Read Chol Isaias 27 Bible Online

Isaias 27 - Chol bible

Isaias 27

¹Ti jini tal to bʌ ora lac Yum mi caj i c'ʌn jini bʌbʌq'uen bʌ espada am bʌ ti' c'ʌb cha'an mi' tic'lan jini jontolo' bʌ. Mi caj i mʌjlel i cha'an.

²Ti jim bʌ q'uin la' i cha'leñob c'ay jini año' bʌ ti Judá che' loq'uemobix ti' p'ʌtʌlel i contra. La' i c'ʌyiñob i ts'usubil lac Yum: “A Dioson Yumʌlon. Wolij cʌntan Israel che' bajche' ts'usubil. Mic mul ti ja' ti jujump'ejl q'uin. Ti q'uiñil ti ac'ʌlel mic wets' loq'uel j contrajob ame anic chuqui mi' tumbeñet.

⁴Ma'anix c mich'ajel ti contra Israel. Muq'uic i pim'an c ts'usubil, mi caj cʌc'ñan. Mi caj c choc ti c'ajc jini mach bʌ wenic. Mi yom i c'ajtibeñon i coltʌntel, la' tilic i cha' mel i bʌ quic'ot”. Che'ʌch yom mi' cha'leñob c'ay.

⁶Tal i yorajlel che' mi caj i wen ac' i wi' jini pʌc'ʌb Jacob. Che' wen chucul ti lum i p'olbal Jacob, mi caj i loq'uel i nich. Mi caj i pam pujquel i wut ti pañimil.

⁷I Dios israelob tsi choco majlel ti cʌjchel i cha'año' bʌ, pero mach lajalic tsi' yʌq'ueyob i yubin wocol israelob bajche' yan tac bʌ tejclumob, i contrajob israelob. P'isbil jach tsi' tsʌnsayob. Come lac Yum tsi' yʌq'ueyob i toj i mul che' bʌ tsi' chocoyob majlel ti cʌjchel ti ñajtʌl. Tsi' pʌsʌ i bʌ ti' contra che' bʌ tsi' wets'eyob majlel ti' mich'ajel che' bajche' p'ʌtʌl bʌ ic' loq'uem bʌ ba' mi' pasel q'uin.

⁹Che'ʌch tsi' pocbeyob loq'uel i mul Jacob. Tsi' jisa pejtelel jini dioste' yic'ot pulʌntib, yic'ot oy tac ba' tsi' ch'ujutesayob q'uin, cha'an ma'anix mi' chʌn cha'leñob jini quisintic jax bʌ. Tsi' yʌc'ʌ ti bic'tiyel jini xajlel am bʌ ti pulʌntib cha'an ma'anic mi' chʌn ch'ujutesañob.

¹⁰Che' jini ñʌch'ʌlix jini colem tejclum joyol bʌ ti ts'ajc. Cʌybilix jini otot tac. Pimix i pam otot. Woliyob ti buc'bal wacax. Ya' mi' wʌyelob.

¹¹Lajal jini tejclum che' bajche' yajlem bʌ te', tiquinix bʌ. Talob x'ixicob i xot'ob. Mi' tempañob cha'an si'. Ma'añobic i pusic'al jini winicob x'ixicob. Ma'añobic i ña'tʌbal. Jini cha'an Dios tsi' cʌyʌyob. Dios tsa' bʌ i meleyob ma'anic mi caj i p'untañob. Anquese Dios tsi' meleyob ma'anic mi caj i pʌsbeñob i yutslel i pusic'al.

¹²Pero ti jini tal to bʌ ora lac Yum mi caj i cha' tempan tilel i cha'año' bʌ. Mi caj i yajcañob tilel ti jujuntiquil c'ʌlʌl ti colem ja' i c'aba Eufrates c'ʌlʌl ti Egipto. Mi caj i yajcañob che' bajche' mi lac yajcan trigo ya' ba' mi' jajts'el loq'uel i bʌc'.

¹³Ti jim bʌ q'uin mi caj i wustʌl trompeta. Mi caj i coltʌntelob jini woliyo' bʌ ti wocol ti Asiria yic'ot ti Egipto. Mi caj i cha' pʌjyelob tilel jini ts'a'lebilo' bʌ cha'an mi' ch'ujutesañob lac Yum ti ch'ujul bʌ wits i c'aba' Jerusalén.