Read Chol Isaias 36 Bible Online

Isaias 36 - Chol bible

Isaias 36

¹Che' ti chʌnlujump'ejl (14) jab che' woli ti yumʌntel Ezequías, tsa' tili jini rey Senaquerib loq'uem bʌ ti Siria cha'an mi cha'len guerra ti' contra Judá. Tsi' laj ch'ʌmʌ jini p'ʌtʌl tac bʌ tejclum ti Judá.

²Che' ya'an jini yumʌl Senaquerib ti Laquis, tsi' choco majlel suboñel yic'ot cabʌl soldadojob ti contra Ezequías ya' ti Jerusalén. Ya' tsa' wa'leyob ti' t'ejl jini estanque am bʌ ti chan ti' t'ejl jini bij mu' bʌ i ñumel ba' mi' sʌq'uesʌntel pisil.

³Tsa' tili i tajob Eliaquim (i yalobil Hilquías) jiñʌch yumʌl woli bʌ i coltan jini rey ti Judá yic'ot Sebna jini secretario, yic'ot Joa (i yalobil Asaf) jini secretario.

⁴Jini suboñel ch'oyol bʌ ti Asiria tsi' subeyob: Cucula, subenla Ezequías: “Jini ñuc bʌ rey ti Asiria mi' yʌl tontojet, come woli a lon ña'tan mux caj i coltañet yambʌ rey.

⁵¿Nuc ba ma' q'uel i t'an Faraón? ¿Mejl ba i yʌq'ueñet a p'ʌtʌlel ti guerra? ¿Majqui mi mejlel i coltañet cha'an ma' tilel a contrajiñon? Lon xuc'ul a pusic'al.

⁶Awilan ma' lon ña'tan mi caj i coltañet Egipto, pero lajal Egipto bajche' xujlem bʌ amʌy. Mi' jec'ben i c'ʌb jini mu' bʌ i xijt'iban majlel. Che'ʌch ja'el jini Faraón, i rey Egipto, ti' tojlel jini mu' bʌ i lon c'ajtiben i coltʌntel.

⁷Mi wola' wʌl: Joñon lojon mic ñop lojon c Yum Dios, che'et, ¿mach ba jinic tsa' bʌ ts'a'lenti cha'an Ezequías, che' bʌ tsi' jembe i pulʌntib am bʌ ti bujtʌl tac? Tsi' wersa subeyob jini año' bʌ ti Jerusalén yic'ot ti Judá cha'an ya jach mi' la cha'len ch'ujutesaya ti jump'ejl jach bʌ pulʌntib.

⁸La' mele a bʌ yic'ot c yum am bʌ ti Asiria. Mux caj i mel trato a wic'ot. Mi cʌl ma'anix jaytiquil soldadojob a cha'an, mi cha'p'ejlic mil. Aniqui mi cʌq'ueñet ti a wenta cha'p'ejl mil caballo. Quilala mi muc'ʌch a taj winicob mu bʌ i c'ʌchtañob.

⁹Mach mʌjlic a cha'an ti' contra i winicob c yum come ma'anic mi caj i coltañet Egipto.

¹⁰Yom ma' ña'tan ja'el jiñʌch a Dios tsa' bʌ i subeyon tilel cha'an mic ch'ʌm ili lum. Tsi' subeyon: Cucu contrajin jini tejclum cha'an ma' jisan, che'en”. Che' yom mi la' suben Ezequías, che'en jini suboñel.

¹¹Eliaquim yic'ot Sebna yic'ot Joa tsi' subeyob jini comandante tilem bʌ ti Asiria: A wocolic yom mi la' pejcañon lojon ti arameo, come cujil lojon t'an ti arameo. Mach ma' pejcañon lojon ti hebreo*, i t'an jini winicob año' bʌ ti' pam ts'ajc, come woli' ñich'tañob, che'ob.

¹²Pero jini comandante tsi' yʌlʌ: Tsi' chocoyon tilel c yum cha'an mic subeñob ili t'an ja'el, mach cha'anic jach mic subeñetla yic'ot la' rey. Wersa mi' yubiñob jini winicob mu' bʌ caj i tem mʌc'ob i ta' yic'otetla. Temel mi caj la' jap la' pich, che'en.

¹³Tsa' caji ti c'am bʌ t'an jini comandante. Tsi' yʌlʌ ti hebreo: Ubinla chuqui woli' yʌl jini wen ñuc bʌ rey ti Asiria:

¹⁴“Mach la' wʌc' la' bʌ ti lotintel cha'an Ezequías. Come mach mejlic i coltañetla.

¹⁵Mach mi la' ñop la' Yum che' bajche' mi' subeñetla Ezequías. Mi' lon ñuq'uesʌbeñetla la' pusic'al. Mi' yʌl: Isujm, lac Yum mi caj i coltañetla. Ma'anic mi caj i yʌq'uetla ti' c'ʌb jini rey ti Asiria, lon che'en.

¹⁶Mach yomic mi la' jac'ben i t'an Ezequías. Come jini rey ti Asiria woli' yʌl: Ac'ʌx la' bʌ tic wenta cha'an ñʌch'ʌl mi la' wajñel quic'ot. Che' jini mi caj la' c'ux i wut la' ts'usubil. Mi caj la' mʌc'ben i wut higuerate' tsa' bʌ la' pʌc'ʌ. Mi caj la' jap jini ja' am bʌ ti la' pozo,

¹⁷jinto mic tilel c pʌyetla majlel ti jump'ejl lum lajal bʌ bajche' la' lumal, ya' ba' yujil colel trigo yic'ot vino, ba' cabʌl lac waj yic'ot ts'usubil.

¹⁸Chʌc'ʌ q'uele la' bʌ cha'an ma'anic mi' chʌn lotiñetla Ezequías che' mi' subeñetla: Lac Yum mi caj i coltañetla, lon che'en. Añob i diosob yan tac bʌ tejclum ja'el. ¿Tsa' ba mejli i coltañob loq'uel ti' p'ʌtʌlel jini rey ti Asiria?

¹⁹¿Baqui an i dios Hamat yic'ot i dios Arpad? ¿Baqui an i dios jini Sefarvaim? ¿Tsa' ba mejli i coltan Samaria cha'an mi' loq'uel tic p'ʌtʌlel lojon?

²⁰¿Am ba juntiquil dios tsa' bʌ mejli i coltan loq'uel i tejclum ti' p'ʌtʌlel Asiria? A wila to mach mejlic i coltan Jerusalén a Yum”. Che' tsi' yʌlʌ jini rey ti Asiria, che'en jini comandante.

²¹Ñʌch'ʌl tsa' cʌleyob, come che'ʌch tsi' yʌc'ʌ mandar jini rey cha'an ma'anic mi' jac'beñob.

²²Che' jini tsa' majli Eliaquim (i yalobil Hilquías) jini am bʌ ti' wenta i yotot jini rey, temel yic'ot jini secretario i c'aba' Sebna, yic'ot Joa (i yalobil Asaf), jini am bʌ i ye'tel ti consejero. Tsi' jet' tsiliyob i bujc. Tsa' majli i subeñob jini rey Ezequías pejtel chuqui tsi' yʌlʌ jini comandante tilem bʌ ti Asiria.