Read Chol Eclesiastes 5 Bible Online

Eclesiastes 5 - Chol bible

Eclesiastes 5

¹Tsajalet me. Yom ñʌch'ʌlet che' mi la' wochel ti Templo. Yom jamʌl a chiquin cha'an ma' wubin. Mach a mel bajche' tontojo' bʌ. Mi' yʌq'ueñob i majtan Dios, pero mach yujilobic che' woli' ñusʌbeñob i t'an.

²Mach a bʌc' ac' a t'an che' maxto anic tsa' wen ña'ta mi che'ʌch yom. Yom xuc'ul a pusic'al ma' ts'ʌctesan chuqui tsa' subu. Come lac Yum an ti panchan, wʌ' añet ti pañimil. Jini cha'an mach yomic ma' p'ojlesan a t'an.

³Mi cabʌl woliyonla ti tsic pusic'al mi laj cajel ti ñajal ti ac'ʌlel. Che' ja'el mi tontojonla, mi' caj ti tsictiyel cha'an cabʌl lac t'an.

⁴Jini cha'an, che' ma' suben Dios chuqui mi caj a melben, mele ti ora. Come mach tijicñayic i pusic'al Dios che' lajal ma' mel bajche' tonto. Mele che' bajche' tsa' sube.

⁵Uts'at che' ma'anic ma' wa'chocon a t'an. Mach uts'atic che' ma' wa'chocon a t'an che' tile ñumel jach a t'an.

⁶Che' jini an a mul ti' caj a wej. Mach a lon jop' a t'an ti' tojlel i winic Dios cha'an mi' ñusʌbeñet a mul che' mach xuc'uletic. ¿Chucoch ma' wʌsin Dios cha'an mi' mich'leñet? An i p'ʌtʌlel cha'an mi' yʌc' ti sʌc jilel pejtel a we'tel.

⁷Cʌyʌ a ñajlen jini yom bʌ melol. Mele ti ora. ¿Chuqui i ye'tel to'ol t'an jach? Yom ma' bʌc'ñan Dios.

⁸Mi tsa' q'uele woli' tic'lʌntelob pobrejob cha'an jini wen chumulo' bʌ, mi mach tojic mi' cha'leñob meloñel, mach mi' toj sajtel a pusic'al. Come pejtel año' bʌ i ye'tel añob ti' wenta ñumen ñuco' bʌ i ye'tel mu' bʌ i jac'beñob i mandar yaño' bʌ. Jini ñumen ñuco' bʌ mi' jac'beñob i mandar rey.

⁹Tijicñayob winicob che' mi' yumañob rey mu' bʌ i cʌntan i lumal, come cʌyʌl ti lum pejtel winicob.

¹⁰Jini am bʌ i wo'lel cha'an taq'uin ma'anic mi caj i jastiyel ti taq'uin. Mach a lon ña'tan a taj i tijicñʌyel a pusic'al ti cabʌl a chubʌ'an.

¹¹Che' cabʌl a taq'uin an cabʌlob mu' bʌ i jisañob. ¿Mu' ba caj i coltañet che' bajche' jini? Jini jach ma' poj q'uel che' woli ti jilel.

¹²Jini bʌx bʌ ti e'tel tijicña mi' cha'len wʌyel, mi ts'ita jach mi' c'ux waj o mi cabʌl mi' c'ux waj. Pero jini wen chumul bʌ mach mejlic ti wʌyel cha'an cabʌl i chubʌ'an.

¹³An junchajp wocol tsa' bʌ j q'uele ti yebal panchan. An wen chumulo' bʌ mu' bʌ i tajob wocol cha'an mi' lotob i taq'uin.

¹⁴Ya' ba' mi' yʌc'ob ti cʌntʌntel mi' lon sajtel. Che' jini ma'anix chuqui mi caj i cʌybeñob i yalobilob.

¹⁵Jini mu' bʌ i lon ac' i taq'uin baqui mi' sajtel cha' jocholix i c'ʌb che' bajche' ti ñaxan che' bʌ tsi' q'uele pañimil.

¹⁶Jiñʌch wen ch'ijiyem bʌ, come che' bajche' tsi' q'uele pañimil che' ja'el mi' caj ti chʌmel. ¿Chucoch tsi' lon cha'le cabʌl e'tel yic'ot tsic pusic'al? Lolom jach. Tsa' wejlunti majlel cha'an ic' yilal.

¹⁷Ti pejtelel i jabilel c'ʌlʌl jinto mi' chʌmel, ma'anix mi' q'uel i sʌclel pañimil, come ma'anix i chubʌ'an anquese wocol tsi' cha'le e'tel. Mʌcʌcña pañimil yubil, ch'ijiyem i pusic'al. Cabʌl i wocol yic'ot i mich'lel.

¹⁸Awilan, tsaj q'uele bajche' yom mi lac mel. Yom tijicña mi lac cha'len we'el yic'ot uch'el. Yom mi laj q'uel la que'tel ti uts'at cha'an tijicña mi lac chʌn cha'len e'tel ti pejtel q'uin che' cuxulon tola ti yebal panchan, come jiñʌch mu' bʌ i yʌq'ueñonla Dios.

¹⁹Che' an lac chubʌ'an, che' wen chumulonla, che' an lac p'ʌtʌlel cha'an mi laj q'uel ti uts'at chuqui mi' yʌq'ueñonla Dios, jiñʌch lac majtan ti Dios.

²⁰Che' jini mach cabʌlic mi lac mel lac pusic'al anquese xñumelonla ti pañimil, come Dios mi' but' lac pusic'al ti tijicña bʌ.