Read Chol Isaias 24 Bible Online

Isaias 24 - Chol bible

Isaias 24

¹Awilan lac Yum mi caj i jisan a lumal, Judá. Mi caj i yʌc' ti sujtel ti mate'el. Mi caj i puc majlel winicob ti pejtelel pañimil.

²Junlajal mi caj i yochelob ti meloñel motomajob yic'ot winicob x'ixicob, mozojob yic'ot yumʌlob, criadajob yic'ot i co'ob, xmʌñoñelob yic'ot xchoñoñelob, xbet taq'uiñob yic'ot jini mu' bʌ i c'ajtiñob taq'uin.

³Mi caj i laj jochtiyel a lumal. Ma'anic chuqui mi caj i cʌytʌl. Lac Yum tsa'ix i yʌc'ʌ i t'an.

⁴Pujch'emix pañimil cha'an i mulob winicob x'ixicob. Tiquinix jini pʌc'ʌbʌl tac, ma'anix ja'al. Cabʌl mi' p'ojlel jontolil. Jini ñuco' bʌ tsa'ix i socbeyob i mandar Dios. Tsa'ix i cʌyʌyob jini xuc'ul bʌ i t'an mu' bʌ i yajñel ti pejtelel ora.

⁶Jini cha'an Dios tsi' jisʌbe i c'ʌjñibal lum. Tsi' yʌc'ʌ ti wocol jini ya' bʌ chumulob. Wen jamʌl jax pañimil. Ma'anix jaytiquil mu' bʌ i cʌytʌlob.

⁷Ch'ijiyem i pusic'al. Mach yujilobix c'ay yic'ot son, come ma'anix mi' yʌc' i wut jini ts'usubil. Mach jastiyix i ya'lel ts'usub.

⁸Ma'anix tsiquil i t'an música mu' bʌ i jajts'el, mi i t'an arpa. Ma'anix tijicña bʌ q'uin.

⁹Ma'anix mi' cha'leñob c'ay. Ma'anix mi' japob vino, come ch'ijiyemob. Mi' c'ajtesañob i tijicñʌyel ti wajali.

¹⁰Jisʌbilix jini tejclum. Ñet'bil tac ti candado pejtelel otot ame ochicob xujch'.

¹¹Motocñayob winicob ti calle, woli' wersa c'ajtiñob vino. Ma'añobix i tijicñʌyel i pusic'al.

¹²Jisʌbilix jini tejclum. Jejmenix i puertajlel tac.

¹³Lajal mi caj i yujtel ti' tojlel winicob che' bajche' ti olivojil che' ujtemix i tuc'ob. Ts'ita jax mi caj i cʌytʌlob winicob.

¹⁴Pero jini mu' bʌ i cʌytʌlob mi' cajelob ti c'ay, tijicñayob i pusic'al. Jini ya' bʌ añob ba' mi' bʌjlel q'uin mi caj i c'ʌyiñob i ñuclel Dios.

¹⁵Jini año' bʌ ba' mi' pasel q'uin mi caj i subob i ñuclel Dios. C'ʌlʌl ti ñajtʌl tsiquil i t'an i c'ay tac jini woli bʌ i c'ʌyiñob i ñuclel jini Toj Bʌ. Pero ch'ijiyemon, come anto jontolil yic'ot lot ti petol pañimil.

¹⁷Bʌbʌq'uen tac bʌ yic'ot tojmulil woli to i pijtan jini chumulo' bʌ ti pañimil.

¹⁸Che' mi la' puts'el cha'an bʌq'uen, mi caj la' yajlel ti ch'en. Mi tsa' loq'uiyetla ti ch'en, mi caj la' yajlel ti yambʌ wocol, come tal wocol ti la' contra chocbil tilel ti panchan. Mi' ñijcʌyel pañimil ba' añet.

¹⁹Mi caj i yʌsiyel pañimil. Ma'anix chuqui wen. Ma'anix chuqui xuc'ul. Cʌlʌx jax mi caj i ñijcʌyel lum.

²⁰Ticʌbexel mi caj i yajñel pañimil che' bajche' xyʌc'ʌjel. Mi caj i ñijcʌyel che' bajche' pisil bʌ otot ti p'ʌtʌl bʌ ic'. Mi caj i jejmel. Ma'anix mi caj i cha' tejchel cha'an wen alatax i mul winicob.

²¹Ti jim bʌ q'uin lac Yum mi caj i yʌq'ueñob i toj i mul jini sajtemo' bʌ ángelob año' bʌ ti chan yic'ot jini yumʌlob año' bʌ ti pañimil.

²²Mi caj i much'quiñob tilel che' bajche' xñujp'elob cha'an mi' yotsañob ti ch'en jinto che' i yorajlelix meloñel.

²³Lac Yum am bʌ cabʌl i ñuclel mi caj i cha'len yumʌl ti Jerusalén ya' ti Sion wits. Jini ñoxo' bʌ mi caj i q'uelob i ñuclel. Mi caj i yajpel yilal i c'ʌc'al jini q'uin yic'ot jini uw cha'an i sʌclel i ñuclel lac Yum.