Read Chol Isaias 29 Bible Online

Isaias 29 - Chol bible

Isaias 29

¹Tsi' yʌlʌ lac Yum: Obolob i bʌ jini año' bʌ ti Jerusalén, i tejclum David. Melbeñob i yejtal tac jini diosob. Ti jujump'ejl jab mi la' cha'len q'uiñijel. Mi' yujtel jump'ejl, mi la' mel yambʌ.

²Mi caj c choc tilel wocol ti la' tojlel. Jʌc'jʌc'ñayetla mi la' cajel ti uq'uel. Mi caj la' wubin i ch'ijiyemlel la' pusic'al. Mi caj i sujtel Jerusalén ti' yajñib c'ajc che' bajche' pulʌntib pʌjq'uem bʌ ti ch'ich'. Jini cha'an mic pejcañet ti Ariel, come jiñʌch yambʌ i c'aba' Jerusalén.

³Mi caj j contrajiñet. Mi caj cochel ti a contra. Mi caj c joy mʌctan Jerusalén ti p'ʌtʌl bʌ e'tijibʌl cha'an mic jisan ti guerra.

⁴Che' jini mi caj a cha'len t'an ti yebal lum. Wocol mi caj i yubintel ti pañimil cha'an pim jini lum. Lajal yubil che' bajche' i t'an ch'ujlelʌl mucul bʌ ti tam bʌ lum.

⁵Mi caj i bʌc' sujtelob a contrajob che' bajche' jini ic' mi' wets' majlel i sujl trigo.

⁶Joñon i Yumon Panchan yic'ot Pañimil, mi caj c tilel ti' tojlelob yic'ot i t'an chajc, yic'ot i yujquel lum, yic'ot sutujt ic', yic'ot c'ajc.

⁷Pejtel woliyo' bʌ ti guerra ti' contra Jerusalén mi caj i sʌc jilelob che' bajche ñajal.

⁸Che' wen an i wi'ñal winic mi' ñajlen i bʌl i ñʌc', pero mach lajmic i wi'ñal. Che' an i tiquin ti' mi' ñajlen ja', pero c'un to pañimil mi' yubin che' mi' ch'ojyel. Che' ja'el la' contrajob mi' lon ña'tañob i mʌlob ti guerra, pero mux caj i jilelob.

⁹Ñopox lot mi a wom a soc a bʌ. Otsan a bʌ ti xpots' mi a wom ajñel ti ic'ch'ipan bʌ pañimil. Yʌquetla pero mach cha'anic vino. Tʌcʌlbexel mi la' majlel, pero mach cha'anic lembal.

¹⁰Come tsa'ix cʌc'ʌyetla ti tam bʌ wʌyel. Tsac muts'beyob i wut jini x'alt'añob yic'ot jini año' bʌ i ña'tʌbal mu' bʌ i cʌntesañetla.

¹¹Jini cha'an ma'anic mi' sojlel ili t'an ti a pusic'al. Lajalʌch ili tac mu' bʌ caj ti ujtel bajche' ñup'ul bʌ jun am bʌ i sellojlel. Mi tsa' wʌq'ue i q'uel jun juntiquil yujil bʌ i q'uelol, mi caj i jac': “Mach mejlicon come ñup'ul”,

¹²o mi tsa' wʌq'ue jini mach bʌ yujilic jun mi caj i yʌl: “Mach cujilic jun”, che'en.

¹³Jini cha'an lac Yum woli' yʌl: Jini winicob x'ixicob mi' pejcañoñob ti' yum, pero ma'anic mi' yumañoñob. Mi' lon ch'ujutesañoñob ti' t'an, che ñajt añob i pusic'al. Woli jach i ñopob i cʌntesʌbal winicob.

¹⁴Jini cha'an ña'tanla. Mi caj cʌc' ti sajtel jini winicob x'ixicob cha'p'ejl jax bʌ i pusic'al cha'an mi' tojob i mul. Mi caj cʌc' ti jilel i ña'tʌbal jini wen yujilo' bʌ, che'en lac Yum.

¹⁵Obolob i bʌ jini mu' bʌ i mucob i bʌ ti' tojlel Dios, mu' bʌ i melob jontolil ti ac'ʌlel. Mi' lon ña'tañob ma'anic mi' q'uejlelob, mach cʌmbilobic.

¹⁶Tontojob. ¿Mach ba ñuquic jini Xmel P'ejt? Pero jini p'ejt mach ñuquic. I melbal jach i yum. Che' ja'el jini winicob i melbalob Dios. ¿Chucoch mi' lon chañ'esañob i bʌ ti' tojlel i yum tsa' bʌ i meleyob? Mi' lon alob mach i melbalobic Dios. Mi' ts'a'leñob i yum che' mi' lon alob mach yujilic.

¹⁷Mach jalix mi caj i sujtel ti pʌc'ʌbʌl jini te'el am bʌ ti Líbano. Ya' ba'an pʌc'ʌbʌl mi caj i cha' colel te'el.

¹⁸Ti jim bʌ q'uin jini xcojcob mi caj i yubiñob ili t'an ts'ijbubil bʌ. Mi caj i cha' c'otelob i wut jini xpots'ob año' bʌ ti ic'ch'ipan bʌ pañimil.

¹⁹Tijicña mi caj i yubiñob ti lac Yum jini pec' bʌ mi' melob i bʌ. Jini pobrejo' bʌ mi caj i tajob i ñuclel ti jini Ch'ujul Bʌ i cha'an Israel.

²⁰Mi caj i jilel jini xtic'laya yic'ot jini yujil bʌ wajal. Mi caj i tsʌnsʌntelob pejtelel woli bʌ i ña'tañob jontolil,

²¹mu' bʌ i cha'leñob leto. Mi' jop'beñob i mul i pi'ʌlob. Mi' chijtañob jini mu' bʌ i yʌq'ueñob i toj i mul. Mi' jop'ob t'an cha'an mi' mʌctañob jini toj bʌ.

²²Jini cha'an che'ʌch woli' yʌl lac Yum tsa' bʌ i mʌñʌ loq'uel Abraham ti mulil: Mach chʌn muq'uix ti bʌq'uen Jacob. Mach muc'obix ti quisin c cha'año' bʌ.

²³Come che' mi' q'uelob bajche' wolij coltañob tij c'ʌb, mi caj i bʌc'ñañoñob. Mi caj i ch'ujutesañoñob. Mi caj i subob i ñuclel jini Ch'ujul Bʌ ti Israel. Mi caj i bʌc'ñañoñob come i Dioson Israel.

²⁴Jini tsa' bʌ lotintiyob mi caj i ch'ʌmbeñob isujm. Jini tsʌtso' bʌ i pusic'al mi caj i jac'ob i cʌntesʌntel. Che' tsi' yʌlʌ lac Yum.