Read Chol Isaias 21 Bible Online

Isaias 21 - Chol bible

Isaias 21

¹Jiñʌch tsa' bʌ pʌsbenti Isaías ti' contra Babilonia: Che' bajche' jini sutujt ic' mi' tilel ti sur, che' ja'el mi caj i loq'uel tilel wocol ti tiquiñal pañimil ba' bʌbʌq'uen jax pañimil.

²C'ax bʌbʌq'uen jax jini tsa' bʌ j q'uele. Jini yujil bʌ i chon i pi'ʌl woli' chijtan. Jini yujil bʌ jisaya woli ti jisaya. Mi caj la' jisʌntel. Talob i contrajiñetla jini elamob yic'ot jini medojob. Mi' caj ti jejmel i p'ʌtʌlel Babilonia. Mi' caj ti lajmel i yajcʌn jini cʌchʌlo' bʌ año' bʌ ti' wenta Babilonia.

³Cabʌl woli cubin wocol che' bajche' x'ixic che' woli ti bajq'uel. Mi' toj sajtel c pusic'al cha'an jini wocol tsa' bʌ cubi tsa' bʌ j q'uele.

⁴Ma'anix c pusic'al yubil. C'uñatax pañimil. Cabʌl woliyon ti bʌq'uen. Che' ti ic'ajel tsiltsilñayon mach mejlic j c'aj co.

⁵Chajpʌbeñob i bʌl i ñʌc' jini yumʌlob. La' i cha'leñob we'el uch'el. Ch'ojyenla ti ora. Chajpan la' bʌ ti guerra, come ix tilel la' contraj.

⁶Lac Yum tsi' subeyon: Cucu wa'chocon xcʌñan cha'an mi' q'uel chuqui woli' yujtel.

⁷Che' mi' q'uel winicob woliyo' bʌ ti xʌmbal majlel ti carreta yic'ot c'ʌchʌlo' bʌ mu' bʌ i majlelob ti cha'cha'cojt caballo, yic'ot motocña bʌ winicob c'ʌchʌlo' bʌ ti burro yic'ot ti camello, muc'ʌch i ña'tan jiñʌch woli bʌ cʌl, che'en lac Yum.

⁸Jini cha'an tsac wa'choco xcʌnta tejclum ti chan bʌ q'ueloñib. Tsa' caji ti t'an jini xcʌñan: Cabʌl q'uin yic'ot cabʌl ac'ʌlel wʌ'ix añon ti que'tel. Woli j q'uel pañimil.

⁹Q'uele ya' tsoltsolña tilel winicob c'ʌchʌlo' bʌ ti caballo ti cha'cha'cojt yic'ot motocña bʌ i pi'ʌlob, che'en. Che' jini juntiquil tsa' caji' yʌl: Xyajli, xyajli Babilonia. Laj c'ʌsquijemix i diosob, pam pujquem tac ti lum, che'en.

¹⁰C pi'ʌlob tic'lʌbilo' bʌ, lajal tsa' la' ñusa wocol che' bajche' trigo mu' bʌ i jajts'el. Pero tsa'ix c tsictesʌbeyetla pejtel chuqui tsa cubi ti lac Yum. Jiñʌch i Yum Panchan yic'ot Pañimil, i Dios israelob.

¹¹Jiñʌch i t'an Dios ti' contra Edom. Ya'an winic ti Seir wits woli' chʌn c'ajtibeñon: “Xcʌntaya, ¿jayp'ejl to ora mi' sʌc'an? ¿Jayp'ejl to ora mi' sʌc'an?” che'en.

¹²Jini xcʌntaya tsi' jac'be: “Talix jini sʌc'ajel (jiñʌch i coltʌntel winicob mu' bʌ i tsajcañob lac Yum). Talix ac'ʌlel ja'el (jiñʌch i jilibal yaño' bʌ). Sʌclan la' Yum. Yom mi la' cha' tilel cha'an mi la' cha' c'ajtin”, che'en.

¹³Jiñʌch i t'an Dios ti' contra jini ch'oyolo' bʌ ti Dedán c'ʌchʌlo' bʌ ti camello ya' ti Arabia. Wersa mi caj la' cʌy bij cha'an mi la' mujcun la' bʌ ti' tiquiñal pañimil ya' ti Arabia.

¹⁴La'la, winicob chumulet bʌ la ti Tema. Ch'ʌmbeñob tilel waj yic'ot ja' jini woliyo' bʌ ti puts'el.

¹⁵Come woli' puts'tañob jini espada yic'ot jini sʌts'bil bʌ jalʌjb, yic'ot jini bʌbʌq'uen bʌ guerra.

¹⁶Tsi' yʌlʌ lac Yum: Jump'ejl jab mi caj la' wubin wocol ti' c'ʌb la' contra. Che' jini mi caj i jilel i p'ʌtʌlel Cedar yic'ot pejtel i ñuclel, che'en.

¹⁷Che' jini ma'anix jaytiquil mi' cʌytʌl ti Cedar yujilo' bʌ julbʌl ti jalʌjb. Mux i cʌytʌl cha'tiquil uxtiquil jach. Che' tsi' yʌlʌ lac Yum i Dios Israel.