijicñayet.

²⁵Che' mi' bʌc' tejchel jini bʌbʌq'uen jax bʌ, mach a bʌc'ñan. Mach a bʌc'ñan jini wocol mu' bʌ caj i tajob jontolo' bʌ,

²⁶come lac Yum i xuc'tilelʌch a pusic'al. Mux caj i cʌntañet lac Yum ame chujquiquet ti yac.

²⁷Che' mi' tilel ti a wenta jini yom bʌ i coltʌntel, coltan mecu.

²⁸Mi an chuqui woli' c'ajtibeñet, mi añʌch a cha'an lotol bʌ ti a wotot, mach a suben: Cucu, yanto bʌ ora mi caj cʌq'ueñet. Ijc'ʌl to. Mach che'iquet.

²⁹Mach ma' contrajin a pi'ʌl ti chumtʌl cha'an ma' wʌc' ti wocol, come woli' ña'tan uts'at an ti a t'ejl.

³⁰Mach a tech leto ti contra jini mach bʌ anic i mul, come ma'anic chuqui tsi' tumbeyet.

³¹Mach a tsʌjyuben i chubʌ'an jini yumʌl mu' bʌ i tic'lan winicob. Mach a mulan a mel bajche' jini.

³²Come jini xjontolil ts'a' mi' q'uejlel ti lac Yum, pero lac Yum mi' pʌsben jini toj bʌ jini mucul tac bʌ i cha'an.

³³Mi' caj ti jilel i tijicñʌyel jini xjontolil yic'ot i tijicñʌyel i p'olbal cha'an ti' t'an lac Yum, pero cha'an ti' t'an lac Yum mi' caj ti p'ojlel i tijicñʌyel jini toj bʌ yic'ot i p'olbal.

³⁴Lac Yum mi' ts'a'len jini sts'a'leya. Mi' pʌsben i yutslel i pusic'al jini uts bʌ.

³⁵Mi caj i c'uxbintel jini wen bʌ i ña'tʌbal. Mi caj i yubiñob quisin jini tontojo' bʌ.