Read Chol Cantares 8 Bible Online

Cantares 8 - Chol bible

Cantares 8

¹Cʌscuñetic, uts'atax. Che'ic jini, mic ts'ujts'ubeñet a wut. Che'ic jini, mach i wentajic yaño' bʌ. Ma'anic majch mi' tse'tañon mi juntiquilic.

²Cʌscuñetic, mux c pʌyet ochel ti' yotot c ña' cha'an ma' cʌntesañon. Che'ic jini, mi cʌq'ueñet a jap tsaj bʌ vino yic'ot i ya'lel granada.

³Uts'atax muq'uic i yʌc' jini ts'ej bʌ i c'ʌb ti yebal c jol, muq'uic i mec'on ti' ñoj.

⁴X'ixicob ti Jerusalén, mic subeñetla mach ma' xic'ben. La'to ajnic jinto che' yomix i pʌs i c'uxbiya. (Jini x'ixicob ti Jerusalén:)

⁵¿Majqui jini xch'oc mu' bʌ i tilel loq'uem bʌ ti jochol bʌ lum? Woli' licchocon i bʌ ti' quejlab jini c'uxbibil bʌ i cha'an. (Jini rey Salomón:) Tsac pʌyʌyet cha'an ma' c'uxbiñon che' ya'to añet ti yebal jini manzana te' ba' tsi' yʌc'ʌyet ti pañimil a ña' che' bʌ tsi' cha'le bajq'uel. (Jini xch'oc:)

⁶Pʌyʌyon ti junyajlel ti ñujpuñel. Otsañon ti a pusic'al cha'an mach loq'uicon ti pejtelel ora. Come mach jilic laj c'uxbiya che' cuxulontola. Mach yajpic che' mi lac chʌmel. Wen bʌbʌq'uen jax jini tsʌytsʌyña bʌ i pusic'al. Jini cʌlejem bʌ wen ch'ijiyem mi' cʌytʌl. Mi' lejmel i pusic'al che' bajche' c'ajc wen ticʌw bʌ tilem bʌ ti lac Yum.

⁷Mach yajpic i c'ʌc'al laj c'uxbiya ti tam bʌ ja'. Mi tsa' tili but'ja', mach mejlic i jisan. Mi an majqui yom i taj, mach jasʌlic pejtelel i chubʌ'an cha'an mi' mʌn. (Jini xch'oc:)

⁸An xch'oc bʌ quijts'in maxto bʌ i taja i colel. ¿Chuqui yom mi lac mel che' an majqui mi' c'ajtin? (Jini rey Salomón:)

⁹Mi maxto tsi' taja i colel, yom mi lac melben i yajñib. Yom mi lac ch'ʌl ti plata. Mi cabʌl yom i cʌntʌntel, mux lac ñup' ti tabla bʌ ch'ujte'. (Jini xch'oc:)

¹⁰X'ixiconix. Tsa'ix c taja j colel. Tsi' q'ueleyon ti' yutslel i pusic'al jini caj c'uxbiya.

¹¹An i ts'usubil Salomón ti Baalhamón. Tsi' yʌc'ʌ ti' wenta x'e'telob mu' bʌ i tojob ti mil tac jujuntiquil cha'an woli' c'ʌñob ti majan.

¹²Pero mi caj c junyajlel aq'uen c ts'usubil Salomón ti chejachi. La' i lot jini mil peso c cha'an bʌ. Mi caj cʌq'uen ja'el lujunc'al peso jini mu' bʌ i cʌntañob.

¹³C'uxbibilet bʌ c cha'an, uts'atax woli' yubiñob a t'an a pi'ʌlob, pero la' cubin ja'el.

¹⁴La' ti ora, c'uxbibilet bʌ c cha'an che' bajche' me'. La' ti' chañelal jini wits jini xojocña bʌ wits ba' lotol pejtel jini c'uxbil tac bʌ.