Read Chol Proverbios 4 Bible Online

Proverbios 4 - Chol bible

Proverbios 4

¹Calobilob, ubinla i cʌntesa la' tat. Ch'ujbinla cha'an mi la' ch'ʌmben isujm,

²come uts'at j cʌntesʌbal. Mach mi la' cʌy la' jac' c mandar,

³come joñon ja'el tsac ch'ujbibe i t'an c tat. Cojon jach bʌ ch'iton bʌ i yalobil c mama. Wen c'uxbibilon i cha'an.

⁴C tat tsi' cʌntesayon ja'el. Tsi' subeyon: La' ajnic c t'an ti a pusic'al. Jac'ʌ c mandar cha'an ma' taj a cuxtʌlel.

⁵Taja wen bʌ a ña'tʌbal. Wen ch'ʌmben isujm. Mach a sʌt c t'an ti a pusic'al. Mach a cʌy a mel mu' bʌ c subeñet.

⁶Mach a cʌy wen bʌ a ña'tʌbal, come mux caj i cʌntañet. C'uxbin come mux i coltañet. Che' tsi' subeyon c tat.

⁷Jini ñaxan bʌ yom jiñʌch wen bʌ a ña'tʌbal. Sʌclan mecu. Ti pejtelel a pusic'al yom ma' sʌclan.

⁸Ña'tan jiñʌch mero ñuc bʌ come mux caj i yotsañet ti ñuc. Ba' ora tsa'ix a taja, mi caj i pʌyet ba' ma' taj a ñuclel.

⁹Mi caj i yʌq'ueñet i yutslel a pusic'al. Mi caj i yʌq'ueñet a ñuclel i wenta a ch'ʌjlib.

¹⁰Calobil, ubin. Ñopo c subal. Che' jini mi caj i jalʌtesan a jabilel.

¹¹Wolic toj'esañet ti uts'at cha'an ma' ña'tan bajche' yom ma' mel. Wolic pʌyet majlel ti wen bʌ bij.

¹²Che' ma' majlel ti jini bij ma'anic chuqui mi' cʌyet. Che' ma' cha'len ajñel ma'anic mi caj a jats' a woc.

¹³Chʌn ña'tan j cʌntesʌbal, mach a sʌt. Chʌn loto, come a cuxtʌlelʌch.

¹⁴Mach yomic ma' majlel ti' bijlel jontolo' bʌ. Mach ma' mel bajche'ob.

¹⁵Mach ma' wochel ya' ba' añob. Cʌyʌyob. Toj yom ma' ñumel majlel. Mach yomic ma' jac' jontolil. Yom ma' junyajlel cʌye'.

¹⁶Come mach contentojobic mi' majlelob ti' wʌyib jinto mi' yujtelob i mel jontolil. Mach mejlicob ti wʌyel jinto mi' techbeñob i ch'ijiyemlel yaño' bʌ.

¹⁷Mi' tajob i bʌl i ñʌc' cha'an i ye'tel ti jontolil. Mi' tajob vino cha'an i ye'tel ti jisaya.

¹⁸Pero i bijlel jini tojo' bʌ che' yilal bajche' i pasibal q'uin. Ñumen mi' tsictiyel i c'ʌc'al c'ʌlʌl ti xinq'uiñil.

¹⁹I bijlel jini jontolo' bʌ che'ʌch yilal bajche' ic'ch'ipan bʌ pañimil. Mach yujilobic chuqui woli' yʌsañob.

²⁰Calobil, ubibeñon c t'an. Ñich'tʌbeñon c subal.

²¹Mach a cʌy a ña'tan c subal. Chʌn ac'ʌ ti a pusic'al.

²²Mi' tajob i cuxtʌlel pejtel mu' bʌ i ch'ujbibeñon c subal. Mi' tajob i c'oc'lel.

²³Cʌntan a pusic'al ti jump'ejl jach, come bajche' jach an lac pusic'al che'ʌch añonla.

²⁴Mach a chʌn soc a t'an. Yom ma' junyajlel cʌy jini sojquem tac bʌ t'an.

²⁵Toj yom ma' q'uel majlel a bijlel. Toj yom ma' q'uel ti' tojel a wut.

²⁶Loc'san ti a bijlel pejtel chuqui mi' cʌyet. Yom xuc'ulet ti pejtelel chuqui tac toj.

²⁷Mach a xoy a bijlel mi ti a ñoj mi ti a ts'ej. Tʌts'ʌ a bʌ ba'an jontolil.