Read Chol Eclesiastes 1 Bible Online

Eclesiastes 1 - Chol bible

Eclesiastes 1

¹Jiñʌch i t'an Salomón i yalobil David, rey ti Jerusalén: Joñon subt'añon.

²Mi cʌl lolom jach pejtel chuqui an. Ma'anic i c'ʌjñibal.

³¿Chuqui mi' taj winic cha'an i ye'tel ti yebal panchan, anquese wocol mi' cha'len e'tel?

⁴Mi' yilan pañimil, mi' chʌmel. I yalobil mi' ch'ʌmben i yajñib. Pero jini lum an ti pejtelel ora.

⁵Mi' pasel q'uin, mi' bʌjlel q'uin. P'is mi' joy ñumel ba' mi' cha' pasel.

⁶Jini ic' mi' joy ñumel baqui jach yom. An i tajol mi' tilel ti norte, an i tajol mi' tilel ti sur. Ma'anic i bijlel yilal.

⁷Pejtel i bijlel colem ja' mi' majlel ti colem ñajb, pero mach bujt'ic jini ñajb. Ya' ba' mi' majlel ja' ya' mi' cha' sujtel.

⁸Pejtel chuqui an mi' c'ojyel la cubin. Ma'anic mi' jastiyel lac wut ti' q'uelol chuqui tac an ti pañimil. Ma'anic mi' jastiyel lac chiquin ti' yubintel chuqui tac mi la cubin.

⁹Pejtel chuqui tsa' ujti ti' tojlel lac ñojte'el mi' cha' ujtel ti lac tojlel. Pejtel chuqui tsi' cha'leyob mi lac cha' cha'len. Ma'anic chuqui ñoj tsijib ti yebal panchan.

¹⁰¿Am ba chuqui tsijib ti a tojlel? ¿Bajche' ma' ña'tan mi cojachix wʌle woli' yujtel? Melel lajal tsa' mejli wajali.

¹¹Mach lac ña'tayic bajche' tsi' meleyob lac ñojte'el. Tsa'ix sajti ti lac pusic'al. Jini mu' bʌ caj lac mel mi caj i sajtel ja'el. Ma'anix mi caj i chʌn c'ajtesañob la calobilob.

¹²Joñon subt'añon, tsac cha'le yumʌntel ti' tojlel israelob ti Jerusalén.

¹³Tsa cʌc'ʌ tic pusic'al cha'an mic ch'ʌmben isujm yic'ot cha'an mic ñop pejtel cʌmbil bʌ ti pañimil. Wen wocol la que'tel mu' bʌ i yʌq'ueñonla lac mel Dios. Cabʌl mi lac mel lac pusic'al cha'an ili wocol.

¹⁴Tsaj q'uele pejtel i melbal winicob ti yebal panchan. Melel lolom jach. Woli jach i yʌsiñob ic'.

¹⁵Chuqui tac mach tojic mach mejlic i toj'esʌntel. Chuqui tac anto yom mach mejlic lac tsic.

¹⁶Tsa cʌlʌ tic pusic'al: Q'uele bajche' añon. Tsac wen ac'ʌ c bʌ cha'an mic p'ojlesan c ña'tibal. Ñumen cabʌl tsac ñopo bajche' yambʌ yumʌlob tsa' bʌ i cha'leyob rey ti Jerusalén ti yambʌ ora. Cabʌl jax chuqui tsaj q'uele joñon. Cabʌlix c ña'tibal, cho'on.

¹⁷Tsa' bʌx'ayon ti' ñopol pejtel chuqui an, bajche' mi' melob jini año' bʌ i ña'tibal yic'ot bajche' mi' melob tontojo' bʌ año' bʌ i sajtemal. Tsa' caji c ña'tan woli jach cʌsin ic'.

¹⁸Che' cabʌlix lac ña'tibal, cabʌl lac wocol. Che' mi' p'ojlel lac ña'tibal, mi' p'ojlel i ch'ijiyemlel lac pusic'al.