Read Chol Cantares 1 Bible Online

Cantares 1 - Chol bible

Cantares 1

¹Jiñʌch uts'at bʌ c'ay tsa' bʌ i mele Salomón. (Jini xch'oc c'ajtibil bʌ mi' cajel ti t'an:)

²Ts'ujts'ubeñon c choj. Mach junyajlic jach, come ñumen tsajʌch a ts'ujts'uya bajche' vino.

³Xojocña a wujts'il ti a bojñil. Uts'atax a c'aba' che' bajche' perfume woli bʌ jejbel. Jini cha'an jini xch'ocob mi' c'uxbiñetob.

⁴Pʌyʌyon majlel quic'otet. Yom majliconla ti ora. Pʌyʌyon ochel ti malil a wotot, c rey. Añonix ti' yotot rey. Tsi' pʌyʌyon ochel. Tijicña mi caj lac tem ajñel. Ñumen uts'at a c'uxbiya bajche' vino. Jini cha'an mi' laj c'uxbiñetob xch'ocob.

⁵Xch'ocob wʌ' bʌ chumuletla ti Jerusalén, q'ueleyonla. I'ic'on, pero c t'ojol jax. Tsa' ic'ayon ti q'uin che' bajche' manta bʌ otot i cha'an Cedar. (Jini rey Salomón:) Pero yulucña a pʌchilel che' bajche' seda bʌ pisil welel bʌ mu' bʌ i lich'ob ti' chañelal i jol Salomón. (Jini xch'oc:)

⁶Xch'ocob chumulet bʌ la ti tejclum, mach la' ts'a'leñon cha'an i'ic'on. Tsa' ic'ayon ti q'uin. Cʌscuñob tsi' mich'leyoñob. Tsi' chocoyoñob majlel ti e'tel ti ts'usubil. Tsaj q'uelbeyob i ts'usubil, pero ma'anic tsa' mejli j q'uel c cha'an bʌ.

⁷Subeñon c'uxbibilet bʌ c cha'an: ¿Baqui mi caj a pʌy majlel a wʌlac' ti buc'bal? ¿Baqui ma' wʌq'ueñob i c'aj i yo ti xinq'uinil? Ya' com majlel ja'el cha'an mic tajet. Lolom jach mic sʌclañet ñumel ti' tojlel i yʌlac' a pi'ʌlob. (Jini rey Salomón:)

⁸A t'ojol jax mij q'uelet. Ma'anic yambʌ x'ixic che' bajche'et ti pejtelel pañimil. Mi a wom tilel ba' añon, tsajcan majlel i bijlel cʌlac' ba' tsiquilix ocʌl. Che' jini mi caj a c'otel ti' lejchem pat tac i cha'an xcʌnta tiñʌme'ob. Ya' yom ma' pʌy majlel a tiñʌme' yic'ot i yal cha'an mi' cha'leñob buc'bal.

⁹Uts'atax mij q'uelet. A t'ojol bajche' jini ch'ʌlbil bʌ caballo i cha'an jini rey ti Egipto.

¹⁰Uts'atax a wut ch'ʌlʌl bʌ ti' tsutsel a jol lijlaw tac bʌ ti a quejlab. Uts'atax a bic' ch'ʌlbil bʌ ti pʌl bʌ i yuj.

¹¹Yom mi lac jalbeñet a wʌya' ti oro yic'ot ujʌl melbil bʌ ti plata. (Jini xch'oc:)

¹²Ñolol jini rey ti' ch'ac. Tijicña mi' yubin cujts'il tic bojñil.

¹³Lajalʌch jini c'uxbibil bʌ c cha'an bajche' woxol bʌ mirra joc'ol bʌ tic tajn ba'an c chu'. (Jini rey Salomón:)

¹⁴Lajal jini c'uxbibil bʌ c cha'an bajche' sut'yebil bʌ i nich pimel i c'aba' alheña tilem bʌ ti pʌc'ʌbʌl i c'aba' Engadi.

¹⁵C'uxbibilet bʌ c cha'an, a t'ojol jax. I t'ojol jax a wut, lajal bajche' x'ujcuts.

¹⁶Uts'at lac tots'lib wʌ' ti pepech jam.

¹⁷Jini ch'ujte' i wentajʌch i yoyel la cotot mi' yʌq'ueñonla i yʌxñilel. Jini te' am bʌ ti lac joytilel i wentajʌch i bojte'lel la cotot wʌ' ba' mʌcʌlonla.