Read Chol Isaias 13 Bible Online

Isaias 13 - Chol bible

Isaias 13

¹Dios tsi' pʌsbe Isaías (i yalobil Amoz) ti espíritu chuqui mi caj i tumben Babilonia. Tsi' yʌlʌ:

²Ya' yom mi la' letsan bandera ya' ti' chañelel bujtʌl. C'am yom mi la' wotan tilel soldadojob. Lich'c'ʌbanla tilel cha'an mi' yochelob ti' ti' tejclum yic'ot ti' yotot tac jini ñuco' bʌ winicob ti Babilonia.

³Joñon Yumʌlon. Tsa'ix c yajca c winicob cha'an mi' melob che' bajche' tsac ña'ta c mel tic mich'ajel. Tsa'ix c pʌyʌ tilel jini p'ʌtʌlo' bʌ soldadojob. Chan mi' melob i bʌ cha'an mach yujilobic bʌq'uen, che'en.

⁴Ubinla, ju'ucñayob ti t'an bajc'ʌl soldadojob ya' ti wits. Jiñʌch i t'an cabʌl colem tejclum tac woliyo' bʌ ti xʌmbal. I Yum Panchan yic'ot Pañimil tsa'ix i pʌyʌyob tilel loq'uemo' bʌ ti colem tejclum tac ti ñajtʌl. Jiñobʌch i ye'tijib lac Yum mu' bʌ caj i c'ʌn ti la' contra añet bʌ la ti Babilonia. Mi caj i jisan pejtel la' lumal ti' mich'lel.

⁶Cha'lenla oñel cha'an bʌbʌq'uen jax jini p'ʌtʌl bʌ Dios, come lʌc'ʌlix i yorajlel mi caj i jisañetla.

⁷Tsiltsilñayetla ti bʌq'uen ti la' pejtelel. C'uñobix jini ch'ejlo' bʌ i pusic'al.

⁸Bʌbʌq'uen jax mi la' wubin. Cabʌl mi la' mel la' pusic'al. Mi la' cha'len bajq'uel che' bajche' x'ixicob. Mi la' lon q'uel la' bʌ, chʌchʌc la' wut cha'an quisin. Mi' toj sajtel la' pusic'al.

⁹Come talix i q'uiñilel lac Yum. Jiñʌch bʌbʌq'uen bʌ q'uin che' mi' pʌs i mich'ajel. Mi caj i jisan pejtel chuqui an ti pañimil yic'ot xjontolilob ja'el.

¹⁰Ma'anix mi caj i pʌs i c'ʌc'al ec' tac mi jinic q'uin mi jinic uw. Ic'atax jini panchan.

¹¹Mi caj cʌq'ueñob i toj i mul jini año' bʌ ti pañimil. Mi caj i tojob i mul jini jontolo' bʌ. Mi caj c jisʌbeñob i p'ʌtʌlel jini chan bʌ mi' pʌsob i bʌ yic'ot i ch'ejlel i pusic'al jini yujilo' bʌ jisaya.

¹²Che' bʌ tsa'ix c jisayob, ma'anix jaytiquil mu' bʌ i cʌytʌlob. Wocol ti tajol che' bajche' oro, che' bajche' jini fino bʌ oro letsem bʌ i tojol, tilem bʌ ti Ofir.

¹³Come mi caj cʌc' ti ñijcʌyel panchan yic'ot pañimil cha'an cabʌl c mich'ajel.

¹⁴Jini soldadojob tilemo' bʌ ti Babilonia mi caj i lujbañob ti puts'el che' bajche' me' mu' bʌ la' wajñesan. Mi caj i pam pujquelob che' bajche' tiñʌme' mach bʌ anic i yaj cʌntaya.

¹⁵Pejtelel mu' bʌ i tajtʌlob mi caj i tsʌnsʌntelob ti espada. Mi caj i yajlelob.

¹⁶Ti' tojel i wutob mi caj i chojquelob jubel ti lum i yalobilob. Mi caj i tsʌnsʌntelob. Mi caj i chilbentelob i chubʌ'an ti' yotot. Mi caj i tic'lʌntelob i yijñam.

¹⁷Awilan mi caj c xic' tilel jini medojob cha'an mi' contrajiñob. Ma'anic mi caj i jac'ob i pʌyol ti taq'uin mi plata mi oro.

¹⁸Jini medojob ma'anic mi caj i p'untañob jini ch'itoñob ti Babilonia mi xch'ocob mi alʌlob.

¹⁹Jini colem tejclum Babilonia, am bʌ cabʌl i ñuclel ti pañimil, jini i t'ojol jax bʌ ti q'uelol, junlajal mi' caj ti ajñel che' bajche' Sodoma yic'ot Gomorra ba' ora Dios mi' jisan.

²⁰Ma'anix mi' cajelob ti chʌn chumtʌlob winicob ti Babilonia mi i yalobilob, mi i butsob ti pejtelel ora. Jini xñumelob ma'anic mi caj i jijlelob ya'i. Jini xcʌnta tiñʌme' ma'anic mi caj i pʌy tilel i tiñʌme'.

²¹Mi caj i yajñel bʌte'el ya' ti jochocña bʌ otot. Ya'i mi caj i yajñel jini ja'al pech. Xibajob mi caj i cha'leñob son ya'i.

²²Jini bʌte'el ts'i' yic'ot jontol bʌ bʌte'el mi caj i yajñel ti' yotot tac jini yumʌlob ti Babilonia. Lʌc'ʌlix jini q'uin. Mach jalix mi' caj ti ujtel pejtel iliyi ti' tojlel Babilonia, che'en lac Yum.