Read Chol Isaias 32 Bible Online

Isaias 32 - Chol bible

Isaias 32

¹La' wilan, tal jini Rey mu' bʌ caj i cha'len yumʌntel ti toj bʌ i pusic'al. Toj ja'el mi caj i cha'leñob yumʌl jini ñuco' bʌ año' bʌ i ye'tel mu' bʌ i tilelob i coltan jini Rey.

²Jini Winic i wentajʌch puts'ibʌl cha'an ñuqui ic', i wentajʌch ch'entun mu' bʌ i mʌctan sutujt ic'. Lajalʌch bajche' sʌmʌcña bʌ ja' ti tiquin bʌ pañimil yic'ot lech'el bʌ xajlel mu' bʌ i yʌc' i yʌxñʌlel che' c'unix pañimil cha'an c'ux q'uin.

³Tal i yorajlel mux i cajñel i wut israelob. Mi caj i q'uelob lac Yum. Mi caj i yubibeñob i t'an.

⁴Jini tontojo' bʌ mi caj i ch'ʌmbeñob isujm jini t'an. Jini xbes t'añob uts'atix mi caj i loq'uelob i t'an.

⁵Ma'anix mi caj i chʌn alob ti uts'at jini mach bʌ uts'atic. Ma'anix mi caj i chʌn alob ti p'ejw jini xujch'ob.

⁶Mi' caj ti wen cʌjñel jini jontol bʌ winic come jontol i t'an. I melbal jini cha'p'ejl bʌ i pusic'al mi' yʌc' ti cʌjñel. Mi' cha'len lotiya. Mi' socben i t'an Dios. Mi' chilben i bʌl i ñʌc' jini am bʌ i wi'ñal. Mi' chilben i ya'al jini am bʌ i tiquin ti'.

⁷Wen bʌbʌq'uen i maña jini xjontolil. Mi' wʌn ña'tan i jisan ti lo'loya jini p'ump'un bʌ ya' ti melobʌjʌl. Mi' yutsi tic'lan anquese toj.

⁸Pero jini xuc'ul bʌ mi' ña'tan i mel chuqui uts'at. Ti pejtelel ora uts'at chuqui mi' mel.

⁹X'ixicob mu' bʌ i to'ol ñusañob q'uin, tejchenla cha'an mi la' wubin c t'an. Xch'ocob mach bʌ anic mi' jac'ob t'an, p'isila ti la' wenta chuqui mic subeñetla.

¹⁰Come ti junjab to mi caj la' cha'len bʌq'uen. Ma'anix mi caj la' to'ol ñusan q'uin. Come ma'anic mi caj i yʌc' i wut la' ts'usubil. Ma'anic chuqui mi caj la' c'aj.

¹¹Cha'lenla bʌq'uen x'ixicob mu' bʌ la' to'ol ñusan q'uin. Yom mi' toj sajtel la' pusic'al chan bʌ mi la' mel la' bʌ. Cha'lenla uq'uel. Jochola i t'ojol jax bʌ la' pislel cha'an mi la' lʌp coxtal.

¹²Tsʌts mi caj la' jats' la' tajn cha'an uq'uel che' ma'anix chuqui mi' loq'uel ti lum, che' ma'anix mi' yʌc' i wut ts'usub.

¹³Ya' ti' lum c winicob, mi' caj ti colel ch'ixol yic'ot yopol te' mu' bʌ ti c'ux. Jochol mi caj i cʌytʌl la' wotot ya' ti ojlil tejclum ba' tijicñayetla wʌle.

¹⁴Mi caj i jochtiyel jini colem bʌ i yotot rey ba' wen chumulob. Jini chan bʌ q'ueloñib am bʌ ti ojlil tejclum mi caj i sujtel ti ch'en. Ya'i mi caj i pam cha'leñob buc'bal burro yic'ot chivo,

¹⁵jinto mi la cʌq'uentel jini Espíritu tilem bʌ ti panchan. Che' jini, jini mate'el mi caj i cha' ochel ti pʌc'ʌbʌl. Jini lum mi caj i cha' ac' i wut.

¹⁶Toj mi caj i yujtel meloñel baqui jach an winicob, mi ti jochol bʌ lum mi ti cholel.

¹⁷Che' toj mi' melob winicob ñʌch'ʌl mi caj i yajñelob. Cha'an ti' caj mi' cha'leñob chuqui toj, tijicñayob mi caj i c'ajob i yo. Ma'anix bʌq'uen ti pejtelel ora.

¹⁸Xuc'ul mi caj i chumtʌlob c cha'año' bʌ. Xuc'ul i yotot. Ma'anic majqui mi caj i contrajiñob.

¹⁹Pero mi caj i jisʌntelob jini asiriajob yic'ot pejtel i tejclum.

²⁰Tijicña mi caj la' wajñel mu' bʌ la' cha'len pac' ti' ti' pejtelel jini pa' tac. On mi caj la' c'aj. Mi caj i cha'len buc'bal la wʌlac' ti potrero.