Read Chol Eclesiastes 7 Bible Online

Eclesiastes 7 - Chol bible

Eclesiastes 7

¹Che' mi lac sujbel ti uts'at, ñumen tijicña yubil bajche' xojocña bʌ perfume letsem bʌ i tojol. Jini q'uin che' mi lac chʌmel ñumen tijicñayʌch bajche' jini q'uin che' mi laj q'uel pañimil.

²Uts'at mi lac cha'len jula' ti' yotot ba' tsa' chʌmi juntiquil lac pi'ʌl. Lolom jach mi lac jula'tan xq'uiñijelob, come jujuntiquil winic mi caj i yuc'tʌntel ja'el. Come mi caj lac chʌmel ti pejtelonla. Yom mi lac p'is ti lac wenta che' cuxulon tola.

³Ñumen uts'at jini ch'ijiyem bʌ bajche' tse'tse'ña bʌ, come mi' yuts'an lac pusic'al ti wocol.

⁴Jini am bʌ i ña'tibal mi' wʌn ña'tan ti' pusic'al chuqui mi' caj ti ujtel che' mi' chʌmel. Pero jini tonto mu' jach i to'ol ñusan q'uin yic'ot i pi'ʌlob, tijicñayo' bʌ i pusic'al.

⁵La' i subeñonla lac sajtemal jini am bʌ i pusic'al. Mach yomic mi' sub lac ñuclel jini tonto.

⁶Mi' bʌc' ñajʌyel ti lac pusic'al i t'an jini tonto. Che' jajacña ti tse'ñal, lajal yubil bajche' i c'ʌc'al jomojch' che' woli ti lejmel ti yebal p'ejt. Lolom jach mi lac to'ol p'is ti wenta.

⁷Jini am bʌ i ña'tibal, mi' sujtel ti tonto che' mi' ch'ʌm i majtan ti' c'ʌb xjontolil. Jini mu' bʌ i wersa c'ajtin taq'uin ñumen bajche' yom, woli' yʌc' i bʌ ti asiyel.

⁸Uts'at i tejchibal e'tel, pero ñumen uts'at i joloñibal. Jini mu' bʌ i cuch wocol ñumen uts'atʌch i pusic'al bajche' jini chan bʌ mi' mel i bʌ.

⁹Mach a bʌc' mich'an, come i tilel jini tontojob che'ʌch mi' melob.

¹⁰Mach yomic ma' lon ña'tan ñumen uts'at ili pañimil wʌle che' bajche' ti oñiyi, come mach a wujilic mi isujm. Lolom jach ma' mel a pusic'al cha'an jini mach bʌ cʌmbilic lac cha'an.

¹¹An i c'ʌjñibal taq'uin, an i c'ʌjñibal lac ña'tibal, pero ñumen cabʌl i c'ʌjñibal lac ña'tibal.

¹²Mi' chʌn coltañonla che' ma'anix lac taq'uin.

¹³Q'uelela i melbal Dios. Mach ma' ñop a cha' mel ti uts'at. ¿Majqui mi mejlel i cha' toj'esan jini rochol bʌ te'?

¹⁴Che' mi' tilel tijicña bʌ, la' ñuc'ac a pusic'al, pero che' mi' tilel wocol, ña'tan laj aq'uebilonla ti Dios ti chajp ti chajp cha'an mi' cʌntesañonla. Ma'anic majqui yujil chuqui mi caj i tilel ti lac tojlel mi juntiquilic.

¹⁵Tsa'ix c lu' q'uele. An toj bʌ winic mu' bʌ i seb jilel cha'an i tojel. An xjontolil mu' bʌ i jal'an c'ʌlʌl che' wen ñoxix anquese cabʌl i jontolil.

¹⁶Mach yomic cʌlʌx weñet, mi cʌlʌx cabʌl a ña'tibal, ame a lon jisan a bʌ.

¹⁷Mach yomic jontolet ja'el. Mach a cha'len bajche' tonto. ¿Yom ba ma' se' jilel che' max to i yorajlelic?

¹⁸Ña'tan bajche' yom ma' mel. Mele ja'el. Mach ma' cʌy a mel junchajp che' ma' tech yambʌ. Jini mu' bʌ i bʌc'ñan Dios, uts'at bajche' mi caj i yujtesan ti chajp ti chajp.

¹⁹Ñumen an i p'ʌtʌlel juntiquil winic am bʌ i ña'tibal bajche' lujuntiquil winicob año' bʌ i ye'tel.

²⁰Ma'anic ti pañimil mi juntiquilic mu' bʌ i mel chuqui uts'at ti pejtelel ora. Ma'anic toj bʌ mach bʌ anic mi' wis cha'len mulil.

²¹Mach a mucul ñich'tʌben i t'an a pi'ʌlob che' i bajñel jach woliyob ti t'an, ame a wubin che' woli' yʌlet a winic.

²²Wen a wujil jayyajlix tsa' wʌ'le a pi'ʌlob ja'el ti a pusic'al.

²³Tsa'ix c wen p'isi ti wenta pejtel j cʌntesʌntel. Tsac lon alʌ: Wersa com c taj cabʌl c ña'tibal, cho'on. Pero mach c tajayic.

²⁴Wen ñajt yubil. Wen tam. Wocol ti tajol. ¿Majqui mi mejlel i taj?

²⁵Ti pejtelel c pusic'al tsa' caji c sʌclan i sujmlel pejtel chuqui an. Tsa' jach c ñopo tontojʌch jini mu' bʌ i cha'len jontolil. Sojquem i jol jini mu' bʌ i mel i bʌ bajche' tonto.

²⁶An x'ixic yujil bʌ lotiya mu' bʌ i pʌy winicob yic'ot i ts'i'lel. Ñumen uts'at muq'uic i chʌmelob jini winicob. Wen ch'aj tsa cubibe i p'ʌtʌlel. I wentajʌch yac jini x'ixic cha'an mi' chuc winicob. Cadena tac i c'ʌb yilal cha'an mi' ñup'ob. Jini winic mu' bʌ i mel chuqui yom Dios mi caj i coltʌntel ame chujquic ti' jontolil, pero muq'uix i yochelob xmulilob ti' p'ʌtʌlel.

²⁷Subt'añon. Jiñʌch tsa' bʌ c ñopo ti chajp ti chajp. Ts'ita' jax anquese jal tsa cʌc'ʌ c bʌ ti' ñopol.

²⁸Ti mil winicob cʌñʌlo' bʌ c cha'an tsa jach c taja juntiquil uts'atax bʌ ti cʌñol, pero ma'anic tsac taja mi juntiquilic x'ixic.

²⁹Tsa' caji c ña'tan ja'el: Uts'at tsi' mele winicob Dios, pero ti jujuntiquilob tsi' xoyoyob i bijlel. Tsi' tajayob i sajtemal.