Read Chol Isaias 11 Bible Online

Isaias 11 - Chol bible

Isaias 11

¹Mi caj i chilbentel i ye'tel i p'olbal David che' bajche' mi' sejq'uel colem te'. Pero mi' cajel ti pasel junts'ijt i Buts te'. Mi caj i yʌc' juntejc i C'ʌb.

²Mi caj i yajñel Ch'ujul bʌ i Ch'ujlel Dios ti' tojlel jini Winic. Mi caj i yʌq'uentel wen bʌ i ña'tʌbal yic'ot cabʌl i pusic'al, yic'ot i ye'tel ti cʌntesa yic'ot i p'ʌtʌlel, yic'ot wen bʌ i c'ʌjñibal, yic'ot i bʌc'ñʌntel lac Yum.

³Mi caj i mulan i jac'bentel lac Yum. Mach jelchojquic mi caj i mel winicob. Ma'anic mi caj i ñop u'yaj t'an yic'ot lot.

⁴Mi caj i coltan jini p'ump'uño' bʌ yic'ot jini utso' bʌ mu' bʌ i tic'lʌntelob. Ti' t'an jach mi caj i jisan jini tsʌtso' bʌ i pusic'al yic'ot xjontolilob.

⁵Mi caj i cha'len yumʌl ti toj yic'ot ti' xuc'tilel i pusic'al.

⁶Ti jim bʌ ora jini bʌte'el ts'i' mi caj i yajñel yic'ot tiñʌme'. Jini bajlum mi caj i tem pʌctʌl yic'ot chivo. Temel mi' yajñel alʌ wacax yic'ot jujp'em bʌ wacax yic'ot jini bajlum. Mi caj i laj jac' i pʌyol ti alʌl ch'iton.

⁷Jini wacax yic'ot jini jontol bʌ bʌte'el temel mi' cajel ti buc'bal. Temel mi caj i yajñel i yal. Jini bajlum mi caj i c'ux jam che' bajche' wacax.

⁸Jini alʌl woli to bʌ ti chu' mi' cajel ti alʌs ya' ba'an jini lucum. Jini alob yujil bʌ xʌmbal mi caj i yotsan i c'ʌb ti' c'u' lucum. Mach i tajayic wocol.

⁹Ya' ti ch'ujul bʌ wits c cha'an ma'anix chuqui mi' lojwel, ma'anix chuqui mi' yʌc' ti asiyel. Che' bajche' mi' bujt'el i ch'eñal lum ti ja' lajal mi caj i bujt'el pañimil ti winicob x'ixicob mu' bʌ i cʌñob lac Yum.

¹⁰Ti jim bʌ q'uin mi caj i wa'tʌl i p'olbal David mu' bʌ caj i cha'len coltaya ti pejtelel pañimil. Cabʌl winicob x'ixicob mi caj i jac'ob. Wen uts'atax mi caj i q'uelob i lumal jini Ñuc Bʌ.

¹¹Ti jim bʌ ora lac Yum mi caj i cha' sʌts' i c'ʌb cha'an mi' pʌy tilel i cha'año' bʌ tsa' bʌ cʌleyob ti Asiria, yic'ot ti Egipto, yic'ot ti Patros, yic'ot ti Etiopía, yic'ot ti Elam, yic'ot ti Sinar, yic'ot ti Hamat, yic'ot ti lum tac joyol bʌ ti colem ja' ti' ñajtilel pañimil.

¹²Jini winicob x'ixicob mach bʌ anic tsi' cʌñʌyob Dios mi caj i c'otelob ba'an Mesías. Mi caj i cha' tempañob tilel jini israelob yic'ot i pi'ʌlob ti Judá pujquemo' bʌ ti pejtelel pañimil.

¹³Israel yic'ot Judá mi caj i cʌyob leto. Muc'ʌch i lajmel tsʌytsʌyña bʌ i pusic'alob. Ma'anix mi caj i contrajiñob i bʌ. Efraín ma'anix mi caj i mulʌben i ñuclel Judá. Judá ma'anix mi caj i tic'lan Efraín.

¹⁴Temel mi caj i majlel i jisañob jini filisteojob ya' ti' lumal ba' mi' bʌjlel q'uin. Temel mi caj i jisañob jini año' bʌ ti lum tac ba' mi' pasel q'uin. Mi caj i cha' ch'ʌmob i lum tsa' bʌ i chilbeyob Edom yic'ot Moab yic'ot Amón. Mi caj i yumʌntelob i cha'añob.

¹⁵Lac Yum mi caj i tiquesan jini Chʌchʌc bʌ Ñajb am bʌ ti Egipto. Mi caj i sʌts' i c'ʌb ya' ti colem ja' i c'aba' Eufrates cha'an mi' t'oxtʌl ti wucts'ijt i xʌc' jini ja', cha'an mi' c'axelob winicob.

¹⁶Lac Yum mi caj i yʌc' colem bij cha'an mi' cha' tilelob jini israelob tsa' bʌ cʌleyob ti Asiria che' bajche' tsi' jambeyob i bijlel i ñojte'elob che' bʌ tsa' loq'uiyob israelob ti Egipto.