Read Chol Isaias 17 Bible Online

Isaias 17 - Chol bible

Isaias 17

¹Jiñʌch i t'an Dios ti' contra Damasco jini colem tejclum ti Siria: Awilan, wolix ti pujch'el Damasco. Pucu jejmenix jini tejclum. Mux i sujtel ti mate'el.

²Cʌybilix i tejclum tac Aroer. Tsa' sujti ti jamil ba' mi' cha'len buc'bal tiñʌme'. Ma'anix majch mi' bʌc'tesañob che' mi' ñoltʌlob ti wʌyel.

³Mi caj i sʌc jilel i p'ʌtʌlel Israel yic'ot i yumʌntel Damasco yic'ot i colojbal winicob ti Siria. Che' bajche' mi caj i jilel i ñuclel Israel, che' ja'el mi caj i jilel i ñuclel Siria, che'en i Yum Panchan yic'ot Pañimil.

⁴Ti jim bʌ q'uin mi' cajelob ti wi'ñal israelob. Mi' caj ti jilel i ñuclel.

⁵Mi caj i cʌytʌl Israel che' bajche' cholel che' lotbilix i wut, che' bajche' juntejc cha'tejc ixim ya' ti joctʌl i c'aba' Refaim che' ujtemix c'ajbal.

⁶Ts'i'ta jax mi caj i cʌytʌlob winicob che' bajche' ts'i'ta jax mi' cʌytʌl i wut olivote' che' ujtemix ti tujq'uel, wʌjʌl p'ʌcʌl jax, che'en lac Yum i Dios Israel.

⁷Ti jim bʌ ora mi caj i ña'tañob i Dios tsa' bʌ i meleyob. Mi caj i q'uelob ti ñuc jini Ch'ujul Bʌ ti Israel.

⁸Ti jim bʌ ora mach chʌn cʌyʌlix i pusic'al ti pulʌntib tac tsa' bʌ i wa'chocoyob mi ti jini diosob tsa' bʌ i meleyob. Mach chʌn c'uxix mi caj i yubiñob i yejtal tac Asera mi i yejtalic q'uin.

⁹Jochocña mi caj i cʌytʌl jini ts'ajquibil bʌ tejclum tac, che' bajche' xchumtʌl tac ya' ti wits che' puts'emix i yum. Che'ʌch tsa' cʌle i tejclum tac amorreojob che' bʌ tsi' puts'tayob jini israelob tsa' bʌ tiliyob ti' contra. Jini israelob ja'el mi' caj i jisʌntelob.

¹⁰Israelob, tsa' ñajʌyi ti la' pusic'al jini Dios tsa' bʌ i coltayetla. Jini cha'an mi' caj ti ujtel pejtel iliyi. Tsa' la' cʌyʌ jini xajlel yilal mu' bʌ i joy mʌctañetla. Tsa' la' mele parque cha'an dioste' che' bajche' mi la' mulan. Tsa' la' pʌc'ʌ jini pac' ñajt bʌ ch'oyol.

¹¹Ti' yorajlel pac' mi la' wen cʌntan. Seb to mi' caj ti pasel. Mi' cajel ti ñich ti jini jach bʌ q'uin, pero ma'anic mi caj la' tuc'ben i wut. Ma'anic mi caj la' taj jini tsa' bʌ la' lon ña'ta. Mi caj la' taj cabʌl la' tsic pusic'al yic'ot la' c'uxel mach bʌ i ñopoyic ts'ac.

¹²Ubinla i t'an cabʌl soldadojob. Ju'ucñayob ti xʌmbal. Talob ti ajñel cha'an mi' yochelob ti' lumal Israel.

¹³Anquese ju'ucñayob che' bajche' colem ñajb, Dios mi caj i tic'ob. Mi caj i puts'elob majlel che' bajche' ts'ubejn mu' bʌ i wejlan ic' ya' ti pam wits.

¹⁴Che' ti ic'an cabʌlix i bʌq'uen jini israelob, pero che' ti sʌc'an ma'añobix i contrajob. Che'ʌch mi caj i jisʌntelob jini mu' bʌ i tic'lañonla yic'ot jini mu' bʌ i xujch'ibeñonla lac chubʌ'an.