Read Chol Isaias 18 Bible Online

Isaias 18 - Chol bible

Isaias 18

¹P'ump'un jini lum ya' ti ñajtʌl ba' mi' tejchel colem ja' i c'aba' Nilo. Ya' mi' cha'leñob xʌmbal barco tac lich'il bʌ i pislel mu' bʌ i choc majlel ic'.

²Chocbilob majlel suboñelob mi' pam ñumelob ya' ti colem ja'. Sujtenla ti ora, suboñelob, ya' ba' chumulob winicob wen chaño' bʌ, wen bʌc'ñʌbilo' bʌ, mu' bʌ i cha'leñob jisaya ti lʌc'ʌl yic'ot ti ñajtʌl. T'oxbil i lumal ti colem ja'.

³Winicob chumulo' bʌ ti pejtelel pañimil, q'uelela che' mic letsan i señajlel guerra ya' ti wits. Che' mic wus trompeta, ubinla cha'an mi la' tempan la' bʌ.

⁴Come lac Yum tsi' subeyon: Wʌ' ba' chumulon mi caj c ñajti q'ueletla. Ñʌch'ʌlon che' bajche' jini sʌctojan bʌ i sʌclel q'uin che' bʌ tsa'ix ñumi ja'al, yic'ot che' bajche' i yowix lum che' ti' yorajlel ticwal.

⁵Pero che' yomix cajel c'ajbal, che' yajlemix i nich, che' wolix i c'ʌñ'an jini ts'usub, mi caj c bʌc' jisan la' contrajob che' bajche' mi la' porajin jini ts'usubil che' mi la' tsepben loq'uel i c'ʌb.

⁶Mi caj i chojquelob la' soldadojob ya ba'an te'lemut yic'ot ba'an bʌte'el cha'an mi' c'uxob. Jini xta'jol mi caj i c'uxbeñob i bʌc'tal che' ti' yorajlel ticwal. Jini bʌte'el tac mi caj i c'uxbeñob i bʌquel che' ti' yorajlel tsʌñal, che'en lac Yum.

⁷Ti jim bʌ ora mi caj i ch'ʌmben tilel i majtan lac Yum jini chaño' bʌ winicob, jini bʌc'ñʌbilo' bʌ, chumulo' bʌ ti yan tac bʌ lum ti lʌc'ʌl yic'ot ti ñajtʌl. An cabʌl i p'ʌtʌlel. T'oxbil i lum cha'an colem ja'. Mi caj i ch'ʌmbeñob tilel i majtan lac Yum wʌ' ti Jerusalén ti wits Sion ba' mi' c'uxbintel i c'aba' lac Yum.