Read Chol Isaias 16 Bible Online

Isaias 16 - Chol bible

Isaias 16

¹Jini tsa' bʌ puts'iyob loq'uel ti Moab cha'an mi' majlelob ti Sela woli' chocbeñob majlel alʌ tiñʌme' tac jini rey ti Judá i wenta tojoñel.

²Che' bajche' mi' lon cha'len wejlel jini mut mach bʌ anix i c'u', che'ʌch ja'el mi caj i ñumelob jini x'ixicob moabob ya' ti c'axib ja' am bʌ ti colem ja' i c'aba' Arnón.

³Jini winicob tsa' bʌ i ch'ʌmʌyob majlel tiñʌme' ya' ti Jerusalén woli' yʌlob: A wocolic aq'ueñon lojon c puts'ib. Coltañon lojon. Mach a wʌc'on lojon ti' c'ʌb j contra lojon.

⁴La' ajnicob ti a tojlel c pi'ʌlob lojon mach bʌ añobix i yotot ti Moab. Yom ma' coltan jini woli bʌ i tic'lʌntelob. Dios mi caj i yʌq'ueñet a chobejtʌbal, mi tsa' wʌq'ueyon lojon ba' mic chumtʌl lojon jinto mi' lajmel c tic'lʌntel. Che jini Dios mi caj i wa'chocon i yumʌntel David cha'an mi' yajñel ti pejtelel ora. Juntiquil xuc'ul bʌ, jini toj bʌ, mi caj i ch'ʌmben i ye'tel David, che'ob jini ch'oyolo' bʌ ti Moab.

⁶Tsa'ix la cubi chan mi' melob i bʌ jini moabob. Ts'a' mi' q'uelonla. Mi' p'ajonla.

⁷Pero mach chʌn che'ix. Wolix i cha'leñob uq'uel jini moabob. Woli la' wuc'tan jini año' bʌ ti Kirhareset cha'an ma'anix mi' melbeñetla jini dulce xʌbʌl ti ts'usub. C'uñix la' pusic'al.

⁸Woli la' cha'len uq'uel come cʌybilix la' chol ya' ti Hesbón yic'ot la' ts'usubil ya' ti Sibma. I yumob soldadojob tsa'ix i jisayob jini wen uts'at bʌ ts'usubil. Tsa'ix c'oti i jisañob ts'usubil c'ʌlʌl ti Jazer am bʌ ti' tiquiñal pañimil yic'ot c'ʌlʌl ti colem ñajb.

⁹Jini cha'an mij caj ti uq'uel cha'an Jazer yic'ot cha'an Sibma. Ma'anix i ts'usubilob. Mi caj c muletla ti' ya'lel c wut winicob añet bʌ la ti Hesbón yic'ot ti Eleale, come tsa' jisʌnti i wut la' te' yic'ot la' c'ajbal ti guerra.

¹⁰Ma'anix i tijicñʌyel la' pusic'al. Ma'anix majqui mi' cha'len c'ay ti ts'usubil. Ma'anix majqui mi' chʌn yʌts' i ya'lel ts'usub ya' ti' yajñib, come tsa'ix cʌc'ʌ ti jilel i tijicñʌyel la' pusic'al.

¹¹Jini cha'an wen ch'ijiyem c pusic'al mi cubin cha'an Moab. Mic p'untan jini año' bʌ ti Kirhareset.

¹²Jini año' bʌ ti Moab mi caj i melob oración ti wocol t'an ti' tojel i diosob ya' ti bujtʌl tac. Pero lolom jach. Mach i jac'ʌyobic.

¹³Jiñʌch i t'an lac Yum tsa' bʌ i yʌlʌ cha'an Moab. Pero wʌle lac Yum wolix i yʌl uxp'ejl to jab mi caj i jilel i ñuclel Moab. Ts'ita jax jini winicob x'ixicob mu' bʌ caj i cʌytʌlob. Ma'añobix i ñuclel.