Read Chol Isaias 1 Bible Online

Isaias 1 - Chol bible

Isaias 1

¹Ti jim bʌ ora che' añob i ye'tel ti rey ya' ti Judá* jini Uzías, yic'ot Jotam, yic'ot Acaz yic'ot Ezequías, jini Isaías i yalobil Amoz tsi' q'uele ti espíritu jini winicob ya' ti Judá yic'ot ti Jerusalén. Lac Yum tsi' pʌsbe Isaías bajche' yilalob.

²Tsi' yʌlʌ: Ñich'tanla c t'an, añet bʌ la ti panchan yic'ot ti pañimil. Tsac lon cosa calobilob. Tsac lon cʌntayob. Wolix i chañ'esañob i bʌ tij contra.

³Jini wacax mi' cʌn i yum. Jini burro mi' wen cʌmben i yotot i yum ba' mi' taj i buc'bal. Pero Israel* ma'anic mi' ch'ʌmben isujm. Jini mero c cha'año' bʌ ma'anic mi' cʌñonob.

⁴Cabʌl jax i mul jini año' bʌ ti Judá. Cʌlʌx but'ulob jax ti jontolil. I yalobilob xñusa t'añob. Tsa'ix i ñajtesayob i bʌ ba' añon. Tsa'ix i ts'a'leyob jini Ch'ujul Bʌ i cha'an Israel.

⁵Tsa'ix i tʌts'ʌyob i bʌ tic tojlel. ¿Chucoch la' wom mic chʌn bajbeñetla ti asiyal? ¿Mu ba caj la' chʌn chañ'esan la' bʌ? Cabʌl i c'amʌjel la' jol. Tsa'ix junyajlel c'uñ'ayetla.

⁶C'ʌlʌl ti' la' xinjol yic'ot c'ʌlʌl ti' mal la' woc ma'anic la' c'oc'lel, lojwemetla, sit'iletla. Tsa' wen yʌx'a la' bʌc'tal, ñuqui ech'elix la' tsoy. Ma'anic majqui tsi' pixbeyetla. Ma'anic majqui tsi' bombeyetla ti aceite mi ti ts'ac cha'an mi' lajmel i c'uxel.

⁷Pujch'emix a lum Judá. Tsa'ix sujti ti c'ʌnc'ʌn. Tiquinix. Pulbilix a tejclum tac. Jini ñajt bʌ ch'oyolob woli' c'uxob i wut a pʌc'bal che' tulul a wut wola' q'uelob.

⁸Jini jach tsa' cʌle Sion, che' bajche' cʌybilix bʌ lejchempat ya' ti ts'usubil, che' bajche' cʌybilix bʌ i yotlel ixim ti cholel che' ujtemix i yorajlel c'ajbal. Tsa' cʌle che' bajche' tejclum joyol bʌ ti' contrajob, che'en lac Yum.

⁹Ts'ita jax tsa' cʌleyonla, mach oñonixla. Machic tsi' coltayonla i Yum Panchan yic'ot Pañimil, tsa' jisʌntiyonla che' bajche' Sodoma yic'ot Gomorra.

¹⁰Winicob año' bʌ la' we'tel ti Israel, lajaletla bajche' i yumob Sodoma yic'ot Gomorra. Wen ñich'tanla chuqui mi' yʌl lac Yum. Ubinla i mandar Dios.

¹¹Woli' yʌl lac Yum: ¿Chuqui to i ye'tel mi la' chʌn tsʌnsʌbeñon c majtan*? Anquese cabʌl, mach tijicñayic c pusic'al. Tsa'ix c'ojyi j q'uel la' majtan tac. Mach chʌn comix tat tiñʌme' yic'ot i lewil i yal wacax. Mux c bi'len i ch'ich'el tat wacax yic'ot alʌ tiñʌme' yic'ot i tat chivo.

¹²Mi la' lon tilel la' pʌs la' bʌ tic tojlel. Pero mach comic mi la' t'uchtan ili cajñib, come ma'anic mi la' mel la' pusic'al cha'an la' mul.

¹³Mach comix mi la' ch'ʌmbeñon tilel c majtan. Ts'a' mij q'uel i buts'il pom. Ts'a' mij q'ueletla che' mi la' tempan la' bʌ yic'ot la' pi'ʌlob cha'an mi la' melben i q'uiñilel jini tsiji' bʌ uw yic'ot i q'uiñilel c'aj o. Mach cujchix c cha'an la' mul. Mach tijicñayonic che' mi la' tempan la bʌ cha'an mi la' ch'ujutesañon.

¹⁴Mi la' lon mel q'uin ti' yorajlel tsiji' bʌ uw yic'ot ti yan tac bʌ ora. Mach cujchix c cha'an. Mach comix j q'uel.

¹⁵Che mi la' lon letsan la' c'ʌb tic tojlel cha'an mi la' pejcañon ti oración, mux caj c mʌy c wut. Anquese cabʌl mi la' cha'len oración, mi wisilic mi caj c jac'beñetla cha'an ti' caj stsʌnsajetla, xbec' ch'ich'etla.

¹⁶¡Pocox la' bʌ; sʌq'uesan la' bʌ! ¡Cʌyʌx la' mel jontolil ti' tojel c wut!

¹⁷¡Ñopox la' mel chuqui uts'at! Cʌntesan la' bʌ ti' melol jini toj bʌ ti' tojlel yaño' bʌ. Tiq'uila xjontolilob, coltanla jini p'ump'uño' bʌ yic'ot jini meba' alobob yic'ot meba' x'ixicob, che'en.

¹⁸Woli' chʌn al lac Yum: La' cula, la' lac tem cha'len t'an. Anquese wen chʌcts'eran jini la' mul, lajal mi caj i sujtel bajche' ña'al tsʌñal. Anquese wen chʌchʌc jini la' mul, lajal mi caj i sujtel bajche' wen sʌsʌc bʌ tsuts.

¹⁹Mi la' wom la' wʌq'ueñon la' pusic'al cha'an mi la' jac'beñon c t'an, mi caj la c'ux jini c'ax sumuc bʌ pʌc'ʌbʌl.

²⁰Pero mi mach la' womic, mi chʌn tsʌts la' pusic'al mi la' ñusʌbeñon c t'an, mi caj la' jilel ti espada ti' c'ʌb la' contrajob. Che' tsi' yʌlʌ lac Yum.

²¹Jerusalén, xuc'ul tsa' ajniyet ti ñaxan che' bajche' xuc'ul bʌ x'ixic, pero tsa'ix sujtiyetla ti sts'i'lel. Ti ñaxan wen tojet. Tsa' cha'le toj bʌ meloñel, pero wʌle tsa'ix p'ojliyob stsʌnsajob ti yojlil tejclum.

²²Ti ñaxan lajaletla bajche' plata, pero wʌle tsa'ix sujtiyetla ti misujelʌl. Ti ñaxan lajaletla bajche' vino, pero wʌle supetixla yilal.

²³Jini yumʌlob la' cha'an xñusa t'añob, i pi'ʌlobʌch xujch'. Mi ch'ʌmob taq'uin cha'an mi' mucbeñob i mul i pi'ʌlob. Mu' jach i sʌclañob i majtan. Ma'anic mi' wen coltañob jini meba'ob. Ma'anic mi' p'isob ti wenta i wocol t'an jini meba' x'ixicob.

²⁴Jini cha'an i Dios Panchan yic'ot Pañimil, jini P'ʌtʌl bʌ i cha'an Israel, woli' yʌl: A wila to, mi caj cʌq'ueñob i toj i mul pejtelel mu' bʌ i contrajiñoñob. I yorajlelix mij q'uextʌbeñob i mul j contrajob.

²⁵Mi caj j contrajiñetla. Mi caj c pul a bibi'lel ti bʌbʌq'uen bʌ c'ajc, cha'an mic junyajlel loc'san la' jontolil.

²⁶Mi caj c cha' aq'ueñet uts'at bʌ yumʌlob yic'ot toj bʌ xtoj'esayayob che' bajche' ti ñaxan. Che' jini mi caj i yʌlob: “Jiñʌch uts'at bʌ tejclum baqui mi' melob chuqui toj. Xuc'ul bʌ tejclum”, che'ob.

²⁷Mi caj j coltan jini año' bʌ ti Jerusalén ti toj bʌ meloñel. Ti toj bʌ c pusic'al mi caj j coltan jini mu' bʌ i cha' sutq'uiñob i bʌ tic tojlel.

²⁸Pero mi caj c bic'ti jisan jini xmulilob mu' bʌ i juch'tec'ob c t'an. Mi caj i jilelob pejtel mu' bʌ i cʌyoñob.

²⁹Mi caj la' wen ubin quisin cha'an tsa' la' ch'ujutesa dioste' tac ti yebal c'olol te'. Mi' caj ti chʌc'an la' wut cha'an tsa' la' ñusayon ya' ti jini pʌc'ʌbʌl tac tsa' bʌ la' mula.

³⁰Mi caj la' cʌytʌl che' bajche' jini c'olol te' laj tiquinix bʌ i yopol, yic'ot pʌc'ʌbʌl mach bʌ anix mi' mujlel ti ja'.

³¹Jini p'ʌtʌl bʌ winic lajal jax mi caj i majlel bajche' tiquin bʌ jam. Jini i melbal lajalʌch bajche ts'ʌplaw bʌ nich c'ajc mu' bʌ caj i jisan. Ma'anic majqui mi caj i yʌp.